3 | Tlen inpan onochiuj akin yeuejkaui onenkej

BIBLIA KINTENEUA: Sekimej itekipanojkauan toTajtsin akin yeuejkaui onenkej akin noijki katkaj “ken tejuamej” (SANTIAGO 5:17).

¿Tlenon kijtosneki?

Biblia kiteneua kenon onomachilijkej miyekej tlakamej niman siuamej akin yeuejkaui onenkej. Tla tikamapouaj tlen okixnamijkej, kanaj uelis tiknextiskej yakaj akin noijki ijkon onomachili ken tejuamej.

¿Kenon techpaleuiya?

Tinochimej tikuelitaskiaj matechasikamatikan, san ika, ijkuak melak xkuajli tomachiliaj más tikuelitaskiaj matechasikamatikan. Ijkuak tikamapouaj Biblia tiuelij intech sekimej itekipanojkauan toTajtsin akin otlanemilijkej niman onomachilijkej ijkon ken tejuamej. Yejuin uelis techpaleuis matikitakan ika xsan tejuamej ijkon tomachiliaj, sekimej noijki tlajyouiyaj pampa melak ajmankamikij noso pampa melak najmanaj.

Biblia kijtoua tlenon okijtokej sekimej tlakamej akin sajnoye najmanayaj niman kimachiliayaj ika xok kojtikej. ¿Kemantika yotiknemilijka yejuin: “Nikmachilia ika xok niuelis”? Ijkon onomachilijkej Moisés, Elías niman David (Números 11:14; 1 Reyes 19:4; Salmo 55:4).
Biblia kiteneua se siuatl akin itoka Ana, yejua melak tlajyouiaya pampa xueliya kinpiaya ikoneuan niman pampa se siuatl kitlauelitaya niman kipijpinaujtiaya (1 Samuel 1:6, 10).
Kanaj tejua noijki timomachilia ijkon ken Job, se tlakatl akin noijki noteneua ipan Biblia. Yejua melak tlaneltokaya itech toTajtsin, san ika, pampa melak najmanaya, ijkin okijto: “¡Nejua xok nikxikoua in tlajyouilistli, niman xok nikneki ninemis!” (Job 7:16).

Tla tikitaj kenon yejuamej melak onokojtilijkej para xok melak najmanaskej, uelis techpaleuis noijki ijkon matikchiuakan.

Ken kipaleuiya Biblia Kevin

Ken nechijtlakoua ken ninomachilia

“Ijkuak nikpiaya kanaj 50 xiuitl, onechijlikej ika nikpiaya se kokolistli tlen kichiua melak manopapatla ken ninomachilia. Kemantika melak niyolpaki, san ika, kemantika melak ninajmana niman hasta niknemilia ika más kuajli yeskia tla nimikiskia”.

Ken nechpaleuiya Biblia

“Nejua ninomachilia ijkon ken apóstol Pedro. Pampa yejua miyekpa onopopolo kemantika kinemiliaya ika xtlaj ika tepaleui. San ika, yejua xsan yejon ompa kinemilijtoya, yej okitejtemo nopaleuis itech iamigos akin melak kitlasojtlayaj. Ipampa on kokolistli tlen nikpiya, kemantika melak xkuajli ninomachilia niman peua niknemilia nochi tlen xkuajli nikchiua, yejuin kichiua maniknemili ika nejua xtlaj ika nitepaleui. San ika, ijkon ken Pedro, nejua ika yolik yopeuj ninopaleuiya itech noamigos akin melak nechtlasojtlaj, yejuamej melak nokojtiliaj nechpaleuiskej niman ijkon nejua kuajli maninomachili niman manitlaxiko.

”Noijki nontlanemilia itech kenon onomachili tekiuaj David. Yejua miyekpa melak najmanaya ipampa tlen kixnamiktoya niman notlajtlakoltiaya ipampa tlen xkuajli okichiujka. Kemantika nejua noijki melak xkuajli ninomachilia ipampa itlaj tlen onikchiuj noso onikijto. Ika yejon, melak nechyolchikaua tlen David okijkuilo ipan Salmo 51. Ipan versículo 3, yejua ijkin okijto: ‘Nikmati ika xonimitstlakamat. Notlajtlakol xueli nikelkaua’. Ijkuak nejua melak ninajmana san niknemilijtika nochi tlen xkuajli nikchiua. San ika, ijkuak ijkon ninomachilia nikilnamiki tlen okijto David ipan versículo 10: ‘Ay Dios, xnechmaka noyojlo yejuan chipauak niman notlamachilis yejuan yenkuik yejuan nochipa kinekis mitstlakamatis’. Nejua noijki ijkon niktlajtlaniliani toTajtsin, nikijlia manechpaleui kuajli maninomachili niman maniyolpaki. Niman tlen noijtoua ipan Salmo 51:17 itech Traducción del Nuevo Mundo melak nechyolseuiya, ompa ijkin kijtoua: ‘Se akin yoyoltlapan niman yoyolxajxaman, noTajtsin, xtikmapeuas’. Nochipa ijkuak nikamapoua yejon texto nikilnamiki ika toTajtsin melak nechtlasojtla.

”Ijkuak nitlanemilia itech itekipanojkauan toTajtsin akin yeuejkaui onenkej niman itech nochi tlen toTajtsin yonechmakak, más niyolchikaui. Noijki kichiua más manikneltoka ika yemelak nochiuas tlen kijtoua Biblia, niman yejon melak nechpaleuiya manitlaxiko”.