¿Kemanon tlapopoliuis? Tlen okijto Jesús

XTLANEMILI ITECH YEJUIN OME TLEMACH TLEN OKIJTO JESÚS:

“Xnemikan ikan tlamachalistli, pampa xnenkimatij on tonajli nion yejua on hora” (MATEO 25:13).

“¡Xmotakan sano nemejuamej! Xtlachixtiakan niman xchiuakan oración, pampa xnenkimatij kamanon yejkos on tonajli” (MARCOS 13:33).

Kuakon, xakaj kimati kemanon popoliuis nochi tlen xkuajli. San ika, toTajtsin yokitlali “on tonajli niman on hora” ijkuak kipopolos tlen xkuajli (Mateo 24:36). ¿Kijtosneki yejuin ika xuelis tikmatiskej kemanon tlapopoliuis? Ka. Jesús okimijli inomachtijkauan ika panoskia seki tlemach tlen kinmititiskia ika itlapopoliuiskia.

TLEN PANOSKIA

Tlen panoskia kiteititiskia ika itlamiskia “tlajtlamach tlen nochiua ipan tlaltikpaktli”. Jesús okijto: “Pampa países nouisokiskej niman onias apistli niman miyekan tlalolinis” (Mateo 24:3, 7, TNM). Yejua noijki okijto ika miyekan oniaskia “kualolistli” (Lucas 21:11). ¿Tikita kenon nochiujtika tlen Jesús okijto?

Miyekej tlaltikpakchanejkej tlajyouiyaj ipampa guerras, pampa tlalolini, pampa kualoj noso pampa xkipiyaj tlen kikuaskej. Ipan 2004 otlalolin ipan océano Índico niman onochiuj se tsunami tlen okinmikti kanaj 225,000 tlaltikpakchanejkej. Ipan yeyi xiuitl, COVID-19 okinmikti ipantsin 6.9 millones tlaltikpakchanejkej. Jesús okijto, ika ijkuak ijkin panoskia, tikmatiskiaj ika sa achijtsin poliui ijkuak tlapopoliuis.

ITLAMIYAN TONALTIN

Biblia kijtoua ika achto ika tlapopoliuis peuas sa itlamiyan tonaltin (2 Pedro 3:3, 4). Ken kijtoua ipan 2 Timoteo 3:1-5, ipan sa itlamiyan tonaltin tlaltikpakchanejkej san kichiuaskiaj tlen xkuajli (xkita recuadro “Achto tlapopoliuis”). ¿Tikita ika ipan yejuin tonaltin tlaltikpakchanejkej xteikneliaj, tlauelejkej, melak kitlasojtlaj tomin niman san kinchiuiliaj tlen xkuajli oksekimej? Yejuin techititia ika sa achijtsin poliui ijkuak tlapopoliuis.

¿Kech uejkauis sa itlamiyan tonaltin? Biblia kijtoua ika xuejkauis. Niman sakin, toTajtsin kinpopolos akin kichiuaj tlen xkuajli (Apocalipsis 11:15-18; 12:12).

TLALTIKPAKTLI NOKUEPAS SE XOCHITLALPAN

ToTajtsin yokijto kemanon kipopolos tlen xkuajli (Mateo 24:36). Niman xsan yejon, toTajtsin noijki xkineki ika “nion se tlakatl [...] ma poliui” (2 Pedro 3:9). Yejua techkauilia matikixmatikan niman matiktlakamatikan. ¿Tleka? Pampa kineki matimakisakan ijkuak tlapopoliuis niman matinemikan ipan se kualtsin tlaltikpaktli.

ToTajtsin kuajli techmachtia tinochimej niman ijkon matikmatstokan tlen noneki tikchiuaskej tla tiknekij tinemiskej ipan yejon tlaltikpaktli tlen yejua kiyekanas. Jesús okijto ika ipan nochi tlaltikpaktli notenojnotsaskia itech iTekiuajyo toTajtsin (Mateo 24:14). Iteixpantijkauan Jehová ipan nochi tlaltikpaktli, tenojnotsaj miles de millones de horas itech tlen Biblia kijtoua ika toTajtsin techmakas ika tlayekapan. Jesús okijto ika notenojnotsaskia ipan nochi tlaltikpaktli achto ika tlapopoliuis.

Kuakon, sa achijtsin poliui ijkuak kinpopoloskej gobiernos. San ika, tejuamej uelis timakisaskej niman tinemiskej ipan yejon kualtsin tlaltikpaktli tlen toTajtsin techmakas. Ipan okse tlamachtijli tikitaskej tlenon noneki tikchiuaskej tla tiknekij ompa tinemiskej.