Tlanechikojli ijkuak tikisaj tontenojnotsaj techpaleuiya

1. ¿Tleka nochiua tlanechikoltin ijkuak tikisaj tontenojnotsaj?

¹ Se tonajli, Jesús okinsentlali 70 inomachtijkauan ijkuak xiyayaj ika ontenojnotsaskej (Luc. 10:1-11). Okinyolchikauj ijkuak okimijli ika xsan inselti nemiyaj, pampa “iTeko on pixkilistli”, Jehová, yejua akin kinyekanaskia. Noijki okimijli tlenon kinpaleuiskia makichiuakan intekiyo niman okomintitlan “ojomemej”. Ipan yejuin tonajli, tlanechikoltin ijkuak tikisaj tontenojnotsaj noijki ijkon techpaleuiyaj: teyolchikauaj, techmachtiaj niman ompa techijliaj ken titekitiskej.

2. ¿Kech uejkauis aman tlanechikoltin ijkuak tontenojnotsaj ipan abril ika tlayekapan?

² Hasta aman, yejuin tlanechikoltin uejkauiyaj 10 noso 15 minutos. Ipan yejuin minutos notlaliayaj grupos, teijliayaj kanon tenojnotsaskej niman noijki nochiuaya se teoyotl. San ika, ipan abril ika tlayekapan, yejuin tlanechikoltin san uejkauis 5 noso 7 minutos. San ika, tla sakin ijkuak yokipixkej se tlanechikojli kisalos ontenojnotsalos, san achijtsin mauejkaui yejon tlanechikojli, pampa akin ompa nemij yokiselijkej tlamachtijli itech toTajtsin. Tla xuejkaui yejuin tlanechikojli, kinkauilis akin tenojnotsaj mauejkauikan matenojnotsakan. Noijki precursores niman tenojnotskej akin yopeujkaj tenojnotsaj ijkuak xipeua yejuin tlanechikojli, xuejkauiskej noteltiskej.

3. ¿Kenon nochiuaskej tlanechikoltin ijkuak tontenojnotsaskej?

³ Tlanechikoltin ijkuak tontenojnotsaj kipiya ika nochiuaskej kampa makinpaleui akin ontenojnotsaj. Miyek tlanechikoltin yokitakej ika melak kuajli tla grupos nosentlaliaj nojnonkua niman ijkon yejon tlanechikojli niman kampa ontenojnotsaskej nisiuj manokaua. Ijkon tokniuan akin kinyekanaj grupos xouijtika kitaskej kinyekanaskej tokniuan. Grupo ika tlayekankej kijtos tlenon kinamiki nochiuas imiuan tokniuan. Nochimej kimatstoskej kanon tenojnotsaskej iuan akinon niman sakin nochiuas teoyotl.

4. ¿Tleka tlanechikojli ijkuak tontenojnotsaj melak ueyi kijtosneki ken oksekimej tlanechikoltin?

⁴ Ueyi kijtosneki ken oksekimej tlanechikoltin. Ipan yejuin tlanechikoltin san yauej akin ontenojnotsaskej, xkijtosneki noneki nochimej tokniuan yaskej. San ika, yejon xkijtosneki san matikauilmatikan noso xueyi kijtosneki ken oksekimej tlanechikoltin. Ken oksekimej, yejuin se tetlayokolijli tlen techmaka Jehová tlen techyolchikaua matotlasojtlakan niman matikchiuakan kuajli tekitl (Heb. 10:24, 25). Ika yejon, akin kiyekanaskej yejuin tlanechikojli noneki kuajli nomachtiskej niman ika yejuin manoueyichiua Jehová niman makinpaleui akin ompa yaskej. Nochipa ijkuak uelis, akin ontenojnotsaskej kipiya ika nochikauaskej nemiskej ipan yejuin tlanechikojli.

