¿Kenon techijlia akin otexchijchiuj tlen kichiuas?

Ijkuak toTajtsin okinchijchiuj tlaltikpakchanejkej, opeuj kintekitiltia teotlajtokej niman ángeles niman ijkon kinnotsas tlaltikpakchanejkej. Niman noijki okichiuj ika manoijkuilo tlen kineki techijlis niman tlen kichiuas. ToTajtsin techijlia ika sa achijtsin poliui para tiyolpakiskej. San ika, kanaj totlajtoltiaj: “¿Kanon tiknextiskej tlen techijlia toTajtsin?”.

Itlajtol toTajtsin onka ipan Biblia (2 Timoteo 3:16). ¿Kenon toTajtsin okintekitilti teotlajtokej niman ijkon kijkuilos tlen kineki techijlis? ToTajtsin okitlali itlanemililuan ipan intsontekon yejuin teotlajtokej niman ijkon yejuamej okijkuilojkej itlajtol (2 Pedro 1:21). Matikonnemilikan: tla se patrón kijlia itlakeual makijkuilouili se carta, xtiknemiliskiaj ika yejon carta iyaxka tlakeuajli, yej iyaxka patrón. Noijki ijkon panoua ika Biblia, maski toTajtsin okichiuj ika tlakamej makijkuilokan, tlen ompa tiknextiaj, yejua itlajtol.

NOCHIMEJ UELISKEJ KIMATISKEJ TLEN KIJTOUA ITLAJTOL TOTAJTSIN

Tlen kijtoua toTajtsin melak ueyi kijtosneki, niman yejua kineki ika nochimej makipouakan niman makasikamatikan. Aman “on yejuan chanejkej ipan in tlaltikpaktli de nochi tribus, de nochi raza, de nochi kech sesekneka tlajtoltin, niman nochi países” ueliskej kimatiskej “on kuajli tlajtojli” tlen iyaxka toTajtsin (Apocalipsis 14:6). ToTajtsin yokichiuj ika iTlajtol manotlajtolkuepa ipantsin tres mil tlajtoltin, xnotlajtolkuepani okse libro ijkon.