Tlen notlajtoltiaj akin kitaj revistas
¿Kenijki noneki nasikamatis Salmo 12:7?
Ipan Salmo 12:1-4, David kachtopa ijkin kijtoua: “Xok nemij yejuan kuajkualti tlakamej”. San ika, sakin, ipan Salmo 12:5-7, ijkin okijto:
“ToTEKO ijkin yokijtoj: ‘On mayankej niman on yejuan xuelij nomanauiyaj,
kintlajyouiltiaj niman inka nauiltiaj.
Yejua ika, aman ninotelketsas
niman nikinmanauis ijkon ken yejuamej kinekij’.
On tlen toTEKO kiprometeroua, melauak kitemaka.
¡On ipromesa ken itlaj plata yejuan más chipauak, kenon plata yejuan okixatekakej chikomepa ipan sen horno yejuan sanoyej totonki!
ToTEKO, tejuamej tikmatij ika tejua titechejeuas
Nochipa xtechmanaui de intech on kenomej tlakamej”.
Ipan tlaxelojli 5 kijtoua ika toTajtsin kinmakixtis akin tlajyouiyaj.
Ipan tlaxelojli 6 kijtoua: “On ipromesa [noso itlajtol] ken itlaj plata yejuan más chipauak”. Tinochimej akin tiktekichiuiliaj toTajtsin tikmatstokej ika yejon melauak (Sal. 18:30; 119:140).
Ipan seki Biblias ijkin yonotlajtolkuep Salmo 12:7: “Nejua nikimejyeuas”. Sekimej kinemiliaj ika yejuin tlaxelojli kijtosneki ika toTajtsin okejyeuj iTlajtol pampa ipan tlaxelojli 6 tlajtoua itech itlajtol toTajtsin. Niman tikmatstokej ika toTajtsin okejyeuj iTlajtol pampa xokitekauili makipopolokan Biblia (Is. 40:8; 1 Ped. 1:25).
San ika, Jehová noijki kimejyeua noso kintlajpiya tlaltikpakchanejkej akin noteneuaj ipan tlaxelojli 5. Yejua yokinpaleui niman nochipa kinpaleuis “on mayankej niman on yejuan xuelij nomanauiyaj” (Job 36:15; Sal. 6:4; 31:1, 2; 54:7; 145:20).
Kuakon, ¿itech tlenon tlajtoua tlaxelojli 7? ¿Tlajtoua itech tlaltikpakchanejkej noso itech itlajtol toTajtsin?
Tla kuajli tikitaj yejuin Salmo, tikitaskej ika tlajtoua itech tlaltikpakchanejkej.
Ipan Salmo 12:1, 2, kijtoua ika miyekej xkuajkualtin tlakamej kinkajkayauayaj itekipanojkauan Jehová akin itech melajkanemiyaj. Sakin kijtoua ika Jehová kinpopolos akin xkuajli tlajtouaj. Yejuin salmo techititia ika itlajtol Jehová chipauak, ika yejon, uelis tikneltokaskej ika Jehová kinpaleuis itekipanojkauan.
Kuakon, tlaxelojli 7 kijtoua ika Jehová kinpaleuis tlaltikpakchanejkej akin kintlajyouiltiaj, noso, ikalpan.
San ika ¿tleka seki Biblias ijkin kitlajtolkuepaj tlaxelojli 7: “Tejua tikimejyeuas”? Pampa ipan seki copias itech Tlajkuiloltin ika Hebreo ijkon onotlali. San ika, ipan Septuaginta Griega ijkin kijtoua: “Yejua techejyeuas (techtlajpiyas)”. Ompa kinteneujtika akin melajkanemij niman kintlajyouiltiaj. Yejuamej kinmanauiskej “de intech on kenomej tlakamej” (Sal. 12:7, 8). Ipan Tlajkuiloltin ika Hebreo tlen onotlajtolkuep ika arameo, ijkin kijtoua: “Tejua, oh NOTEKO, tikintlajpiyas akin melajkej, tejua nochipa tikimejyeuas intech akin xkuajkualtin”. Yejuin más kuajli techititia ika ipan Salmo 12:7 xtlajtojtika itech itlajtol Jehová.
Yejuin tlaxelojli melak kinpaleuiya akin melajkanemij itech Jehová pampa kimititia ika yejua kinpaleuis.