Maka xmouejkaua, nimantsin xmoapolakti

1. ¿Tleka noneki toapolaktiskej?

¿TIKTLASOJTLA Jehová, akin yomitsmakak monemilis niman nochi tlen kuajli? ¿Tikneki tikititis ika tiktlasojtla? Uelis tikititis tla itech timosentemaka niman timoapolaktia. Ijkuak ijkon tikchiuas, timochiuas ichanejkauj. Tejua tiiyaxka yes, ika yejon, Jehová, akin moTaj niman moamigo, mitsyekanas niman mitstlajpiyas (Sal. 73:24; Is. 43:​1, 2). Noijki, pampa itech timosentemakas niman timoapolaktis, uelis tikchias nochipa tinemis (1 Ped. 3:21).

2. ¿Tlenon tikitaskej ipan yejuin tlamachtijli?

² Aman tej, kanaj tejua xetimoapolaktia pampa itlaj mitstsakuilia. Tla ijkon, maka xmajmana, xsan tejua ijkon mopan nochiua. Melak miyekej tlaltikpaktlakamej yononek kipatlaskej tlen kichiuaj niman ken tlanemiliaj para uelis noapolaktiskej, niman aman kuajli kitekichiuilijtokej Jehová niman melak yolpakij. Ipan yejuin tlamachtijli titlajtoskej itech sekimej tlaltikpaktlakamej akin onoapolaktijkej ipan kachtopa siglo. Tikitaskej tlenon okixnamikkej niman tlenon okinpaleui manoapolaktikan. Maski tla yetiueuentsin noso titelpochtli, kuajli xkitstiuj tlenon tiueli itech tlen okichiujkej.

ONOAPOLAKTIJKEJ SAMARITANOS

3. ¿Tlenon ononek kichiuaskej samaritanos niman ijkon uelis noapolaktiskej?

³ Ipan itonaluan Jesús, akin chantiyaj iyeualiujyan Siquem niman Samaria, tlen onkatkaj ika tlakpak itech Judea, kipiayaj inreligión niman kintokayotiayaj samaritanos. Tla samaritanos kinekiyaj noapolaktiskej, nonekiya más kuajli kixmatiskej iTlajtol toTajtsin pampa yejuamej kinemiliayaj ika san amoxtin Génesis hasta Deuteronomio, niman kanaj amoxtli Josué, ualeuayaj itech toTajtsin. Noijki, tla kinekiyaj noapolaktiskej, nonekiya kineltokaskej ika Jesús yejua katka Mesías. Yejuamej kimatiyaj tlen yokijtojka toTajtsin ipan Deuteronomio 18:​18, 19, ika yejon, kema kichiayaj mayejko Mesías (Juan 4:25). Niman “miyekej samaritanos” kema otlaneltokakej itech Jesús (Juan 4:39). Noijki, kanaj sekimej samaritanos ononek nokojtiliskej xok kinchikoitaskej judíos (Luc. 9:​52-54).

4. Ken kijtoua Hechos 8:​5, 6, 14, ¿tlenon okichiujkej sekimej samaritanos ijkuak Felipe okinnojnots?

⁴ ¿Tlenon okinpaleui samaritanos manoapolaktikan? Ijkuak Felipe okinnojnots itech Cristo, sekimej okiselijkej “itemachtil Dios” (xpoua Hechos 8:​5, 6, 14). Maski Felipe judío katka, samaritanos kuajli okikakkej. Kanaj okimilnamikkej seki tlaxeloltin itech Biblia kampa kijtoua ika toTajtsin xtechikoita (Deut. 10:​17-19). Maski san kenijki, yejuamej “kuelkakiyaj on tlajtlamach yejuan Felipe kijtouaya” itech Cristo. Okineltokakej ika toTajtsin okuajtitlanka Felipe pampa yejua noijki okinchiuj milagros, okinpajti akin kualoj niman okintekixtili demonios (Hech. 8:7).

5. ¿Tlenon tiueli itech samaritanos?

