Matikinpaleuikan akin melak najmanaj

1. ¿Kenon uelis tikchiuaskej ken toTajtsin Jehová akin tetlasojtla?

JEHOVÁ melak techtlasojtla (Juan 3:16). Tejuamej tiknekij titetlasojtlaskej ijkon ken yejua kichiua. Ika yejon, tikteititiaj ika tajmanaj ijkuak yakaj najmana, titeikneliaj niman titetlasojtlaj, niman más ijkon tikchiuaj imiuan tokniuan (1 Ped. 3:8; Gál. 6:10). Ijkuak tokniuan kixnamikij tlen ouijtika, tejuamej tiknekij tikinpaleuiskej.

2. ¿Tlenon tikitaskej ipan yejuin tlamachtijli?

² Tinochimej akin tinemij ipan ikalpan Jehová tikixnamikij tlen melak ouijtika (Mar. 10:29, 30). Niman más tikixnamikiskej tlen xkuajli pampa itinemij ipan itlamiyan tonaltin. ¿Kenon uelis topaleuiskej imiuan oksekimej? Ipan yejuin tlamachtijli tikitaskej tlenon tiuelij intech Lot, Job niman Noemí. Noijki tikitaskej tlenon kixnamiktokej sekimej tokniuan ipan yejuin tonajli niman tikitaskej kenon uelis tikinpaleuiskej.

MATITEIJYOUIKAN

3. Itech tlen kijtoua 2 Pedro 2:7, 8, ¿kanon onochantito Lot, niman tlenon opanok pampa ijkon okichiuj?

³ Lot xkuajli tlen okichiuj pampa okitlapejpeni onnochantis Sodoma kampa kichiuayaj tlen melak xkuajli (xpoua 2 Pedro 2:7, 8). Lot ompa onochantito pampa okitak ika ompa ueliskia kipiyas miyek tlemach, san ika, melak xkuajli tlen opanok (Gén. 13:8-13; 14:12). Nesi ika isiuauj melak okuelitak yejon ueyikalpan noso melak okuelitak tlen kichiuayaj akin ompa chantiyaj. Ika yejon, isiuauj Lot xokitlakamat Jehová niman omik ijkuak toTajtsin okichiuj ompa makiyaui ika tlitl niman azufre. Aman matitlanemilikan itech omemej ichpochuan Lot. Yejuamej yokinextijkaj imiuan akinon nonamiktiskej, san ika, yejon tlakamej omijkej Sodoma. Lot nochi okipolo, otlatlak ikal niman nochi tlen kipiaya. Niman tlen más teyolkoko, isiuauj omik (Gén. 19:12-14, 17, 26). Maski panotoya yejuin, Jehová nochipa okititi ika kijyouiaya.

4. ¿Kenon okiteititi Jehová ika okijyoui Lot? (Xkita tlaixkopinajli tlen onka ixpan yejuin revista).

⁴ Maski Lot okitlapejpenijka onnochantis Sodoma, Jehová okititi ika kikneliaya pampa okintitlanili iluikaktekitkej makimakixtitij yejua niman ichanejkauan. San ika, Lot nion xnotlasiuitiaya kisas maski iluikaktekitkej yokinauatijkaj makistiuetsikan. Iluikaktekitkej ononek kimatilanaskej niman kinpaleuiskej ichanejkauan niman ijkon makisakan (Gén. 19:15, 16). Sakin, iluikaktekitkej okijlikej ika nonekiya yas kampa tepeyoj. San ika, Lot xotlakak, yejua okitlajtlanili Jehová makikauili mauiya ipan se kalpan tlen nisiuj onkatka (Gén. 19:17-20). Jehová okikak ika ijyouilistli niman okikauili ompa mauiya. San ika, Lot sakin onomojti nokauas ipan yejon kalpan niman oyaj kampa tepeyoj. Kema, oyaj kampa toTajtsin kachtopa okijlika mauiya (Gén. 19:30). ¡ToTajtsin melak okijyoui Lot! ¿Kenon uelis tikchiuaskej ken Jehová?

5, 6. ¿Kenon techpaleuiya 1 Tesalonicenses 5:14 matikchiuakan ken Jehová?

⁵ Ijkon ken Lot, kanaj se tokniuj noijki kitlapejpenia tlen xkuajli niman ipampa yejon kanaj miyek tlauejli kipiya. Tla yakaj ijkon ipan nochiua, ¿tlenon tikchiuaskej? Kanaj tiknekiskiaj tikixkoijliskej ika kipixkatika tlen okitokak, pampa yejon tlen melauak (Gál. 6:7). San ika, kanaj uelis tiktejtemoskej kenon tikpaleuiskej. Uelis tikpaleuiskej ijkon ken Jehová okipaleui Lot. ¿Kenijki?

