2 | “Teyoltlalilistli ma techmaka tlamachalistli itechkopa on Yektlajkuilojli”

BIBLIA KIJTOUA: “Nochi tlen ye uejkaui onijkuiloj ipan on Yektlajkuilojli, onijkuiloj para techmachtia. Onijkuiloj para on ijyouilistli niman teyoltlalilistli ma techmaka tlamachalistli itechkopa on Yektlajkuilojli” (ROMANOS 15:4).

¿Tlenon kijtosneki?

Biblia techyolchikaua niman techpaleuiya matitlaxikokan ijkuak tiknemiliaj ika xtlaj kuajli tikchiuaj. Noijki techijliaj ika yejkos tonajli ijkuak xok ijkon tomachiliskej.

¿Kenon techpaleuiya?

Melauak, tinochimej kemantika tajmanaj noso tiajmankamikij, san ika, akin kipiyaj depresión noso ansiedad kanaj mojmostla ijkon nomachiliaj. ¿Kenon uelis kinpaleuis Biblia?

Biblia techpaleuiya matitlanemilikan itech tlen kualtsin niman maka matitlanemilikan itech tlen teajman (Filipenses 4:8). Tlen kijtoua Biblia uelis techyolseuis niman kichiuas kuajli matomachilikan (Salmo 94:18, 19).
Biblia uelis techpaleuis maka matiknemilikan ika tejuamej xkeman uelis tikchiuaskej tlen oksekimej ueli kichiuaj noso ika nion xtitepaleuijkej (Lucas 12:6, 7).
Ipan Biblia noteneua seki tlemach tlen techititia ika xsan toselti tinemij, niman ika toTajtsin akin otexchijchiuj, kuajli kasikamati kenon tomachiliaj (Salmo 34:18; 1 Juan 3:19, 20).
Biblia techijlia ika toTajtsin kichiuas matikilkauakan nochi tlen techyolkokoua (Isaías 65:17; Apocalipsis 21:4). Tla tejuamej melak tajmanaj, tlen toTajtsin yokijto kichiuas uelis techpaleuis matitlaxikokan.

Ken kipaleuiya Biblia Jessica

Ken nechijtlakoua pampa san nochipa ninajmantika

“Ijkuak nikpiaya 25 xiuitl, opeuj melak najmankamiki niman onechijlikej ika nikpiaya depresión grave. Peuaya nikilnamikiya nochi tlen xkuajli nopan onochiujka niman maski xniknekiya nikilnamikis, xniueliya. Tlapajtijkej onechijlijkej ika ipampa nochi tlen xkuajli nopan onochiuj yeuejkaui, kichiuaya melak maninajmana niman yejon okichiuj manechajsi depresión. Ononek ninopajtis niman nitlajtos iuan se tlapajtijketl akin kimati de yejon kokolistli niman ijkon manechpaleui maka sa maniknemili tlen nechkualotla”.

Ken nechpaleuiya Biblia

“Ijkuak sanoyej ninajmanaya hasta xueliya ninijyotiaya, melak najmankamikiya niman xueliya nikochiya. Ika tlayoua miyekpa peuaya nitlanemiliaya itech nochi tlen nechajmanaya. San ika, ken kijtoua Salmo 94:19, ijkuak onka miyek tlen techajmana toTajtsin techyolseuiya niman techyolchikaua. Ika yejon, nisiuj kampa onka notlapech nikpiaya noBiblia niman se libretita kampa nestokej seki textos tlen nechyolchikauayaj. Kuakon, ijkuak xueliya nikochiya nijkauiliaya toTajtsin manechyolseui ika iTlajtoltsin.

”Biblia techpaleuiya maka matiknemilikan tlen Jehová xkuelita. Nejua niknemiliaya ika xtlaj ika nitepaleuij niman ika xnechnamikiya manechtlasojtlakan. San ika, onikasikamat ika xyejon tlen temachtiaya Biblia pampa ompa kijtoua ika toTajtsin melak tetlasojtlani, teikneliani niman ika kineki techpaleuis. Ika yolik, opeuj nikinpatla notlanemililuan niman xok onikinkauilij manechijtlakokan. Aman ninoita ijkon ken toTajtsin nechita, niman yejon nechpaleuiya maka sa maniknemili tlen kichiua maka kuajli maninomachili.

”Sa niknektika mayejko yejon tonajli ijkuak xok tikilnamikiskej nion tiknemiliskej tlen kichiua maka kuajli matomachilikan. Nikmatstika ika ajsis se tonajli ijkuak xok yakaj kualos ipampa tlen kinemilia, yejuin nechpaleuiya manitlaxiko niman kuajli manikmatsto ika ajsis tonajli ijkuak xok melak ninajmanas”.