Tlanechikojli ijkuak tontenojnotsaj xsan tikauilmatiskej nion xtikitaskej ika xueyi kijtosneki ken oksekimej tlanechikoltin

5. (a) ¿Tlenon tekitl kichiua tlayekanketl itech tlanojnotsalistli ika tlanechikoltin ijkuak tontenojnotsaj? (b) ¿Kenon tokniuj siuatl noneki kiyekanas yejuin tlanechikojli? (Xkita recuadro ipan página 6.)

⁵ Kenon timomachtis tla titlayekanas. Tla yakaj kineki kuajli kipanoltis se tlamachtijli, noneki makimakakan ijkuak ok uejkaujtipan tonajli poliui. Itech tlanechikojli ijkuak tontenojnotsaj noijki ijkon panoua. Ijkuak grupos itech tlanojnotsalistli miyekan nosentlaliaj, tlayekanketl ipan grupo itech tlanojnotsalistli niman akin kipaleuiya yejuamej kipanoltiskej yejuin tlanechikojli. San ika, ijkuak nochi tlanechikojli nosentlalis, tlayekanketl itech tlanojnotsalistli kijtos akin kiyekanas tlanechikojli. Sekimej tlayekankej itech tlanojnotsalistli kinmaka se amatl tokniuan akin kiyekanaskej yejuin tlanechikojli niman noijki notlalia se amatl ipan tablero. Tlayekanketl itech tlanojnotsalistli kuajli kintlapejpenis akin kiyekanaskej yejuin tlanechikojli, melak kuajli nopanoltis tla kuajli tlamachtiaj niman kuajli kimijliaj tokniuan kenon tekitiskej. Tla seki tonajli xnemi se tlayekanketl, tlapaleuijketl noso se tokniuj akin yonoapolakti, tlayekanketl itech tlanojnotsalistli kitlalis se tokniuj siuatl akin yonoapolakti niman youejkauj ika tenojnotsa. (Xkita “Ijkuak se tokniuj siuatl kiyekanas tlanechikojli”, ipan página 6.)

6. ¿Tleka noneki kuajli nomachtis akin kiyekanas yejuin tlanechikojli?

⁶ Ijkuak techmakaj matikpanoltikan se tlamachtijli Kampa Tomachtiaj iTekiyo toTajtsin noso ipan Tlanechikojli ken Tiktekichiuiliskej toTajtsin, xsan tikauilmatij niman kuajli tomachtiaj. Achijtsitsintin peuas tlanemiliskej tlen kijtoskej hasta ipan ojtli ijkuak yauej ipan tlanechikojli. Tla techijliaj matikyekanakan tlanechikojli ijkuak tontenojnotsaskej, noijki noneki kuajli tomachtiaj. Pampa aman ika yejuin tlanechikojli xok uejkauis, noneki kuajli matomachtikan niman ijkon matitepaleuikan niman mauejkaui san kech noneki. Kuajli timoyektlalis noijki kijtosneki tikmatis kanon tontenojnotsaskej ijkuak xipeuaj yejuin tlanechikojli.

7. ¿Itech tlenon titlajtos ipan tlanechikojli ijkuak tontenojnotsaskej? (Xkita recuadro ipan página 6.)

⁷ Itech tlenon titlajtoskej. Grupo akin kiyekana nochi tlanechikoltin xkichijchiua se amatl itech kenon noyekanas yejuin tlanechikojli, pampa miyekan noneki nopanoltis okse tlemach. Ipan recuadro “Tlen tikpanoltis ipan tlanechikojli ijkuak tontenojnotsaskej” uajlauj san seki. Nochia ika nochipa matlanankilikan akin ompa yauej, kemantika uelis noteititis kenon tenojnotsaskej noso se video itech jw.org tlen matlajto itech tlanojnotsalistli. Ijkuak nomachtis akin kiyekanas yejuin tlanechikojli, noneki kinemilis tlen kinyolchikauas niman kinpaleuis tokniuan akin kisaskej ipan yejon tonajli.

