Matikteijlikan tlen melauak itech mikilistli

1, 2. a) ¿Kenon Satanás yokinkajkayauj tlaltikpakchanejkej? b) ¿Tlenon tomachtiskej?

SATANÁS, “imintataj on yejuan tlakajkayauaj”, yeuejkaui uajtekajkayajtiuj (Juan 8:44). Yotekajkayauj itech ijkuak yakaj miki niman kenon nemij akin yomijkej. Ompa ualeuaj nochi costumbres niman miyek tlen noneltoka. Ika yejon, miyekej tokniuan noneki kitlajpiyaskej intlaneltokil pampa chantij kampa nochiuaj yejuin costumbres ijkuak yakaj miki (Jud. 3).

² Tla yakaj texchiualtia matikchiuakan se costumbre tlen toTajtsin xkuelita, ¿tlenon techpaleuis matikteijlikan tlen Biblia temachtia itech mikilistli? (Efes. 6:11). Niman tla se tokniuj kixnamiki yejuin, ¿kenon uelis tikpaleuiskej niman tikyolchikauaskej? Yejuin tlamachtijli techititis tlen Jehová kijtoua. Kachtopa matikitakan tlen kijtoua Biblia itech mikilistli.

TLEN YEMELAK PANOUA IJKUAK TIMIKIJ

3. ¿Tlenon opanok ijkuak onoijto kachtopa tlakajkayaualistli?

³ ToTajtsin xkinekiya matimikikan, kinekiya nochipa matinemikan. San nonekiya ika Adán niman Eva makitlakamatikan Jehová, yejua okimijli yejuin: “On kojtli yejuan temachistia on tlen kuajli niman on tlen xkuajli, maka tikuas itlakyo, pampa ipan on tonajli ijkuak tikuas itlakyo, xmatstia ika ika onkaj timikis” (Gén. 2:16, 17). San ika, Satanás okitekitilti se kouatl niman okijli Eva: “Xnenmikiskej”. Teajman ika Eva okineltokak yejon tlakajkayaualistli niman okikua itlakilyo yejon kojtli. Sakin, iueuentsin noijki okikua (Gén. 3:4, 6). Ijkon, tlajtlakojli niman mikilistli opeuj kimijtlakoua tlaltikpakchanejkej (Rom. 5:12).

4, 5. ¿Kenon ok tekajkayaua Satanás?

⁴ Ijkon ken toTajtsin yokijtoka, Adán niman Eva omijkej. Niman Satanás xokikajkauj ika tekajkayaua itech mikilistli. Sakin, okijto okseki tlen xmelauak itech mikilistli. Opeuj kichiua manoneltoka ika ijkuak yakaj miki, ialma xmiki niman oksekan yauj. Hasta aman melak miyekej ijkon yokinkajkayaujkej (1 Tim. 4:1).

⁵ ¿Tleka miyekej kineltokaj tlen Satanás kijtoua? Satanás kimatstika kenon tomachiliaj ijkuak yakaj miki, kuakon, kitekitiltia yejon niman ijkon techkajkayauas. Pampa otexchijchiujkej nochipa matiknekikan matinemikan, xtiknekij timikiskej (Ecl. 3:11). Tejuamej tikitaj mikilistli kentla se totlauelikniuj (1 Cor. 15:26).

6, 7. a) ¿Youel Satanás kiyana tlen melauak itech mikilistli? b) ¿Kenon Biblia kichiua maka matomojtikan?

⁶ Maski melak yokiyejyeko, Satanás xueli kiyana tlen melauak itech mikilistli. Ipan yejuin tonajli melak miyekej nemij akin teijliaj niman temachtiaj tlen kijtoua Biblia itech mikilistli niman tlen panoua ijkuak yakaj miki (Ecl. 9:5, 10; Hech. 24:15). Yejuin techpaleuiya maka matomojtikan niman techyolseuiya. Xnemili, aman xok techmojtia tla itlaj texchiuiliskej akin yomijkej nion tla itlaj xkuajli inpan nochiuas. Tikmatstokej ika xyoltokej niman xtlaj uelis texchiuiliskej. Yejuamej kentla san kochtoskiaj (Juan 11:11-14). Niman tikmatstokej ika xtlaj kimatij. Niman, ijkuak yoliuiskej, hasta akin melak youejkaujkej ika yomijkej kimatiskej kentla xouejkauj.