⁶ Jehová xsan okintitlanka iluikaktekitkej niman ijkon makijlitij Lot ika kipopoloskiaj Sodoma, yejua noijki okintitlanka niman ijkon makipaleuitij mamakisa. Noijki ijkon, kanaj nonekis tikijliskej se tokniuj ika tlen kichiujtika uelis melak kijtlakos. San ika, noijki uelis tikpaleuiskej. Maski tla tikitaj ika yolik kichiua tlen Jehová kijlia ipan iTlajtol, noneki tikijyouiskej. Matikchiuakan ken yejon omemej iluikaktekitkej. Maka matosiaujkauakan niman maka matiktlalkauikan. Matiktejtemokan kenon tikpaleuiskej (1 Juan 3:18). Ueliskia tikijtoskej ika kanaj nonekis tikmatilanaskej, ijkon tikpaleuiskej makichiua tlen kijtoua Biblia (xpoua 1 Tesalonicenses 5:14).

7. ¿Kenon uelis tikimitaskej oksekimej ijkon ken Jehová okitak Lot?

⁷ Jehová san ueliskia kitaskia tlen xkuajli kichiuaya Lot, san ika, xijkon okichiuj. Sakin, Jehová okichiuj ika apóstol Pedro makiteneua Lot ken se tlakatl yolmelajki. ¡Melak techyolpaktia ika Jehová techintlapopoluilia totlajtlakoluan! (Sal. 130:3). ¿Uelis tikimitaskej oksekimej ijkon ken Jehová okitak Lot? Tla tikitaj tlenon kuajli kichiuaj tokniuan, xtikmachiliskej tla ouijtika tikimijyouiskej. Niman yejuamej más kinokauiliskej matikinpaleuikan.

MATITEIKNELIKAN

8. ¿Tlenon tikchiuaskej tla titeikneliaj?

⁸ Job melak otlajyoui, san ika, yejua xotlajyoui tla pampa okitlapejpenijka tlen xkuajli, ken Lot. Melak miyek tlen ipan onochiuj Job: okipolo tlen kinopiliaya, miyekej xok okitlakaitakej niman okualok. Niman tlen más teyolkoko, ikoneuan omijkej. Noijki, yeyimej tlakamej akin kijtouayaj ika iuan nouikayaj, melak okajuatoj. ¿Tleka yejuin yeyimej tlakamej nion achijtsin xokiknelijkej? Yejuamej xokiyejyekojkej kasikamatiskej tlenon yemelak ipan nochiujtoya Job. Ika yejon, okinemilijkej tlen xkinamikiya niman melak okajuakej. ¿Tlenon techpaleuis maka ijkon tikchiuaskej? Matikasikamatikan ika san Jehová kimatstika tlenon kixnamikij itekipanojkauan. Kuajli matijkakikan tlen techijlis akin tlajyouijtika. Maka san matijkakikan tlen techijlia, noijki matikyejyekokan tikmachiliskej tlen yejua kimachilia. Tla ijkon tikchiuaj, uelis tikititiskej tokniuj ika noijki techajmana tlen ipan nochiujtika.

9. ¿Tlenon xtiknekiskej tikchiuaskej tla titeikneliaj, niman tleka?

⁹ Tla titeikneliaj, xtiknekiskej tikintejteneuaskej oksekimej ipampa tlen kixnamiktokej. Akin tetlajtolchijchiuilia san texexeloua niman kichiua ika tokniuan ipan tlanechikojli maka san sekan manemikan (Prov. 20:19; Rom. 14:19). Noijki kiteititia ika xyolkuajli niman ika xtlanemilia inpampa oksekimej. Tlen kijtotinemi uelis kichiuas más manoyolkoko akin itlajyouijtika (Prov. 12:18; Efes. 4:31, 32). Kuakon, melak tepaleui tla tikitaj tlen kuajli kichiuaj oksekimej niman tla tiknemiliaj kenon uelis tikinpaleuiskej matlaxikokan.

10. ¿Tlenon techititia Job 6:2, 3?