Ijkuak nomachtis akin kiyekanas yejuin tlanechikojli kipiya ika tlanemilis kenon kinyolchikauas niman kinmachtis tokniuan akin kisas ipan yejon tonajli

8. ¿Tlenon noijki uelis nopanoltis ipan tlanechikoltin ijkuak tontenojnotsaskej ipan sábado niman domingo?

⁸ Melak miyekej akin ontenojnotsaj ipan sábado kitemakaj La Atalaya niman ¡Despertad!, tla onka ika intlajtol. Miyekej akin kisaj sábados akin xueli kichiuaj ipan semana, kanaj xok kilnamikij kenon onomachtijkej tenojnotsaskej ijkuak okiueyichiujkej toTajtsin iuan inchanejkauan. Ika yejon, uelis tokniuj akin kiyekanas yejuin tlanechikojli makiteititi kenon notenojnotsas ijkon ken uajnestiuj ipan ToTekiyo itech Tekiuajyotl. Okse tlen uelis kichiuas, kiteneuas tlen panotika noso se iluitl tlen nochiua ijkuak notemakas se revista. Noijki uelis tlajtos itech tlen tikijtoskej tlen matechpaleui ijkuak oksejpa tontetlajpaloskej. Noijki tla nemij se tokniuj akin yokitemakak yejuin revistas, uelis notlajtlanilis makijto tlen uelis techpaleuis noso tlen kuajli ipan yonochiuj. Ipan domingos noijki uelis ijkon nochiuas ika amatlajkuiloltin tlen notemakatokej yejon metstli. Ipan tlanechikojli ijkuak tikisaskej tontenojnotsaskej noijki nopanoltis kenon tikintemakaskej seki amatlajkuiloltin ken Techijlia tlen kualtsin niman Xkaki toTajtsin niman amoxtli Temachtia Biblia, tlen tikintemakaj maski san kemanon niman ika titemachtiaj. “Tla revistas xonka ika nemotlajtol, kuajli yes manotemakakan ika español tla kampa notenojnotsa nemij akin tlajtouaj español niman xonka tlanechikojli ika español. Kuajli yes tla san notemakaskej amatlajkuiloltin ika tlajtojli tlen kitekitiltia tlanechikojli”.

9. Ijkuak tlanechikojli kipiya se ueyi tekitl, ¿itech tlenon uelis noijtos itech tlanechikojli ijkuak tontenojnotsaj sábado iuan domingo?

⁹ Ijkuak tlanechikojli kipiya ueyi tekitl kitemamakatika se amatlajkuilojli pitentsin, sábados niman domingos uelis noitas kenon notemakas iuan revistas. Noijki uelis noijtos tlen nochiuas ijkuak se kuelkaki tlen tikijliaj. Okse tlen uelis nochiuas makijtokan tlen kuajli inpan yonochiuj kampa manesi ika melak noneki matitlapaleuikan ijkuak onka se ueyi tekitl.

10, 11. ¿Tleka noneki akin tenojnotsaj manomachtikan ijkuak yaskej ipan yejuin tlanechikojli?

¹⁰ Kenon uelis noyektlaliskej akin ontenojnotsaj. Yejuin tlanechikojli melak kuajli onkisas noijki tla akin ontenojnotsaskej tlapaleuiyaj. Tla nomachtiaj, kanaj ijkuak kiueyichiuaj toTajtsin, ijkuak xikisaj ontenojnotsaj, kijtoskej tlen tepaleui imiuan akin tenojnotsaskej. Melak kuajli timoyektlalis noijki noneki itikinpiyas amatlajkuiloltin tlen ika tontenojnotsas ijkuak xipeua tlanechikojli. Ijkon xtiuejkauiskej tajsiskej kampa tontenojnotsaskej.

