Ijkuak tlayekanaya toTajtsin, nochimej san sekan niman ika inyojlo nemiyaj.

¿Tleka noneki iTekiuajyo toTajtsin?

Yeuejkaui, akin otexchijchiuj, niman akin itoka Jehová, san yejua tlayekanaya niman kichiuaya ika tlasojtlalistli. Ika yejon, okichijchiuj se kualtsin xochitlalpan ne Edén, kampa kipiyaskiaj miyek tlen kikuaskiaj. Noijki, kipiayaj se kualtsin tekitl (Génesis 1:28, 29; 2:8, 15). Tla tijkauiliskiaj ika toTajtsin matechyekana, ok tinemiskiaj ika toyojlo.

Adán ipan ima kipiya tlakijlotl tlen Eva okimakak — Adán iuan Eva xokinejkej makinyekana toTajtsin.

Biblia kijtoua ika se ángel, Satanás noso Diablo, okixnamik toTajtsin niman okijto ika xkuajli tlanauatia. Okijto ika más tiyolpakiskiaj tla toTajtsin xtechyekanaskia. Teyolkoko ika Adán iuan Eva okineltokilijkej Satanás niman xokitlakamatkej toTajtsin (Génesis 3:1-6; Apocalipsis 12:9).

Adán iuan Eva okinkixtijkej kampa chantiyaj niman xok ouel onenkej nochipa pampa xokitlakamatkej Jehová niman xokinokauilijkej makinyekana (Génesis 3:17-19). Tlen okichiujkej noijki okimijtlako ikoneuan. Biblia kijtoua ika Adán otlajtlako, “niman ipampa on tlajtlakojli onkaj mikilistli” (Romanos 5:12). Noijki, pampa onka tlajtlakojli aman “sen tlakatl kipiya poder para ika nauiltia niman kichiuilia tlen xkuajli okse tlakatl” (Eclesiastés 8:9). Nochi yejuin kijtosneki ika ijkuak san tlaltikpakchanejkej noyekanaj, melak xkuajli tlen panoua.

TLALTIKPAKCHANEJKEJ PEUAJ TLAYEKANAJ

Nesi kenon Nemrod noueyimati. Ikuitlapan miyekej kichijchiujtokej se ueyi kajli — Nemrod okixnamik Jehová.

Nemrod yejua kachtopa tlayekanketl akin Biblia kiteneua, niman yejua okixnamik itlayekanalis toTajtsin. Niman miyekej xkuajli ken uajtlayekantiuej. Yejua ika, ikipiya kanaj tres mil xiujtin ika tekiuaj Salomón okijkuilo: “Onikitak kenijki chokaj on yejuan kintlajyouiltiaj, pero xakaj nemiya akinon kinyoltlalis, yej, más kintlajyouiltiayaj ikan tlauejli” (Eclesiastés 4:1).

Aman, ok ijkon tichantij. Ipan 2009, Naciones Unidas okijto ika aman más miyekej kinemiliaj ika pampa xkuajli techyekanaj melak xkuajli ken tinemij.

NONEKI ITLAJ MANOCHIUA

Melak noneki ika kuajli matechyekanakan. Niman yejon tlen toTajtsin yotechijli kichiuas.

Seki tlaixkopinaltin tlen kiteititia ika tlakamej sa no yejuamej noyekanaj: 1) ipan se ojtli kampa melak tlatsokuilkan se siuatl akin ualeua Asia kinapalotika ikoneuj akin melak chokatika; 2) se ueuentsin nemi ipan se hospital; 3) sekimej soldados tlaixnamiktokej; 4) sekimej tlakamej melak kualantokej niman kinpiyaj ipan inmauan seki amamej; 5) se siuatl iuan ichpoch akin kemach oajsikej inchan kitaj ika yokitlapankej vidrio tlen kipiya inpuerta; 6) ipan se kalpan kampa melak tlapoktentok onokej miyek cables de luz — Nion akin kiyejyekouaj kuajli tlayekanaskej xuelij kiyektlaliaj tlen tikixnamikij.

ToTajtsin kipiya iTekiuajyo, kijtosneki, se gobierno tlen kintekipatlas nochimej akin tlayekanaj ipan tlaltikpaktli, “niman ireinojyo nokauas para nochipa” (Daniel 2:44). Yejuin Tekiuajyotl tlen melak miyekej kitlajtlanij ipan padrenuestro (Mateo 6:9, 10, TNM). San ika, xtoTajtsin tlayekanas ipan yejon Tekiuajyotl, yejua yokitekitlali yakaj akin onen ipan tlaltikpaktli. ¿Akinon yokitlapejpeni?