¿Tlenon mitspaleuis kuajli xnemi ika tlayekapan?
Miyekej kineltokaj ika onka miyek tlen kinpaleuis kuajli manemikan ika tlayekapan. Ika yejon, kichiuaj miyek tlen kinemiliaj ika uelis kinpaleuis kuajli manemikan.
TLEN MIYEKEJ KINELTOKAJ
ASTROLOGÍA. Miyekej kinemiliaj ika tla kimitaj kenon onkatkaj sitlalimej ijkuak onenkej, uelis kimatiskej tla kuajli nemiskej ika tlayekapan. Ika yejon, kitaj horóscopo niman ijkon kimatiskej tla inpan nochiuas itlaj tlen xkuajli noso ka.
NOTLATEMOUILIAJ. Sekimej kinemiliaj ika tla notlatemouiliaj uelis kimatiskej tleka inpan nochiua itlaj niman tlenon noneki kichiuaskej. Ijkuak ikimatij yejon, uelis kichiuaskej tlen kinpaleuis kuajli manemikan.
KINUEYICHIUAJ INCHANEJKAUAN AKIN YOMIJKEJ. Oksekimej kinemiliaj ika tla kinueyichiuaj akin yomijkej niman okseki tajtsitsintin, yejuamej kintlajpiyaskej niman kinteochiuaskej. Van, se siuatl akin chanti Vietnam, kijtoua: “Niknemiliaya ika tla nikinueyichiuaya akin yomijkej, más kuajli ninemiskia imiuan nokoneuan aman niman ika tlayekapan”.
KINEMILIAJ IKA MIYEKPA UAJNEMISKEJ. Miyekej kinemiliaj ika ijkuak yakaj miki uelis oksejpa uajnemis niman miyekpa uelis ijkon panos. Kinemiliaj ika titlajyouiyaj noso topan nochiua tlen kuajli ipampa tlen otikchiujkej achto ika oksejpa tiuajnemiskiaj.
Maski miyekej kinemiliaj ika yejon kanaj xmelauak, onnotlatemouiliaj ika barajas, yauej para makimitilikan inma, kitaj horóscopo niman okseki tlemach kichiuaj. Ijkon kichiuaj pampa kinemiliaj ika yejon kinpaleuis kuajli manemikan ika tlayekapan.
¿YEMELAK TEPALEUIYA YEJON?
¿Kema uelis kuajli nemiskej ika tlayekapan akin tlaneltokaj itech nochi yejuin?
Matikitakan tlen ipan onochiuj Hào, akin chanti Vietnam. Yejua kinemiliaya ika astrología niman tla kinueyichiuaya akin yomijkej kipaleuiskia kuajli manemi. San ika ¿yemelak okipaleui? Hào kijtoua: “Xok nechtlakouiliayaj, melak niteuikiliaya, xkuajli ninouikaya iuan nochanejkauan niman melak ninajmanaya”.
Qiuming, akin chanti Taiwán, tlaneltokaya itech astrología, ika yakaj uelis miyekpa uajnemis, ika yonoijto nochi tlen mopan nochiuas niman ika nonekiya kinueyichiuas akin yomijkej. San ika, sakin okijto: “Onikitak ika nochi yejuin kemantika xnasikamati niman xmelauak. Xnochi tlen kijtoua astrología nochiua. Niman tla yakaj ueliskia oksejpa uajnemiskia... xueliskia nopatlaskia niman xok kichiuas tlen xkuajli pampa xkilnamikiskia tlen okichiujka achto ika oksejpa uajnemiskia”.
“Onikitak ika nochi yejuin kemantika xnasikamati niman xmelauak” (QIUMING, TAIWÁN)
Hào, Qiuming niman oksekimej, yokitakej ika nion sitlalimej, nion tikinueyichiuas akin yomijkej, nion oksejpa tiuajnemis noso maski yonoijto tlen mopan nochiuas, xuelis mitspaleuiskej kuajli xnemi ika tlayekapan. San ika ¿kijtosneki yejon ika xuelis tikmatiskej kenijki uelis kuajli tinemiskej ika tlayekapan?
Miyekej kinemiliaj ika para uelis kuajli nemiskej ika tlayekapan noneki melak nomachtiskej noso kipiyaskej miyek tomin. San ika ¿kenon nomachiliaj akin ijkon yokichiujkej?
a Yejuin tlajtoltin tikinnextiaj ipan iTlajtol toTajtsin ipan Gálatas 6:7.