ToTajtsin akin otexchijchiuj uelis mitsteochiuas

ToTajtsin okijli Abrahán ika itech se iuejkakoneuj kinteochiuas “nochi naciones ipan in tlaltikpaktli” (Génesis 22:18). ¿Itech akinon tlajtotoya?

Kipiya kanaj dos mil xiuitl ika toTajtsin okimakak kojtilistli Jesús niman ijkon makichiua milagros. Yejon milagros okiteititijkej ika itechkopa Jesús, toTajtsin kinteochiuaskia “nochi naciones ipan in tlaltikpaktli” (Gálatas 3:14).

Milagros tlen Jesús okichiuj okinpaleui tlaltikpakchanejkej makimatikan ika yejua teotlajtoketl akin toTajtsin okitlapejpeni niman ijkon nochimej kinteochiuas. Noijki okiteititijkej kenon toTajtsin kitekitiltiskia Jesús ika tlayekapan niman ijkon nochipa kinteochiuas tlaltikpakchanejkej. Matikitakan kenon milagros tlen okichiuj Jesús kiteititiaj kenon yejua.

Otetlasojtlak niman okinpajti akin kokoxkej.

Sejpatsin, se tlakatl akin kipiaya lepra okijli Jesús ika, tla yejua kinekiya, makipajti. Jesús okajsik niman okijli: “Nikneki”. Tlakatsintli opajtitiuets (Marcos 1:40-42).

Kuelitaya temakas niman okintlakualti akin apismikiyaj.

Jesús xkinekiya ika tlaltikpakchanejkej makinpolo tlen kikuaskej. Yejua okichiuj milagros niman ijkon miyekej kintlakualtis, okichiuj mamiyekiya seki panes niman seki michimej (Mateo 14:17-21; 15:32-38). Nochimej oixuikej niman, noijki xotlan tlakuajli.

Oteikneli niman oteyoliti.

Ijkuak okitak ika isentekonetsin se siuakaualtsintli omik niman ika aman xok yakaj kitlajpiyaskia, Jesús “okiknelij” niman okiyoliti yejon telpochtli (Lucas 7:12-15).