⁷ ¿Xmelak ika xouijtika tikasikamatis tlen inpan nochiua akin yomijkej? Niman tlen Satanás temachtia melak tepopolo. Xsan kinkajkayauaj tlaltikpakchanejkej, noijki kitlajtolchijchiuiliaj toTajtsin. Tla tiknekij kuajli tikasikamatiskej tlen Satanás yokichiuj, matikitakan kenon yoteijtlako itlakajkayaualisuan. Kachtopa, yokitsokuilojkej Jehová itoka. Ika ome, xtekauilia matlaneltokakan itech imikilis Cristo. Niman ika yeyi, san yokichiujkej melak manoyolkokokan tlaltikpakchanejkej.

ITLAKAJKAYAUALISUAN SATANÁS YOTEIJTLAKOJKEJ

8. Ken kijtoua Jeremías 19:5, ¿kenon itlakajkayaualisuan Satanás itech akin yomijkej yokitsokuilojkej itoka toTajtsin?

⁸ Itlakajkayaualisuan Satanás itech akin yomijkej kitsokuilouaj itoka toTajtsin. Satanás kinkajkayaua tlaltikpakchanejkej ijkuak kintlaneltokiltia ika akin yomijkej kintlajyouiltiaj ipan infierno. ¿Tleka yejuin kiteneua tlen xmelauak itech toTajtsin? Pampa teasikamachiltia ika Jehová, akin tetlasojtla, noijki ijkon ken Diablo (1 Juan 4:8). ¿Kenon kichiua matomachilikan yejuin? Niman, xnemili ¿kenon nomachilia Jehová? Maka matikilkauakan ika yejua kitlauelita ijkuak yakaj tetlajyouiltia (xpoua Jeremías 19:5).

9. ¿Kenon teijtlakoua itlakajkayaualisuan Satanás itech imikilis Cristo?

⁹ Itlakajkayaualisuan Satanás itech mikilistli kichiua maka matitlaneltokakan itech imikilis Cristo (Mat. 20:28). Satanás noijki kijtoua ika tikpiyaj se alma tlen xkeman miki, yejon kentla kijtosnekiskia ika itikpiyaj se nemilistli tlen xkeman tlamis. Kuakon, Cristo xok nonekiskia manotemaka niman ijkon tejuamej matikpiyakan se nemilistli tlen xkeman tlamis. Matikilnamikikan ika Jesús okiteititi ika melak techtlasojtla ijkuak omik topampa (xpoua Juan 3:16; 15:13). ¿Kenon nomachiliaj Jehová niman Jesús ika san ipampa yejon tlakajkayaualistli kichiua manasikamati ika xtlaj kijtosneki tlen okitemakakej?

10. ¿Kenon melak tetlajyouiltiaj itlakajkayaualisuan Satanás itech mikilistli?

¹⁰ Itlakajkayaualisuan Satanás itech mikilistli melak tetlajyouiltiaj. Xnemili, akin miki se inkoneuj kimijliaj ika omik pampa toTajtsin kinekiya okse angelito. ¿Xmelak ika itlakajkayaualis Satanás san kintlajyouiltia niman xkinyolchikaua? Satanás noijki kijtoua ika tiauej infierno. Ika yejon, yeuejkaui miyekej okintlatijkej pampa kixnamikiyaj tlen noijtouaya teopan. Se libro tlen tlajtoua itech Inquisición Española, kijtoua ika akin ijkon otlanauatijkej kinemiliayaj ika ijkon kimititijtoyaj kenon tlajyouiskiaj ijkuak yaskiaj infierno. Yejuamej kinekiyaj manoyolkuepakan achto ika mikiskiaj niman ijkon xyaskiaj infierno. Niman oksekan, tlaltikpakchanejkej kinemiliaj ika noneki kinueyichiuaskej akin yomijkej. Oksekimej miyek kichiuaj inpampa akin yomijkej pampa xkinekij itlaj makinchiuilikan. Teajman ika itlakajkayaualisuan Diablo xteyolseuiyaj, san kichiua ika miyekej matlajyouikan niman manomojtikan.

KENON UELIS TIKTEIJLISKEJ TLEN MELAUAK KIJTOUA BIBLIA

11. ¿Tlenon ueliskia texchiualtiskej matikchiuakan akin ken tikimitaj niman toamigos?

