Tejua noijki uelis tikchiuas tlen noneki niman ijkon tinemis ipan se kualtsin tlaltikpaktli.
Sa achijtsin poliui ijkuak tinemiskej ipan se yenkuik tlaltikpaktli
ToTajtsin okichijchiuj tlaltikpaktli niman ijkon nochimej akin kitlakamatij nochipa ompa machantikan (Salmo 37:29). Ika yejon, yejua okitlali kachtopa tlakatl niman kachtopa siuatl, Adán niman Eva, ipan jardín de Edén niman okimijli makitlajpiyakan niman ompa matokakan (Génesis 1:28; 2:15).
Aman xtichantij ken toTajtsin kinekiya. San ika, toTajtsin ok kineki matinemikan ipan se kualtsin tlaltikpaktli. ¿Kenon kichiuas yejon? Ken yotikitakej, toTajtsin xkipopolos yejuin tlaltikpaktli, yejua kichiuas ika akin kitlakamatij nikan machantikan. ¿Kenon tichantiskej ijkuak toTajtsin kichiuas tlen yokijto?
Onias san se gobierno
Sa achijtsin poliui ijkuak iTekiuajyo toTajtsin, tlen onka ne iluikak, peuas tlayekanas ipan tlaltikpaktli, niman ijkuakon akin nikan chantiskej yolpakiskej, xok nomojtiskej niman kuelitaskej intekiyo. ToTajtsin okitlapejpeni Jesús niman ijkon yejua matechyekana. Gobiernos akin aman tlayekanaj xmás kinpaleuiyaj oksekimej, san ika, Jesús xijkon ken yejuamej. Ijkuak yejua tlayekanas kuajli tinemiskej pampa yejua techtlasojtlas, techiknelis niman xkitekauilis matexchiuilikan tlen xkuajli (Isaías 11:4).
Tinochimej kuajli touikaskej
Tinochimej kuajli touikaskej maski miyekan tiualeuaskej noso xsan noijki ken titlachiaskej (Apocalipsis 7:9, 10). Nochimej akin nemiskej ipan tlaltikpaktli notlasojtlaskej niman kitlasojtlaskej toTajtsin. Niman kitlajpiyaskej yejuin tlaltikpaktli ijkon ken toTajtsin kinekiya (Salmo 115:16).
Xok tlaixpoliuis niman yolkamej xok itlaj texchiuiliskej
Ijkuak iTekiuajyo toTajtsin tlayekanas, kichiuas san kualtsin makiyaui, san kualtsin matonati niman san kualtsin maseuati (Salmo 24:1, 2). Ijkuak Jesús nemiya ipan tlaltikpaktli okitelti se ajakakiyaujtli niman ijkon okiteititi tlen uelis kichiuas ika ikojtilis toTajtsin (Marcos 4:39, 41). Ijkuak Cristo techyekanas, xok yakaj nomojtis pampa xkeman tlaixpoliuis. Ijkuakon, yolkamej xok itlaj texchiuiliskej niman xakaj kijtlakos tlaltikpaktli (Oseas 2:18).
Nochimej kipiyaskej tlen kikuaskej niman xok yakaj kualos
Xok yakaj kualos, xok yakaj ueuentsintias niman xok yakaj mikis (Isaías 35:5, 6). Tichantiskej kampa tlachipaujkan niman tlakualtsinkan, ijkon ken kampa chantiyaj Adán niman Eva. Ipan yenkuik tlaltikpaktli, xok techpolos tlen tijkuaskej pampa onias miyek tlakuajli ijkon ken onkatka ipan jardín de Edén (Génesis 2:9). Ipan yejuin yenkuik tlaltikpaktli toTajtsin techijlis ijkon ken okimijli Israelitas: “Nenkikuaskej tlakuajli hasta kuajli nenmixuiskej” (Levítico 26:4, 5).
Xok onias tlen xkuajli
Ijkuak iTekiuajyo toTajtsin tlayekanas, xok yakaj kitechiuilis tlen xkuajli pampa nochimej kuajli nouikaskej. Ijkuakon, xok onias guerras, xakaj kinekis más ueyixtos niman xok itlaj techpolos. Biblia kijtoua: “Niman yemelak notlaliskej inseselti itsintlan ikojyo uva niman itsintlan ikojyo higo, niman xakaj kichiuas makuekuetlakakan” (Miqueas 4:3, 4, TNM).
Tikpiyaskej tokal niman se kualtsin tekitl
Nochi familias kipiyaskej inkal niman xakaj kinkuilis. Noijki tlen tikchiuaskej melak techyolpaktis. Ika yejon, Biblia kijtoua ika akin nemiskej ipan yenkuik tlaltikpaktli “xsanenkaj kichiuaskej” intekiyo (Isaías 65:21-23).
Kuajli techmachtiskej
Biblia kijtoua: “Kixmatiskej toTeko nochiuiyan ipan in tlaltikpaktli” (Isaías 11:9). Ijkuakon más tikixmatiskej toTajtsin niman tikitaskej kenon yejua melak tlamachilise. Noijki más tiueliskej itech tlen yejua yokichijchiuj. Tlen toTajtsin techmachtis techpaleuis matinemikan ika toyojlo, matiktlajpiyakan yejuin tlaltikpaktli niman maka matikinchiuilikan tlen xkuajli oksekimej (Isaías 2:4; Salmo 37:11).
Nochipa tinemiskej
ToTajtsin kuajli okichijchiuj yejuin tlaltikpaktli pampa kineki nochipa nikan matichantikan niman melak matiyolpakikan (Salmo 37:29; Isaías 45:18). Ika yejon, toTajtsin “kixoxotonis on mikilistli” (Isaías 25:8). Biblia noijki kijtoua ika “xok onyas mikilistli, nion chokistli, nion ajmantli” (Apocalipsis 21:4). Nochimej akin toTajtsin kinmakixtis ijkuak kipopolos tlen xkuajli niman nochimej akin yejua kinyolitis, uelis nochipa nemiskej ipan yenkuik tlaltikpaktli (Juan 5:28, 29; Hechos 24:15).
Aman melak miyekej ikichiujtokej tlen noneki niman ijkon uelis nochipa nemiskej ipan yenkuik tlaltikpaktli kampa toTajtsin tlayekanas. Maski tlajtlakolejkej, yejuamej nokojtilijtokej kichiuaskej ijkon ken Jehová kineki. Niman, ¿tleka ueli ijkon kichiuaj? Pampa kixmatij toTajtsin Jehová niman ikoneuj Jesucristo (Juan 17:3).
Sa achijtsin poliui ijkuak toTajtsin kipopolos nochi tlen xkuajli. Tla tikneki tikmatis tlenon uelis tikchiuas niman ijkon timakisas niman tinemis ipan se kualtsin tlaltikpaktli, xtlajtlanili se iteixpantijkauj Jehová mamitsmachti ka libro ¡Nochipa uelis tiyolpakis!