⁵ Samaritanos ueliskia xkinekiskej kikakiskej Felipe pampa judío katka noso xkineltokaskej pampa xkeman kikakiyaj tlen temachtiaya. San ika, yejuamej xijkon okichiujkej. Biblia kijtoua ika “ijkuak okineltokakej on kuajli tlajtojli yejuan kiteijlia ken Dios temakixtia” niman itech “JesuCristo yejuan Felipe temachtiaya”, nimantsin onoapolaktijkej (Hech. 8:12). ¿Niman tejua? ¿Kuajli tikneltoka ika iTlajtol toTajtsin yejon tlen melauak? ¿Tikneltoka ika iteixpantijkauan Jehová notlasojtlaj ijkon ken Jesús okijto ika notlasojtlaskiaj akin melauak inomachtijkauan yeskiaj? (Juan 13:35). Tla kema, kuakon maka xmouejkaua, nimantsin xmoapolakti. Kuajli xmatsto ika Jehová mitsteochiuas.

6. ¿Tlenon mitsmachtia tlen okichiuj Ruben?

⁶ Ruben, akin chanti Alemania, okiskaltijkej ichanejkauan akin iteixpantijkauan Jehová, san ika, ijkuak otelpochtiak opeuj notlajtoltia tla yemelak nemi toTajtsin. ¿Tlenon okipaleui makimati ika melauak nemi toTajtsin? Yejua okajsikamat ika nonekiya más kuajli nomachtis. Yejua kijtoua: “Opeuj kuajli ninomachtia para nikmatis tlen ninotlajtoltiaya. Miyekpa oninomachti itech evolución”. Ruben okiamapouj libro ¿Existe un Creador que se interese por nosotros?, niman yejon okipaleui más matlaneltoka itech toTajtsin. Ruben kijtoua: “Nikilnamiki ika ijkin onikijto: ‘¡Guau! Jehová yemelak nemi’”. Noijki, Ruben oyaj otlaixmatito oficina kampa noyekanaj nochi sucursales niman melak omojkatlachix ijkuak okitak ika itekipanojkauan Jehová san sekan nemiyaj maski ualeuayaj itech tlatlamantikej países. Kuakon, onoapolakti ijkuak onokuep Alemania, ijkuak kipiaya 17 xiuitl. Tla tejua xmás tikneltoka ika melauak tlen kijtoua Biblia, xtejtemo tlen timotlajtoltia ipan toamatlajkuiloluan. On tlen melauak uelis mitspaleuis maka sa xometlamati (Efes. 4:​13, 14). Niman ijkuak tikakis kenijki nochimej iteixpantijkauan Jehová melak notlasojtlaj niman ijkuak tikitas ika tokniuan ipan motlanechikol melak kuajli nouikaj, más tiktlasojkamatis ika tinemi ipan ikalpan Jehová.

ONOAPOLAKTI SAULO DE TARSO

7. ¿Tlenon nonekiya kipatlas Saulo?

⁷ Matontlanemilikan itech Saulo de Tarso. Yejua katka se judío akin melak kixmatiyaj niman ueliskia melak ueyixtoskia (Gál. 1:​13, 14; Filip. 3:5). Ipan yejon tonaltin, miyekej judíos kinemiliayaj ika akin tlaneltokayaj itech Cristo kixnamikiyaj ikalpan toTajtsin, ika yejon, Saulo kintlaueltokatinemiya. Yejua kinemiliaya ika kichiujtoya tlen toTajtsin kuelita (Hech. 8:3; 9:​1, 2; 26:​9-11). Kuakon, tla yejua peuaya tlaneltokaya itech Jesús niman noapolaktiaya, nonekiya kinektos makitlaueltokakan.

8. a) ¿Tlenon okipaleui Saulo manoapolakti? b) Ijkon ken kijtoua Hechos 22:​12-16, ¿kenijki Ananías okipaleui Saulo? (Noijki xkita tlaixkopinajli).

⁸ ¿Tlenon okipaleui Saulo manoapolakti? Ijkuak Jesús okinots Saulo desde ne iluikak, se tlauijli okichiuj maka sa matlachia (Hech. 9:​3-9). Yeyi tonajli xotlakua, niman kanaj ipan yejon tonaltin tlanemilijtoya itech tlen ipan yopanoka. Saulo kuajli okineltokak ika Jesús katka Mesías niman ika akin tlaneltokayaj itech Cristo kipiayaj tlaneltokijli tlen melauak. Noijki kanaj melak onotlajtlakolti pampa otlapaleui makimiktikan Esteban (Hech. 22:20). Ijkuak yopanoka yeyi tonajli ika Jesús okinots Saulo, Ananías, se inomachtijkauj Jesús, okitato. Niman okiyemankanots, okipajti niman okiyolchikauj nimantsin manoapolakti (xpoua Hechos 22:​12-16). Saulo onoyolyemanili niman okinek makipaleui Ananías niman okinek noapolaktis (Hech. 9:​17, 18).