¹¹ Tla tiktlasojtlaj toTajtsin niman iTlajtol, techyolchikauas matiktlakamatikan Jehová hasta ijkuak akin ken tikimitaj noso toamigos texchiualtiskej matikpanoltikan costumbres tlen nochiua ijkuak yakaj miki. Kanaj uelis techijliskej ika tejuamej xtiktlasojtlayaj nion xtiktlakaitayaj akin yomik. Noso kanaj techijliskej ika totlajtlakol yes tla itlaj kinuajchiuilia. ¿Kenon uelis tikteijliskej tlen melauak kijtoua Biblia? Matikitakan tlen kijtoua Biblia niman kenon uelis tikchiuaskej tlen kijtoua.

12. ¿Katlejua costumbres itech mijkatsitsintin xuajnestiuej ipan Biblia?

¹² Maka matiknekikan tikchiuaskej costumbres tlen xuajnestiuej ipan Biblia (2 Cor. 6:17). Ipan se país, miyekej kinemiliaj ika ijkuak yakaj miki, iespíritu uelis nokauas imiuan akin yoltokej niman ijkon notlakuepiltis. Se libro kijtoua ika espíritu uelis “kichiuas mapano tlen melak xkuajli ipan se pueblo”. Ipan seki países de África, kitlapachouaj teskatl kampa chantiya akin yomik niman kinkuepaj infotos. ¿Tleka? Pampa nemij akin kineltokaj ika akin yomik xkuajli tla oksejpa kita ken tlachiaya. Akin tiiteixpantijkauan Jehová xtikneltokaj nion se itlakajkayaualis Satanás nion xtikchiuaj yejon costumbres (1 Cor. 10:21, 22).

13. Ken kijtoua Santiago 1:5, ¿tlenon uelis tikchiuaskej tla xkuajli tikmatij tla se costumbre xkuelita Jehová?

¹³ Tla xkuajli tikmatij tla se costumbre xkuelita Jehová, matiktlajtlanilikan matechmaka tlamachilistli (xpoua Santiago 1:5). Sakin, matiktejtemokan tlen kijtouaj toamatlajkuiloluan. Niman, tla noneki, matikintlajtoltikan tlayekankej. Maski yejuamej xtechijliskej tlenon tikchiuaskej, kema techititiskej seki tlaxeloltin itech Biblia, ken tlen uajlauej ipan yejuin tlamachtijli. Tla tikchiuaj nochi yejuin techpaleuis matikmachtikan totlamachilis makasikamati tlen kuajli niman tlen xkuajli (Heb. 5:14).

14. ¿Tlenon techpaleuis maka matikintlajkalikan oksekimej?

¹⁴ Matikchiuakan ika toTajtsin makiseli ueyilistli. Maka matitetlajkalikan (1 Cor. 10:31, 32). Ijkuak tiktlapejpeniskej tlen tikchiuaskej noso tlen xtikchiuaskej, noijki noneki matitlanemilikan itech intlamachilis tokniuan niman oksekimej. Xtiknekij ika oksekimej mauetsikan topampa (Mar. 9:42). Noijki, xtiknekij tikinkualaniskej akin xiteixpantijkauan Jehová. Tla tikintlasojtlaj, kichiuas matikinnotsakan ika tetlakaitalistli, niman ijkon tikueyichiuaskej Jehová. Niman, ximiuan tokamauisokiskej noso xtikinpijpinaujtiskej ipampa tlen kichiuaj. Matikilnamikikan ika melak tepaleui ijkuak titetlasojtlaj. Tla titetlakaitaj niman titeasikamatij, hasta uelis noyolyemaniskej akin techtlauelitaj.

15, 16. a) ¿Tleka kuajli tla tikimijliaj oksekimej tlen tikneltokaj? Xkijto se neskayotl. b) ¿Tlenon techmachtia itlajtoluan Pablo ipan Romanos 1:16?

¹⁵ Matikimijlikan akin ken tikimitaj niman tovecinos ika tiiteixpantijkauan Jehová (Is. 43:10). Tla niman tikchiuaj yejuin, uelis xouijtika tikitaskej tla kemantika melak kualanij. Francisco, akin chanti Mozambique, okijkuilo: “Ijkuak nosiuauj Carolina niman nejua opeuj tomachtiaj, otikimijlikej tochanejkauan ika xok tikinueyichiuaskiaj mijkatsitsintin. Ijkuak omik ikniuj Carolina, ouijtika otikitakej. Kampa tichantij, onka costumbre ika kaltiaj akin yomik. Kuakon, se akin ken kita noneki onkochis yeyi tonajli kampa okaltijkej. Noneltoka ika yejon costumbre kichiua maka makualani akin yomik. Ichanejkauan Carolina kichiayaj yejua ompa makochiti”.

