1 | Teoyotl: Xmaktili “Dios nochi on tlajtlamach yejuan” mitsyolpajsoloua
BIBLIA KIJTOUA: “Xmaktilikan Dios nochi on tlajtlamach yejuan mechyolpajsoloua pampa yejua kineki mechpaleuis” (1 PEDRO 5:7).
¿Tlenon kijtosneki?
Jehová kineki matikijlikan tlen tikixnamikij noso tlen techajmana (Salmo 55:22). Maka matiknemilikan ika pampa tlen tikixnamikij melak ueyi noso melak pitentsin, xnoneki tikijliskej toTajtsin. Tlen techajmana, toTajtsin noijki kajmana. Melak noneki matikchiuakan teoyotl niman ijkon tiyolseujtoskej (Filipenses 4:6, 7).
¿Kenon techpaleuiya?
Tla tejuamej melak xkuajli tomachiliaj, kanaj ueliskia tiknemiliskej ika xakaj uelis techasikamatis (Proverbios 14:10). San ika, uelis tikijliskej toTajtsin kenon tomachiliaj, yejua techasikamati niman kuajli techkaki. Jehová kimatstika tlen tikixnamikij niman tlen techyolkokoua, ika yejon, kineki matikijlikan nochi tlen techajmana (2 Crónicas 6:29, 30).
Ijkuak tiknotsaj Jehová más tikneltokaj ika yejua kineki techtlajpiyas. Uelis tomachiliskej ijkon ken onomachili se salmista, akin okijli toTajtsin: “Tejua tikita ijkuak ninajmana, niman tikmati ijkuak niyolpajsoliui” (Salmo 31:7). Ijkuak tikmatij ika Jehová kitstika tlen topan nochiua techpaleuiya matitlaxikokan. San ika, yejua xsan kita kenon titlajyouiyaj, yejua kuajli kasikamati tlen tikixnamiktokej. Niman techpaleuiya matiknextikan ipan Biblia tlen uelis techyolseuis niman techyolchikauas.