9. ¿Tlenon tiueli itech Saulo?

⁹ Tlen okichiuj Saulo melak miyek techmachtia. Yejua ueliskia noueyimatis noso ueliskia nomojtis niman xnoapolaktis. San ika, xijkon opanok. Ijkuak okajsikamat tlen melauak itech Cristo, onoyolyemanili niman okinek nopatlas (Hech. 26:​14, 19). Yejua okinek kichiuas ken Cristo maski kimatstoya ika kitlaueltokaskiaj (Hech. 9:​15, 16; 20:​22, 23). Niman ijkuak yonoapolaktijka, ok kimatstoya ika Jehová kipaleuiskia maski san tlenon kixnamikiskia (2 Cor. 4:​7-10). Ijkuak tejua timoapolaktis ken iteixpantijkauj Jehová, kanaj tikinpiyas tetlatlatalistin noso kanaj mitstlaueltokaskej, san ika, xsan moselti tinemis. Jehová niman Jesús nochipa mouan nemiskej niman mitspaleuiskej (Filip. 2:13).

10. ¿Kenijki mitspaleuiya tlen ipan onochiuj Anna?

¹⁰ Matikitakan tlen ipan onochiuj Anna, yejua chanti Europa del Este niman onoskalti ipan se familia kurda. Sakin ika inan onoapolakti, Anna opeuj nomachtia Biblia ijkuak kipiaya 9 xiuitl pampa itaj yokikauilijka. Yejuamej chantiyaj san ipan se kajli imiuan nochimej inchanejkauan. Niman ijkuak ichanejkauan Anna okimatkej ika nomachtijtoya Biblia imiuan iteixpantijkauan Jehová, opeuj kitlauelitaj. Yejuamej kinemiliayaj ika melak tepinaujti tla se inchanejkauj kikauaya inreligión inuejkachanejkauan. Ijkuak Anna kipiaya 12 xiuitl, otlajto iuan itaj pampa kinekiya noapolaktis. Itaj okitlajtolti tla yemelak yejua kinekiya noapolaktis noso tla san kichiualtijtoyaj. Yejua ijkin okinankili: “Melak niktlasojtla Jehová”. Kuakon itaj okikauili manoapolakti. Sakin ika onoapolakti, ichanejkauan Anna ok kiuejuetskiliayaj niman xkuajli tlen kichiuiliayaj. Se ichanejkauj ijkin okijli: “Melak xkuajli ika tiiteixpantijkauj Jehová, más kuajli tinemiskia tla tiauilnemiskia niman tipokiskia”. ¿Kenijki otlaxiko Anna? Yejua kijtoua: “Jehová onechkojtili. Niman nonan niman notaj noijki melak onechpaleuijkej”. Anna kipiya se lista kampa okijkuilojtia kemanon okipaleui Jehová niman miyekpa kita yejon lista para xkilkauas kenijki yokipaleui. Tla tejua mitsmojtia mamitstlaueltokakan, xkilnamiki ika Jehová noijki uelis mitspaleuis (Heb. 13:6).

ONOAPOLAKTI CORNELIO

11. ¿Kanaj tlenon ueliskia kiteltis Cornelio manoapolakti?

¹¹ Aman matitlajtokan itech Cornelio. Yejua “tlayekanki katka ika se ciento soldados” (Hech. 10:1). Kuakon, uelis tikijtoskej ika soldados melak kitlakaitayaj niman kampa chantiya noijki melak kitlakaitayaj. Biblia noijki kijtoua ika Cornelio “kinpaleuiyaya on hebreos mayankej” (Hech. 10:2). Jehová okititlan apóstol Pedro niman ijkon makinojnotsati Cornelio itech on kuajli tlajtoltin. ¿Tlenon okichiuj Cornelio? ¿Xokinek nimantsin noapolaktis pampa melak ueyixtoya?