¹⁰ (Xpoua Job 6:2, 3). Job kemantika san otlajtotikis. San ika, yejua sakin okinokuiti ika xkuajli tlen okijtoka (Job 42:6). Ijkon ken Job, akin kixnamiktika tlen ouijtika kanaj noijki san tlajtotikisa, niman sakin noyolkuepa itech tlen okijto. ¿Tlenon noneki tikchiuaskej? Matikiknelikan niman maka matikualanikan. Matikilnamikikan ika Jehová xkinekiya matikixnamikikan tlaueltin tlen aman tikixnamikij. Kuakon, tikasikamatij ika akin kixnamiktika tlen ouijtika kemantika san tlajtotikisa niman xkinemilia tlen kijtoua. Maski tla se tokniuj kijtoua tlen xmelauak itech Jehová noso totech, xkipiya ika tikualantiuetsiskej noso tiktejteneuaskej (Prov. 19:11).

11. ¿Kenon tlayekankej kichiuaj ken Elihú ijkuak kinnojnotsaj tokniuan?

¹¹ Kemantika, akin kixnamiktika se ueyi tlauejli noneki yakaj akin makipaleui, makinojnotsa niman makimelajkatlali (Gál. 6:1). ¿Kenon tlayekankej uelis ijkon tepaleuiskej? Uelis tepaleuiskej tla kichiuaj ken Elihú, akin melak kuajli okikak Job niman okasikamat (Job 33:6, 7). Elihú okinojnots Job hasta ijkuak kuajli yokasikamatka tlenon kinemiliaya. Tlayekankej akin kichiuaj ken Elihú kuajli kinkakij tokniuan niman kiyejyekouaj kasikamatiskej tlenon kixnamiktokej. Ijkon, ijkuak yejuamej kinnojnotsaj tokniuan, más ajsi ipan inyojlo tlen kimijliaj.

MATIKIJTOKAN TLEN TEYOLSEUIYA

12. ¿Kenon nomachiliaya Noemí ijkuak omik iueuentsin niman omemej ikoneuan?

¹² Noemí okitlasojtlak Jehová niman nochipa okitekichiuili. San ika, ijkuak omik iueuentsin niman omemej ikoneuan, yejua xok kinekiya makitokayotikan Noemí, aman kinekiya makijlikan Mará, tlen kijtosneki “Chichiyalistli” (Rut 1:3, 5, 20, nota, 21). Rut, isiuamon Noemí, iuan onen ijkuak kixnamiktoya tlen ouijtika, xsan okipaleui makipiya tlen kikuas, noijki okiyolseui ika itlajtoluan. Rut okititi ika melak kitlasojtlaya pampa okijli tlen melak kualtsin niman tlen teyolseui (Rut 1:16, 17).

13. ¿Tleka noneki matikinpaleuikan tokniuan akin yomik imixnamik?

¹³ Noneki matikinpaleuikan tokniuan akin yomik imixnamik. Uelis tikijtoskej ika akin yononamiktijkej kentla yeskiaj ome kojtin tlen san sekan yonoskaltijkej. Kuakon, ineluayouan yejuin kojtin yonomamatilojkej. Niman ijkuak se kojtli kiuiuitlaj niman uaki, yejon okse kojtli noijki uakisneki. Noijki ijkon inpan nochiua tokniuan akin miki imixnamik, yejuamej uejkaujtipan tlajyouijtokej. Paula,b akin san totoka omik iueuentsin, kijtoua: “Nochi nonemilis onopatlak, onikmachili ika xok nikojtik katka. Melak kuajli iuan ninouikaya, nikijliaya nochi tlen nopan nochiuaya. Pakiya ijkuak nejua nipakiya niman nechpaleuiaya ijkuak nikixnamikiya tlen ouijtika. Nochipa nechkakiya ijkuak nikijliaya tlen nechajmanaya. Onikmachili kentla onechtlajkotejkaj”.

14, 15. ¿Kenon uelis tikyolseuiskej akin yomik ixnamik?

¹⁴ ¿Kenon uelis tikyolseuiskej akin yomik ixnamik? Kachtopa noneki iuan tonojnotsaskej, maski kanaj xmás kuajli tikmatij tlenon tikijliskej. Paula, akin yotikteneujkaj, kijtoua: “Nikasikamati ika miyekej xkuajli nomachiliaj ijkuak yakaj miki. Xkinekij itlaj kijtoskej pampa kinemiliaj ika uelis teyolkokoskej. San ika, más kuajli tla itlaj kijtouaj maski manopopolokan”. Akin noyolkokojtika kanaj xkichia matikijlikan itlaj tlen melak tetlanemililti. Paula kijtoua: “Niktlasojkamati ijkuak akin imiuan ninouika nechijliaj: ‘Nechyolkokoua tlen mopan onochiuj’”.

