¿Kenon mitspaleuis tla tiknotsa toTajtsin?

Pamela melak kualouaya niman oyaj kampa tlapajtiketl. San ika, noijki okitlajtlanili toTajtsin makipaleui makixiko yejuin kokolistli. ¿Okipaleui toTajtsin pampa okinots?

Yejua techijlia: “Ijkuak nechpajtijtiayaj pampa nikpiaya cáncer, miyekpa melak oninomojti. San ika, ijkuak niknotsaya Jehová, ika noyojlo ninomachiliaya niman xok ninomojtiaya. Maski ok melak ninokokoua, kuajli ninomachilia ijkuak niknotsa toTajtsin. Ijkuak nechtlajtoltiaj kenon ninemi, nikteijlia: ‘Nikualo, san ika, niyolpaki’”.

Kema, xnoneki hasta itlaj topan manochiua niman ijkuakon tiknotsaskej toTajtsin. Tinochimej tikpiyaj tlauejli niman noneki yakaj matechpaleui. ¿Techpaleuis tla tiknotsaj toTajtsin?

Biblia kijtoua: “Xkauili toTEKO nochi tlen mitsajmana, niman yejua mitspaleuis. Yejua, xkaman kauilis ma uetsi yejuan kitlakamati” (Salmo 55:22). ¡Yejuin tlajtoltin melak teyolchikauaj! Kuakon, ¿kenon techpaleuis tla tiknotsaj toTajtsin? Ijkuak tiknotsaj toTajtsin ken yejua kuelita, techpaleuis matikinxikokan totlaueluan (Xkita recuadro “Ken techpaleuiya tla tiknotsaj toTajtsin”).

Ken techpaleuiya tla tiknotsaj toTajtsin

Tiyolseuis

“Maka itlaj xkonmatstiakan, yej nochipa xchiuakan oración. Xtlajtlanilikan Dios tlen mechp[o]loua niman xmakakan tlaxtlauijli. Niman Dios mechmakas yolseuilistli más ueyi yejuan xakaj uelis kajsikamatis. Niman in yolseuilistli kejeuas nemoyojlo niman nemotlamachilis pampa itechkopa Cristo Jesús nennemij san sekan” (Filipenses 4:6, 7). Tla tikijliaj toTajtsin tlen techajmana, yejua techpaleuis kuajli matomachilikan niman matikchiuakan tlen kuajli maski tikpiyaj tlauejli.

Titlamachilise yes

“Tla semej nemejuamej xnenkimatij on tlen kuajli nenkichiuaskej, xtlajtlanilikan Dios tlamatkilistli, niman yejua miyek mechmakas. Yejua tej, melauak nochimej kinmaka, niman xitlaj kiteixkomaka” (Santiago 1:5). Ijkuak tikpiyaj miyek tlauejli, kemantika xtikchiuaj tlen kuajli. San ika, tla tiktlajtlaniliaj toTajtsin matechpaleui kuajli matitlanemilikan, yejua kichiuas matikilnamikikan itlaj tlen nestika ipan iTlajtoltsin, Biblia.

Tiyolchikauis

“On ueyi poder yejuan topan onkaj xtotech kisa, yej ualeua itech Dios” (2 Corintios 4:7). Pampa Jehová yejua toTajtsin akin nochi ueli kichiua, uelis techpaleuis matikxikokan nochi tlen tikixnamikij (Isaías 40:29). Biblia noijki kijtoua ika Jehová “techyoltlalijtikaj” niman “techyoltlalia ipan nochi on tlen tikijyouiyaj” (2 Corintios 1:3, 4).