12. ¿Tlenon okipaleui Cornelio manoapolakti?

¹² ¿Tlenon okipaleui Cornelio manoapolakti? Biblia kijtoua ika yejua niman ichanejkauan kitlakaitayaj toTajtsin niman noijki “nochipa kichiuaya oración itech Dios” (Hech. 10:2). Ijkuak Pedro okitlajtlatouili itech on kuajli tlajtoltin, Cornelio niman ichanejkauan otlaneltokakej itech Cristo niman nimantsin onoapolaktijkej (Hech. 10:​47, 48). Uelis tikijtoskej ika Cornelio kinektoya nopatlas para ijkon yejua niman ichanejkauan ueliskiaj san sekan kiueyichiuaskej Jehová (Jos. 24:15; Hech. 10:​24, 33).

13. ¿Tlenon mitsmachtia tlen okichiuj Cornelio?

¹³ Cornelio melak ueyixtoya ijkon ken Saulo, niman yejon ueliskia kichiuas maka makineki manoapolakti. San ika, xijkon opanok, yejua onoapolakti. ¿Niman tejua? ¿Noneki itlaj tikpatlas tlen melak ueyi para uelis timoapolaktis? Tla ijkon, kuajli xmatsto ika Jehová mitspaleuis. Yejua kiteochiuas nochi kech timokojtilia para tiktlakamatis tlen kijtoua Biblia.

14. ¿Kenijki mitspaleuiya tlen ipan opanok Tsuyoshi?

¹⁴ Tsuyoshi, akin chanti Japón, ononek itlaj kipatlas ipan itekiyo niman ijkon uelis noapolaktis. Yejua kipaleuiaya akin tlayekana ipan se escuela tlen itoka Ikenobo kampa kinmachtiaj kenijki kinyekchiuaskej xochimej. Akin ompa tlayekana yaya kampa omikouak, noso, omikilok, niman kimitkiya xochimej niman kichiuaya tlen kichiuaj budistas ijkuak yakaj miki. Ijkuak yejua xueliya yaya, kontitlaniya Tsuyoshi niman ijkon makichiuati tlen kichiuaj budistas. San ika, ijkuak Tsuyoshi okimat tlen kijtoua Biblia itech mijkamej, okajsikamat ika xueliskia noapolaktis tla ok kichiuaya yejon, kuakon, okikajkauj ika ijkon kichiua (2 Cor. 6:​15, 16). Tsuyoshi okijli akin tlayekana ipan escuela ika xok ueliskia kichiuas tlen kichiuaj budistas ijkuak yakaj miki, niman yejua okikauili ok ompa matekitito maski xok kichiuaskia yejon. Tsuyoshi onoapolakti kanaj se xiuitl sakin ika opeuj nomachtia Biblia.a Tla tejua noijki noneki itlaj tikpatlas ipan motekiyo niman ijkon tikyolpaktis toTajtsin, kuajli xmatsto ika toTajtsin xmitskauas niman tejua iuan mochanejkauan xtlaj mechpolos (Sal. 127:2; Mat. 6:33).

ONOAPOLAKTIJKEJ CORINTIOS

15. ¿Tleka ouijtika katka manoapolaktikan corintios?

¹⁵ Yeuejkaui, tlaltikpakchanejkej akin chantiyaj Corinto kimixmatiyaj ken akin melak kuelitayaj kipiyaskej tomin niman ika melak auilnemiyaj. Miyekej corintios kichiuayaj tlen Jehová kitlauelita. Kuakon, melak ouijtika katka ika akin chantiyaj Corinto mapeuakan makitekichiuilikan Jehová. San ika, ijkuak apóstol Pablo oajsik ipan yejon kalpan niman okinnojnots itech on kuajli tlajtojli itech Cristo, miyekej corintios kuajli okikakkej niman onoapolaktijkej (Hech. 18:​7-11). Jesucristo hasta okinoititi Pablo ipan se tlatlachalistli niman ijkin okijli: “Miyek tlakatl noyaxkauan ipan in ueyikalpan”. Kuakon, apóstol Pablo ompa onokauj tenojnotstinemiya se xiuitl uan tlajko.

16. ¿Tlenon okinpaleui corintios manoapolaktikan? (2 Corintios 10:​4, 5).

