¿Uelis kuajli tinemis tla timomachtia noso tla tikpiya miyek tomin?

Miyekej kinemiliaj ika akin melak nomachtiaj niman kipiyaj miyek tomin uelis kuajli nemiskej ika tlayekapan. Kinemiliaj ika akin yauej universidad más kuajli tekitij niman más kuajli kinpaleuiyaj inchanejkauan niman oksekimej. Noijki kinemiliaj ika tla melak nomachtiaj uelis tekitiskej kampa kitlaniskej miyek tomin niman yejon kichiuas melak mayolpakikan.

TLEN MIYEKEJ KICHIUAJ

Zhang Chen, se tlakatl akin ualeua China kijtoua: “Nejua niknemiliaya ika tla xninomachtiskia universidad xueliskia nitekitiskia kampa niktlaniskia miyek tomin niman xniyolpakiskia”.

Pampa miyekej kinekij kuajli nemiskej ika tlayekapan, onnomachtiaj okseki países ipan universidades tlen melak kimixmatij. Yejuin tlen miyekej kichiuayaj achto ika peuaskia COVID-19. Ipan 2012 Organización para la Cooperación y el Desarrollo Económicos, okijto: “Itech nochimej telpokamej akin onnomachtiaj okse país, kanaj 52% ualeuaj Asia”.

Miyekej tajtin chikauak tekitij para ikoneuan manomachtitij okse país. Qixiang, se tlakatl akin ualeua Taiwán, kijtoua: “Notajuan xkipiayaj miyek tomin, maski ijkon okomintitlankej nochi nauimej ikoneuan manomachtitij Estados Unidos”. Niman para ueliskiaj kinpaleuiskej inkoneuan ononek kinotlaneuiskej tomin, ijkon ken kichiuaj miyekej familias.

¿YEMELAK TEPALEUIYA YEJON?

Ijkuak melak itlayoua, se ichpokatl yeuatika ixpan icomputadora. Melak yosiauj niman nokuaajmana. — Miyekej akin melak onomachtijkej niman kipiyaj tomin, melak ajmankamikij.

Tla tomachtiaj uelis techpaleuis, san ika, miyekej xyolpakij ijkon ken kinemiliayaj. Miyekej youejkaujkej nomachtiaj niman melak yokinotlaneuijkej tomin, maski ijkon, xtekitij kampa yejuamej kuelitaskiaj. Rachel Mui okijkuilo yejuin ipan Business Times tlen onka Singapur: “Aman más miyekej nemij akin oyajkej universidad niman xkipiyaj kanon tekitiskej”. Jianjie, akin melak onomachti niman chanti Taiwán kijtoua: “Miyekej maski onomachtijkej itlaj xueli ipan yejon tekitij”.

Sekimej kanaj kema tekitij ipan tlen onomachtijkej, san ika, xyolpakij ijkon ken kinemiliayaj. Niran, se tlakatl akin ualeua Tailandia, onomachtito Reino Unido. Ijkuak onokuep ipaís opeuj tekiti ipan tlen onomachtijka. Yejua kijtoua: “Pampa oninomachti miyek nechtlaxtlauiliayaj kampa nitekitiya, ijkon ken niknekiya. San ika, tla niknekiya ika ijkon manechtlaxtlauilikan nonekiya melak nitekitis. Sakin, nejua niman oksekimej akin ompa titekitiyaj, otechkixtijkej. Onikasikamat ika xnochipa uelis titekitis kampa tikuelita”.

Kemantika akin kipiyaj miyek tomin noijki xkuajli nouikaj imiuan inchanejkauan, kualoj noso najmanaj ipampa intomin. Katsutoshi, se tlakatl akin ualeua Japón, kijtoua: “Maski nikpiaya miyek tomin xniyolpakiya pampa oksekimej nouan notlatlaniyaj, nechnexikolitayaj niman xnechkauiliayaj maninemi ika noyojlo”. Lam, se siuatl akin chanti Vietnam, kijtoua: “Yonikitak kenon miyekej kinekij tekitiskej kampa uelis kitlaniskej miyek tomin. San ika, peua mojkamikij, najmanaj, kualoj niman xnemij ika inyojlo”.

XSAN NONEKI MELAK TIMOMACHTIS NIMAN TIKPIYAS MIYEK TOMIN

Tla xtiknekij ika itlaj matechpolo niman tiknekij tikintlajpiyaskej tochanejkauan, noneki tomachtiskej niman tikpiyaskej maski san achijtsin tomin. San ika, xsan yejuin noneki tikchiuaskej tla tiknekij kuajli tinemiskej ika tlayekapan. ¿Tleka? Xkita tlen kijtoua iTlajtol toTajtsin.

TLA MELAK TIMOMACHTIA, XNOCHIPA TIYOLPAKIS.

“No onikitak okseki más ipan in tlaltikpaktli: ika ipan sen tlaksalistli xnochipa tetlani on yejuan más tlaksa, [...] nion on tlamachilisyejkej xnochipa nochiuaj ricos, nion on tlaixmatkej xnochipa kuajli kiminseliaj, yej nochimej impan yejko ijkuak kiseliaj tlen kuajli noso xkuajli” (ECLESIASTÉS 9:11).

Miyekej maski melak onomachtijkej xueli nemij ken yejuamej kinekiskiaj pampa kampa chantij xtlaj tomin, onka tlauejli noso kinchikoitaj.

TOMIN UELIS NIMANTSIN TLAMIS.

“Maka sanoyej xmotekimaka chikauak para tiricojtis. Maka sa yejua xkonnemilijtia. Yej kuajli xkita ika on ricojyotl san panotikisa, kenon itlaj kuaktli amanaman patlanteua niman san uajnopoloua” (PROVERBIOS 23:4, 5).

Maski tomin ueli kichiua kuajli matinemikan, yejon san panotikisa. Ijkuak melak tlapatioua niman xitlaj tekitl uelis nimantsin tlamis motomin tlen tikpiya. Noijki, yakaj uelis kipolos ikal noso itomin ijkuak tlalolini, tlachichinaui niman ajakakiyaui.

TLA TIKPIYA MIYEK TOMIN UELIS MELAK TIMAJMANAS.

“Sen rico, xkaman iyolika kochi” (ECLESIASTÉS 5: 12).

Yejon tlen ipan onochiuj Franklin, akin chanti Hong Kong, yejua onomachti universidad niman miyek kitlaxtlauiliayaj kampa tekitiya, hasta okitlalijkej ompa matlayekana. San ika, yejua kijtoua: “Pampa melak nitekitiya opeuj nikualo. Hasta xueliya nikochiya pampa melak najmankamikiya”. Franklin kimachiliaya ika xok tlaxikouaya. Yejua noijki okijto: “Opeuj ninotlajtoltia tleka ijkon ninemiya niman noijki opeuj niknemilia tlenon okse ueliskia nikchiuas para niyolpakis”.

“Maka sanoyej xmotekimaka chikauak para tiricojtis” (PROVERBIOS 23:4)

Ijkon ken Franklin, miyekej yokasikamatkej ika melak timomachtis niman tikpiyas miyek tomin, xmitspaleuis más kuajli xnemi. Noijki nemij akin xkitejtemouaj kipiyaskej miyek tomin, yejuamej kinemiliaj ika más kuajli nemiskej tla kinpaleuiyaj oksekimej. ¿Kanaj yejon techpaleuis kuajli matinemikan? Ipan okse tlamachtijli tikitaskej yejon.