¹¹ Ijkon ken tikchiuaj ijkuak tiauej ipan tlanechikoltin, noneki matajsikan ijkuak xipeua. Tla tajsij ijkuak yopeuj, uelis tikpatlaskej nochi tlen yonochiuj. ¿Kenon? Xnemili, tokniuj akin kiyekana yejuin tlanechikojli yokinemili kenon kintlalis akin ontenojnotsaskej. Tla achijtsitsintin nemij ipan tlanechikojli, kanaj san sekan komintitlanis kampa ok poliui tlamis notenojnotsas. Tla uejka kampa ontenojnotsaskej, kanaj uelis kintlalis akin xkipiya carro imiuan akin kema kipiya. Tla yauej ontenojnotsaj kampa melak nochiuaj tlen xkuajli, kanaj kintlajtlanilis tokniuan tlakamej matenojnotsakan kampa nisiuj yauej tokniuan siuamej noso imiuan matenojnotsakan. Tla se akin tenojnotsaj kualo, kanaj kontitlanis kampa tlalmantik noso kampa xtlejkos miyek escaleras. Noso kimijlis akin youejkaujkej tenojnotsaj mayakan imiuan akin kemach peuaj. San ika, tla xnimantsin tajsij, kanaj tokniuj nonekis kipatlas tlen yokinemilijka kichiuas noso kinpatilis akin imiuan yokintlalijka ontenojnotsaskej. Kema, tinochimej uelis topan nochiuas ika xniman tajsiskej. San ika, tla tikchiuaj pampa ijkon yotomatkej, matiknemilikan tleka yejuin ijkon panoua, pampa xtiktlasojkaitaj yejuin tlanechikojli noso pampa xtikitaj tlenon noneki kachtopa tikchiuaskej.

12. Tla nochipa san iuan se tokniuj tikisaj, ¿tlen uelis tiknemiliskej tikchiuaskej?

¹² Tokniuan uelis kinemiliskej akinon iuan tenojnotsaskej noso kichiaskej tokniuj akin kiyekana yejuin tlanechikojli makimijli akin iuan ontenojnotsaskej. Aman tla san nochipa san sekimej imiuan tikisaj, ¿uelis tikisaskej iuan oksekimej tokniuan niman maka san nochipa imiuan akin kuajli touikaj? (2 Cor. 6:11-13.) ¿Uelis kemantika tikisaskej iuan se akin kemach peua tenojnotsa niman tikpaleuis kuajli matemachti? (1 Cor. 10:24; 1 Tim. 4:13, 15.) Ijkuak panotos tlanechikojli, kuajli matijkakikan tlen techijliaj, ken ijkuak kijtouaj kanon tontenojnotsaskej. Tla yotlamito, maka matikyejyekokan tikpatlaskej tlen yotechijlikej niman nimantsin matiakan kampa tontenojnotsaskej.

13. Tla tinochimej titlapaleuiyaj, ¿kenon techpaleuis tlanechikojli ijkuak tontenojnotsaskej?

¹³ 70 inomachtijkauan Jesús akin okititlan matenojnotsatij “onokuepkej ikan paktli” (Luc. 10:17). Kuajli tikmatstokej pampa Jesús kachtopa iuan onosentlali inomachtijkauan, okichiuj kuajli makisati intekiyo. Noijki ijkon panoua ika tlanechikoltin ijkuak tontenojnotsaj. Tla tinochimej titlapaleuiyaj, yejuin tlanechikojli techyolchikauas, techmachtis niman techpaleuis kuajli matikchiuakan totekiyo ijkuak tikchiuaj ika “nochimej países makixmatikan on tlen melauak” (Mat. 24:14).