¹⁶ ¿Tlenon okinpaleui corintios manoapolaktikan? (Xpoua 2 Corintios 10:​4, 5). ToTajtsin okitekitilti iTlajtoltsin niman iespíritu santo para kinpaleuis manopatlakan (Heb. 4:12). Corintios akin okiselijkej on kuajli tlajtojli ouelkej okikaujkej nochi tlen xkuajli kichiuayaj, xok tlauaniyaj, xok tlachtekiyaj niman xok kimileuiayaj intlakaikniuan noso insiuaikniuan (1 Cor. 6:​9-11).b

17. ¿Tlenon mitsmachtia tlen okichiujkej corintios?

¹⁷ Melauak, sekimej corintios ononek melak nopatlaskej niman ijkon uelis noapolaktiskej, san ika, yejuamej xokinemilijkej tla xueliskia nopatlaskej. Yejuamej melak onokojtilijkej niman ijkon nejnemiskej ipan ojtli tlen teuika ipan nemilistli tlen xkeman tlamis (Mat. 7:​13, 14). ¿Niman tejua? ¿Timokojtilijtika tikajkauas itlaj tlen desde yeuejkaui xkuajli tikuajchiujtiuj? Tla ijkon, ¡maka xmosiaujkaua! Xtlajtlanili Jehová mamitspaleui ika iespíritu santo maka sa xneki xchiua tlen xkuajli.

18. ¿Kenijki mitspaleuiya tlen okichiuj Monika?

¹⁸ Monika, akin chanti Georgia, melak onokojtili ijkuak ichpochtsintli katka para xok tlauijuikaltis niman xok noyolpaktis ika tlen xkuajli pampa kinekiya noapolaktis. Yejua kijtoua: “Teoyotl melak onechkojtili. Jehová kimatiya ika nejua niknekiya nikchiuas tlen kuajli, yejua nochipa ompa nemiya para nechpaleuis niman nechyekanas”. Monika onoapolakti ijkuak kipiaya 16 xiuitl. ¿Tejua noijki noneki itlaj tikajkauas niman ijkon tikyolpaktis Jehová niman tiktekichiuilis? Tla kema, nochipa xtlajtlanilijto iespíritu santo tlen mitspaleuis xmopatla, niman yejua mitsmakas (Juan 3:34).

MOTLANELTOK UELIS KIMEJKUANIS TEPEMEJ

19. ¿Tlenon mitspaleuis tla tikixnamiktok itlaj tlen melak ueyi ijkon ken se tepetl? (Noijki xkita tlaixkopinajli).

¹⁹ Maski san tlenon xkixnamikto tlen kichiua ouijtika xmoapolakti, kuajli xmatsto ika Jehová mitstlasojtla niman kineki xmochiua ichanejkauj. Jesús ijkin okimijli sekimej inomachtijkauan: “Tla nemotlaneltok ijkon ken iteyo mostaza, uelis nenkijliskej yejuin tepetl ‘Neka xuiya’, niman nejkuanis; nochi uelis nenkichiuaskej” (Mat. 17:20). Yejon inomachtijkauan san seki xiujtin yonenkaj iuan Jesús, kuakon, ok nonekiya kichikaujtiaskej intlaneltok. Niman Jesús okimijli ika tla kichikauayaj intlaneltok, Jehová kinpaleuiskia makejkuanikan tlen kixnamikiskiaj maski melak uejueyimej yeskiaj ijkon ken tepemej. ¡Niman tejua noijki mitspaleuis!

20. ¿Kenijki mitspaleuiyaj neskayomej tlen yotikimitakej ipan yejuin tlamachtijli?

²⁰ Tla tejua itlaj tikixnamiktika tlen xmitskauilia timoapolaktis, nimantsin xkita tlenon uelis tikchiuas. Ken yotikitakej, onokej miyek neskayomej itech tokniuan ipan kachtopa siglo niman tokniuan ipan yejuin tonaltin tlen uelis mitsyolseuiskej niman mitsyolchikauaskej. Tla titlanemilia itech yejuin neskayomej, yejon mitspaleuis xmoyolchikaua xmosentemaka itech Jehová niman xmoapolakti. Tla ijkon tikchiua, ¡yejon tlen más mitsyolpaktis ipan nochi monemilis!