Nochimej kinekij kuajli nemiskej ika tlayekapan
¿Kenijki tikuelitaskia tinemis iuan mochanejkauan ika tlayekapan? Kanaj tejua tikneki tiyolpakis, xok tikualos, maka itlaj mamitsajmana niman maka itlaj mamitspolo. Tinochimej tiknekij kuajli tinemiskej ika tlayekapan.
San ika, miyekej yokitakej ika xuelis kuajli nemiskej ika tlayekapan pampa nimantsin nopatla ken nemij. Ipampa COVID-19, miyekej xkuajli nemij, xkipiyaj tomin niman oksekimej hasta yomijkej. Ika yejon, miyekej kinemiliaj ika maski kuelitaskiaj, xuelis kuajli nemiskej ika tlayekapan.
Pampa miyekej xkimatij tla uelis kuajli nemiskej ika tlayekapan, kitejtemouaj tlen uelis kinpaleuis kuajli manemikan. Sekimej kinemiliaj ika san uelis kuajli nemiskej tla kipiyaj suerte noso tla yonoijtoka ika ijkon inpan nochiuaskia. Oksekimej kinemiliaj ika tla nomachtiaj niman kipiyaj miyek tomin uelis kipiyaskej tlen yejuamej kinekiskej. Niman miyekej kinemiliaj ika uelis kuajli nemiskej tla kinpaleuiyaj oksekimej.
San ika, ¿yemelak yejon mitspaleuis kuajli xnemi ika tlayekapan? Tla tikneki tikmatis, xmotlajtolti yejuin:
¿Tlenon mitspaleuis kuajli xnemi ika tlayekapan?
¿Uelis kuajli tinemis tla timomachtia noso tla tikpiya miyek tomin?
¿Uelis kuajli tinemis tla tikinpaleuiya oksekimej?
¿Kanon uelis tiknextis tlen mitspaleuis kuajli xnemi ika tlayekapan?
Ipan yejuin revista tiknankiliskej nochi yejuin.