Ijkuak se tokniuj siuatl kiyekanas tlanechikojli

Tokniuj siuatl kipiya ika nokuatlapachos niman tla uelis nochipa manotlalijto. Noijki uelis kijtos tlen kijtoskia se tokniuj. Maski xnesis kentla temachtijtos, yejua uelis peuas tlen san sekan nomachtiskej. Tla kijliskej okse tokniuj siuatl makichiua teoyotl, noijki noneki nokuatlapachos. Tla yejko se tokniuj akin yonoapolakti ijkuak kiyekantika yejuin tlanechikojli se tokniuj siuatl, kitlajtlanilis tokniuj matlamiti. Itekiyo tlayekanketl itech tlanojnotsalistli kitas tlen uelis panos niman kiteijlis tlen uelis nochiuas niman ijkon maka yakaj noyolkokos. Xnemili, uelis panos ika ipan yejuin tlanechikojli ompa nemi se telpokatsin akin yonoapolakti niman yejuin tlanechikojli kiyekana tokniuj siuatl. Tla tlayekankej kinemiliaj ika yejuin telpokatsin ok xuelis kiyekanas yejuin tlanechikojli, san ika, kema uelis kichiuas teoyotl, tlayekanketl itech tlanojnotsalistli nonojnotsas imiuan niman tokniuj siuatl makiyekana tlanechikojli niman telpokatsin makichiua teoyotl. Noso uelis panos ika ompa nemis se tokniuj akin yonoapolakti akin xkipiya ika kiyekanas noso xkichiuas teoyotl ipampa tlen san tlayekankej kimatstokej. Maski tlayekankej xkijliskej tleka, tlajtoskej iuan tokniuj siuatl akin kiyekanas yejuin tlanechikojli ika yejua akin kipanoltis tlanechikojli niman kichiuas teoyotl maski ompa manemi yejuin tokniuj. Noijki tlayekankej kijliskej tokniuj tlen tonajli nemiskej tokniuan siuamej akin kiyekanaskej tlanechikojli ijkuak ontenojnotsaskej.

Tlen uelis nopanoltis ipan tlanechikojli ijkuak ontenojnotsaskej:

Seki ken notenojnotsas uajnestiuj ipan ToTekiyo itech Tekiuajyotl.
Se video itech jw.org tlen matlajto itech tlanojnotsalistli.
Tikteijlis kenon tipeuas titenojnotsas, tlen tikijtos niman ijkon uelis oksejpa tontetlajpalos noso tikijlis kenon tikseliaj tomintsin ijkuak titekauiliaj amatlajkuiloltin.
Se tlaxelojli itech Biblia tlen mateyolchikaua noso matepaleui itech tlanojnotsalistli.
Seki tlen melak kuajli yopanok kampa titenojnotsaj noso tlen yokiskej ipan amatlajkuiloltin.
Seki tlen techpaleuis makisa itech ToTekiyo itech Tekiuajyotl.
Seki tlamachtijli tlen yonoijto ipan Tlanechikojli ken Tiktekichiuiliskej toTajtsin tlen kemach yopanok.
Se tlamachtijli itech La Atalaya tlen matlajto itech tlanojnotsalistli.
Seki tlamachtijli tlen uajlauj ipan Benefíciese niman “Ven, sé mi seguidor” tlen matlajto itech tlanojnotsalistli.
Kenon tiktekitiltis jw.org ijkuak titenojnotsaj.
Amatlajkuilojli Tlen timomachtis itech iTlajtol toTajtsin niman Tlen tepaleuiya timomachtis iTlajtol toTajtsin tlen techpaleuis ipan tlanojnotsalistli.
Kenon peuas tiknojnotsaskej se akin xkineltoka toTajtsin, se akin tlaneltoka ipan evolución noso itech okse.
Kenon titlanankilis ijkuak techijliaj tlen kitsakuilia maka matitenojnotsakan.
Kenon uelis tikpaleuiskej akin iuan titenojnotsaj kuajli makichiua itekiyo.
Tlenon tikchiuaskej tla tiknextiaj akin xtlajtoua totlajtol.
Itech kenon tikintejtemoskej akin tlajtouaj okse tlajtojli, titenojnotsas ika teléfono, kampa tojlan nojuitilo, timokuepas tontetlajpalos oksejpa noso titemachtis ika Biblia.
Tikilnamikiskej itech ken noneki totlajpiyaskej, titeasikamatiskej niman nochipa kuajli matitlajtokan, kenon toyekanaskej ijkuak titenojnotsaj, noso itech okseki.