¹⁵ William, akin san kemach omik isiuauj, kijtoua: “Niktlasojkamati ijkuak oksekimej nechijliaj tlen kualtsin kichiuaya nosiuatsin; nechpaleuiya nikmatis ika melak kitlasojtlayaj niman kitlakaitayaj. Ijkuak ijkon nechijliaj, melak nechpaleuiya. Nechyolseuiya tlen kijtouaj pampa melak niktlasojtlaya nosiuatsin niman melak iuan yoninomatka”. Se tokniuj siuakauajli akin itoka Bianca kijtoua: “Melak niyolseui ijkuak oksekimej nouan kichiuaj teoyotl niman ijkuak nechpouiliaj se noso ome tlaxeloltin itech Biblia. Melak tepaleui ijkuak yejuamej tlajtouaj itech noueuentsin niman ijkuak yejuamej nechkakij ijkuak itech nitlajtoua”.

16. a) ¿Tlenon noneki tikchiujtoskej inpampa akin yomik imixnamik? b) Ken kijtoua Santiago 1:27, ¿tlenon noneki tikchiuaskej?

¹⁶ Ijkon ken Rut xkeman okitlalkaui Noemí, tejuamej noijki noneki nochipa matikinpaleuijtokan akin yomik imixnamik. Paula, akin yotikteneujkaj, kijtoua: “Ijkuak noueuentsin omik, miyekej nimantsin onechpaleuijkej. San ika, yolik opeuj kilkauaj ika nonemilis yonopatlaka niman xok sajnoye nechpaleuiayaj. Kuakon, melak tepaleui ijkuak oksekimej kasikamatij ika akin noyolkokojtika noneki makipaleuijtokan seki metstin noso hasta seki xiujtin”. Yemelak, tinochimej titlatlamantikej niman sekimej xmás uejkauij najmantokej, san ika, oksekimej kema. Ijkuak yejuamej kichiuaj itlaj tlen yeuejkaui kichiuayaj iuan imixnamik, peuaj najmanaj. Nochipa matikilnamikikan ika Jehová techijlia ika noneki tikinpaleuiskej akin yomik imixnamik, yejuin se kualtsin tekitl tlen Jehová yotechmakak (xpoua Santiago 1:27).

17. ¿Tleka noneki matikinpaleuikan akin yokinkauj imixnamik?

¹⁷ Akin yokinkauj imixnamik noijki melak noyolajmanaj niman noyolkokouaj. Joyce, akin iueuentsin oyaj iuan okse siuatl, kijtoua: “Melak onechyolkoko ijkuak onechkauj noueuentsin. Xsajnoye ninoyolkokoskia tla noueuentsin mikiskia. Tla mikiskia ipan se accidente noso ipampa se kokolistli, nikasikamatiskia ika yejua xokitlapejpenijka yejon. San ika, noueuentsin kema okitlapejpenijka nechkauas. Onikmachili ika melak onechpijpinaujti”.

18. ¿Kenon uelis tikinpaleuiskej akin xok kipiyaj imixnamik?

¹⁸ Ijkuak tikchiuaj itlaj niman ijkon tikinpaleuiskej akin xok kipiyaj imixnamik, tikimasikamachiltiaj ika tikintlasojtlaj. Aman ika san inselti nemij, nonekij akin imiuan manouikakan (Prov. 17:17). ¿Kenon uelis tikimititiskej ika yemelak imiuan touikaj? Uelis tikinnotsaskej touan matlakuakan, imiuan tonpajxaloskej noso uelis imiuan tontenojnotsaskej. Noijki uelis tikinnotsaskej ijkuak tikueyichiuaskej toTajtsin iuan tochanejkauan. Tla ijkon tikchiuaj, tikyolpaktiskej Jehová, pampa yejua “nemi nisiu para kinyoltlalia on yejuan sanoyej noyolkokouaj” niman “kinmanauiya on kakaualtsitsimej” (Sal. 34:18; 68:5).

19. ¿Kenon tiktlakamatij tlen kijtoua 1 Pedro 3:8?

¹⁹ Sa achijtsin poliui ijkuak iTekiuajyo toTajtsin tlanauatis ipan tlaltikpaktli niman “on tlajyouilistin” xok yakaj kimilnamikis. Melak tiknekij mayejkotiuetsi yejon tonajli ijkuak “on tlen yonochiu, nochimej kelkauaskej” niman “xokaman yakaj kelnamikis” (Is. 65:16, 17). Chika yejko yejon tonajli, ika tlen tikijtouaj niman ika tlen tikchiuaj matikteititikan ika yemelak tikintlasojtlaj tokniuan niman san sekan matopaleuikan (xpoua 1 Pedro 3:8).