¿Tlenon noneki tikchiuaskej tla tiknekij tinemiskej ipan se yenkuik tlaltikpaktli?

Ipan okseki tlamachtiltin, otikitakej ika sa achijtsin poliui ijkuak tlapopoliuis noso ijkuak toTajtsin kipopolos nochi tlen xkuajli. ¿Tleka kuajli tikmatstokej ika ijkon kichiuas? Pampa Biblia, iTlajtol toTajtsin, kijtoua:

“In tlaltikpaktli ye tlantiu” (1 JUAN 2:17).

Tikmatstokej ika miyekej makisaskej pampa ipan yejon texto noijki kijtoua:

“On yejuan kichiuas tlen Dios kineki nemis para nochipa”.

Kuakon, tla tiknekij timakisaskej noneki tikchiuaskej tlen toTajtsin kineki. San ika, kachtopa noneki tikixmatiskej.

MATIKIXMATIKAN TOTAJTSIN TLA TIKNEKIJ TIMAKISASKEJ

Tlaixkopinaltin: 1. Se enfermera akin melak yosiauj, nemi ipan se hospital niman notlalijtika ipan piso. 2. Ijkuak tlakua, kita ika yakaj akin iuan tekiti yolpaki ijkuak kipoujtika se revista. 3. Akin iuan tekiti kipouilia se texto itech Biblia niman kimaka se amatsintli tlen tetitlani ipan jw.org.

Jesús okijto: “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios” (Juan 17:3). Tla tiknekij timakisaskej ijkuak tlapopoliuis niman nochipa tinemiskej, noneki tikixmatiskej toTajtsin. Xsan noneki tikmatiskej ika yejua nemi, noneki iuan touikaskej. Ijkuak tikpiyaj se toamigo, tikxelouaj tiempo para iuan tinemiskej. Niman noijki ijkon noneki tikchiuaskej iuan toTajtsin. Matikitakan kenon Biblia techpaleuiya kuajli matouikakan iuan toTajtsin.

Tlen Biblia techmachtia

ToTajtsin kinekiya matinemikan ipan se kualtsin tlaltikpaktli.

ToTajtsin okichijchiuj kachtopa tlakatl niman kachtopa siuatl, Adán niman Eva, niman okintlali ipan jardín de Edén para ompa machantikan. Yejuamej xkipiayaj tlajtlakojli niman ueliskiaj nemiskiaj ika inyojlo pampa toTajtsin nochi yokinmakaka. Tla yejuamej nochipa nouikaskiaj iuan toTajtsin nochipa nemiskiaj. San ika, yejuamej xokitlakamatkej toTajtsin.

¿Tleka titlajyouiyaj?

Ijkuak yejuin kachtopa tlakatl, Adán, xokitlakamat toTajtsin, okipolo itlaj tlen melak kualtsin pampa aman xok ueliskia nochipa nemiskia. Niman xsan yejua, noijki nochimej tlaltikpakchanejkej. Biblia kijtoua: “On achtoj tlakatl otlajtlakoj niman ipampa on tlajtlakojli onkaj mikilistli. Yejua ika nochimej mikiskej” (Romanos 5:12). Kuakon, pampa tinochimej tiualeuaj itech Adán, tinochimej tikpiyaj tlajtlakojli. Ijkon ken se tajtli akin kipanoltilia ikoneuj ikokolis. Ika yejon, tinochimej tiueuentsintiaj niman timikij.

Tlen toTajtsin yokichiuj niman ijkon techpaleuis.

Biblia kijtoua: “Dios sanoyej okintlajsojtlak on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa” (Juan 3:16). ToTajtsin okuajtitlan Jesús niman ijkon mamikiki topampa. Prabhakar, se tlakatl akin kipiya 86 xiuitl niman chanti India, kijtoua: “Ijkuak niknemilia tlen Jehováa yokichiuj topampa kuajli nikita ika yejua melak nechtlasojtla. Niman pampa nechtlasojtla aman uelis nochipa ninemis”.

Uelis tikititiskej toTajtsin ika tiktlasojkamatij tlen yokichiuj topampa.

Biblia kijtoua ika uelis tikititiskej toTajtsin ika tiktlasojkamatij tlen yokichiuj topampa “tla tikintlakamatij itlanauatiluan” (1 Juan 2:3). Pampa toTajtsin Jehová techtlasojtla, yejua techititia tlenon uelis tikchiuaskej niman ijkon tiyolpakiskej ipan yejuin tonaltin (Isaías 48:17, 18). ToTajtsin xkineki matitlajyouikan, ika yejon, techijlia ika tla tiktlakamatij tipakiskej ipan yejuin tonaltin niman uelis nochipa tinemiskej.

MOJMOSTLA MATIKPOUAKAN BIBLIA

Enfermera ajkotlachia sakin ika yokipouj Biblia achto ika tlakuas. — Uelis timakisaskej ijkuak tlapopoliuis tla tiktlajtlaniliaj toTajtsin matechpaleui niman tla tikchiuaj tlen yejua kuelita.

Noneki mojmostla titlakuaskej tla tiknekij tinemiskej. San ika, Jesús okijto: “Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua” (Mateo 4:4).

Ipan Biblia uelis tikitaskej tlen Jehová kijtoua. Tla tomachtiaj Biblia tiueliskej tlen toTajtsin okichiuj yeuejkaui, tlen kichiujtika ipan yejuin tonaltin niman tlen kichiuas ika tlayekapan.

MATIKIJLIKAN TOTAJTSIN MATECHPALEUI

¿Tlenon uelis tikchiuaskej tla tiknekij tiktlakamatiskej toTajtsin, san ika, ouijtika tikitaj xok tikchiuaskej tlen xkuajli? Melak techpaleuis tla kuajli tikixmatij toTajtsin.

Matikitakan tlen ipan onochiuj se siuatsintli akin tiktokayotiskej Sakura. Yejua auilnemiya, san ika, ijkuak opeuj nomachtia Biblia ouel tlen toTajtsin technauatia: “Xtlalkauikan tej, on auilnemilistli” (1 Corintios 6:18). Sakura okitlajtlanili toTajtsin makipaleui makikajkaua tlen xkuajli kichiuaya. Maski ijkon, yejua ok nokojtilijtika xok ijkon kichiuas. Yejua kijtoua: “Ijkuak peua niknemilia tlen xkuajli, niktlajtlanilia toTajtsin manechpaleui maka sa ijkon manitlanemili, pampa san noselti xniueli. Aman más kuajli ninouika iuan toTajtsin pampa nochipa niknotsa”. Ijkon ken Sakura, melak miyekej noijki kixmatstokej toTajtsin, niman yejua kinpaleuijtika makikajkauakan tlen xkuajli kichiuayaj niman makichiuakan tlen yejua kuelita (Filipenses 4:13).

Ijkuak kuajli tikixmatij toTajtsin, yejua noijki más kuajli techixmati niman tejuamej más kuajli iuan touikaj (Gálatas 4:9; Salmo 25:14). Tla ijkon tikchiuaj uelis timakisaskej ijkuak tlapopoliuis niman tinemiskej ipan se kualtsin tlaltikpaktli. ¿Niman kenon yes yejon kualtsin tlaltikpaktli? Yejuin tikitaskej ipan okse tlamachtijli.

a Biblia kijtoua ika toTajtsin itoka Jehová.