¹⁶ ¿Tlenon okichiujkej Francisco iuan isiuauj? Francisco kijtoua: “Pampa tiktlasojtlaj Jehová niman tiknekij tikyolpaktiskej, xotiknejkej tikchiuaskej yejon. Ichanejkauan Carolina melak okualankej. Niman otechijlikej ika xtiktlakaitayaj akin yomik niman ika xok keman techontlajpaloskiaj niman xok techpaleuiskiaj. Tejuamej yotikimijlikaj tlen tikneltokayaj, kuakon xtlaj otikijtokej pampa kualantoyaj. Sekimej tochanejkauan otechpaleuijkej niman okijtokej ika tejuamej yotikimijlikaj tlen tikneltokayaj. Sakin, ichanejkauan Carolina oyolseujkej niman oksejpa ouel imiuan otouikakej. Niman, sekimej hasta yotechitatoj niman yotechtlajtlanilitoj toamatlajkuiloluan”. Kuakon, maka keman matipinauikan tikijtoskej tlen melauak itech mikilistli (xpoua Romanos 1:16).

MATIKINYOLSEUIKAN AKIN YOMIK INCHANEJKAUJ

17. ¿Kenon uelis tikteititiskej ika kuajli iuan touikaj akin nomijkatia?

¹⁷ Ijkuak se tokniuj miki se ichanejkauj noso nomijkatia, noneki matikteititikan ika tikchiuaj ken kijtoua Biblia, ompa techijlia ika “sen tetlajsojkaikniu nochipa tenotski, niman ijkuak onkaj ajmantli nochiua ken sen melauak teikniu” (Prov. 17:17). ¿Kenon uelis tikpaleuiskej se tokniuj akin kichiualtijtokej makichiua itlaj tlen xuajlauj ipan Biblia? Matikitakan tlen Biblia kijtoua.

18. a) ¿Tleka Jesús ochokak? b) ¿Tlenon tiuelij itech Jesús?

¹⁸ “Xchokakan inuan on yejuan chokaj” (Rom. 12:15). Kanaj nion xtikmatij tlen tikijliskej akin melak noyolkokoua. San ika, matikilnamikikan ika melak kinpaleuis tla imiuan tichokaj. Ijkuak Lázaro omik, María, Marta niman oksekimej okichokilijkej ikniuj akin kitlasojtlayaj. Jesús oajsik ijkuak yopanoka naui tonajli ika yomijka, niman “Jesús ochokak”, maski kimatstoya ika kiyolitiskia (Juan 11:17, 33-35). Pampa ochokak okiteititi tlen Jehová kimachiliaya ika Lázaro omijka. Noijki okiteititi ika kitlasojtlaya yejon familia, yejon melak okinyolchikauj María niman Marta. Noijki ijkon, ijkuak tokniuan kitaj ika inpampa tajmanaj, kasikamatij ika xsan inselti nemij niman kimachiliaj ika kinpiyaj amigos akin kintlasojtlaj.

19. ¿Kenon techpaleuiya Eclesiastés 3:7 matikyolchikauakan se tokniuj?

¹⁹ Onka “kamanon se xnauatis, niman kamanon se tlajtos” (Ecl. 3:7). Ijkuak tijkakij se tokniuj akin najmantika, ijkon noijki tikyolchikauaj. Matijkauilikan makijto tlen kimachilia niman maka matoyolkokokan tla kijtoua tlen xkinamiki (Job 6:2, 3). Kanaj melak ouijtika kitstika pampa ichanejkauan itlaj kichiualtijtokej makichiua. Kuakon, iuan matikchiuakan teoyotl niman matiktlajtlanilikan toTajtsin makiyolchikaua niman makimaka tlamachilistli (Sal. 65:2). Tla ueli, iuan matikpouakan Biblia noso se tlamachtijli itech se toamatlajkuilol, ken se tlamachtijli tlen tlajtoua itech inemilis se tokniuj.

20. ¿Tlenon tikitaskej ipan okse tlamachtijli?

²⁰ Melak tiktlasojkamatij ika tikmatij tlen melauak panoua ijkuak se miki niman tlen kualtsin kichiaj (Juan 5:28, 29). Nochipa ijkuak nonekis, ika totlajtoluan niman ika tlen tikchiuaj, matikteititikan tlen melauak temachtia Biblia. Ipan okse tlamachtijli tikitaskej okse tlen Satanás kitekitiltia niman ijkon ika tlakajkayauas: naualyotl. Tikitaskej tleka noneki maka matikchiuakan nion maka ika matoyolpaktikan yejuin tlen Diablo kitekitiltia.