Akin otexchijchiuj techtlasojtla niman kineki techpaleuis

1. YEJUA KICHIUA MAKISA TONALTSINTLI

¿Tiknemiliani kenon tichantiskiaj tla xoniaskia tonaltsintli? Tonaltsintli kichiua ika kojtin maxiujyokisakan, maxochiyouakan, matlatlakiltikan niman matlaxinachokan. Noijki, tonaltsintli kichiua ika kojtin makichichinakan atl itech tlajli niman yejon atl notlaloua ipan inneluayouan niman ajsi ipan inxiujyo niman ompa pokisa on atl.

2. YEJUA KICHIUA MAKIYAUI

ToTajtsin techtlayokolia atsintli, niman atsintli kichiua matlatlaki. ToTajtsin kichiua makiyaui, kichiua melak matlatlaki niman matikpiyakan tlen tijkuaskej, noijki kichiua melak matiyolpakikan.

Se tototsintli noteketstika ipan se kojtsintli niman kineki konajsis itlakilyo

3. YEJUA TECHTLAKUALTIA NIMAN TECHTLAKENTIA

Miyekej tajtin kitaj kenon kintlakualtiskej niman kintlakentiskej inchanejkauan. ITlajtol toTajtsin kijtoua: “Xkintakan on totomej yejuan patlantinemij ne ipan ajakatl. Yejuamej xtokaj nion pixkaj, nion kejeuaj ipan se kueskontli on tlen kikuaskej. Maski ijkon tej, nemoTajtsin iluikak chanej kinmakatikaj tlen kikuaj. ¿Tline nemejuamej xmás nenueyi kijtosnekij xken yejuamej on totomej?” (Mateo 6:25, 26).

“Kuajli xkintakan kenijki noskaltiaj on xochimej ne ipan tepetl [...;] nemechijlia ika on rey Salomón xkaman onotlakentij ken se on xochitl maski sanoyej onokualnextij ika on yejuan patioj itlakeuan. [...] Tla on xojtli yejuan ken aman in onkaj ipan tepetl, Dios ijki kitlakentia [...], ¿tlen xmás mechtlakentis nemejuamej?” (Mateo 6:28-30).

Tla toTajtsin ueli techtlakualtia niman techtlakentia, noijki uelis techmakas okseki tlen techpoloua. Ijkuak tikyejyekouaj tikyolpaktiskej toTajtsin, yejua nochipa techmaka tlen tijkuaskej noso kichiua matiknextikan se tekitl tlen techpaleuis matijkouakan tlen techpoloua (Mateo 6:32, 33).

Ijkuak tikitaj tonaltsintli, totomej, xochimej niman ken kiyaui, más tiktlasojtlaj toTajtsin. Ipan okse tlamachtijli tikitaskej kenon technotsa akin otexchijchiuj.