Matitlanemilikan ken Jehová niman Jesús

1, 2. a) ¿Kenijki noneki tiktlasojtlaskej Jehová? b) ¿Kenijki okiteititi Jesús ika kitlasojtlaya Jehová ika nochi itlamachilis?

JESÚS kuajli kimatstoya katlejua tlanauatijli más nonekiya manotlakamati itech Tlanauatijli tlen okimakakej Moisés, yejua okijto: “Xtlasojtla Jehová moTajtsin ika nochi moyojlo, ika nochi moalma, ika nochi motlamachilis niman ika nochi mokojtilis” (Mar. 12:30). Kuakon, noneki tiktlasojtlaskej Jehová ika nochi tonemilis. Yejuin kijtosneki ika noneki tiktlasojtlaskej ika nochi tlen tikpiyaj: ika tlen tikileuiyaj, ika tlen tikmachiliaj niman ika tokojtilis. Noijki noneki tiktlasojtlaskej ika totlamachilis, kuakon noneki tikitaskej kenijki titlanemiliaj. Tejuamej tiknekij titlanemiliskej ken Jehová pampa tiktlasojtlaj. Tikmatstokej ika xkeman uelis kuajli tikajsikamatiskej kenijki tlanemilia Jehová. San ika, uelis tikitaskej “tlinon Cristo kinemilia”, pampa yejua kuajli kimatstok kenijki tlanemilia iTaj niman ueli tlanemilia ken yejua (1 Cor. 2:16).

² Jesús kitlasojtlaya Jehová ika nochi itlamachilis. Yejua kuajli kimatstoya tlenon kinekiya Jehová makichiua niman kinektoya kitlakamatis maski tlajyouiskia. Yejua nochipa kinemilijtoya kenijki kiyolpaktis iTaj, ika yejon, xitlaj okse kinemilijtoya.

3. ¿Tlenon ouel Pedro itech Jesús, niman tlenon okimijli tokniuan ipan iamatlajkuilol? (1 Pedro 4:​1, TNM).

³ Pedro niman oksekimej apóstoles okitakej kenijki tlanemiliaya Jesús pampa iuan kistinemiyaj. Ijkuak Pedro okijkuilo kachtopa iamatlajkuilol, okimijli tokniuan makinotlalilikan itlanemilil Cristo (xpoua 1 Pedro 4:​1, TNM).a Tlajtojli “Xmotlalilikan” tlen Pedro okitekitilti, kitekitiltiayaj soldados para kijtoskej ika kinotlaliliayaj tlen ika ontlaixnamikiyaj ipan guerra. Kuakon, Pedro kinekiya kijtos ika tla titlanemiliaj ken Cristo, kentla titotlaliliskiaj tlen ika tikixnamikiskej tlen xkuajli tikileuiyaj niman nochi tlen kiyekana Satanás ipan in tlaltikpaktli (2 Cor. 10:​3-5; Efes. 6:12).

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli, tikitaskej kenijki tlanemilia Jesús niman kenijki uelis titlanemiliskej ken yejua. Tikitaskej kenijki uelis titlanemiliskej ken Jehová, kenijki tiyolyemankej yeskej niman kenijki kuajli titlanemiliskej.

MATITLANEMILIKAN KEN JEHOVÁ

5. Xkijto kemanon okiteititi Pedro ika xtlanemilijtoya ken Jehová.

⁵ Matikitakan ijkuak Pedro okiteititi ika xtlanemiliaya ken Jehová tlanemilia. Jesús okimijli iapóstoles ika nonekiya yas Jerusalén niman ika ompa akin tlayekanayaj ipan tlaneltokiltin kajsiskiaj, kitlajyouiltiskiaj niman kimiktiskiaj (Mat. 16:21). Pedro kimatstoya ika Jesús yejua katka Mesías akin yonoijtojka ika uajlaskia para kimakixtis ikalpan toTajtsin, ika yejon, kanaj ouijtika okitak kineltokas ika Jehová kitekauiliskia makimiktikan Jesús (Mat. 16:16). Yejua ika, Pedro oksekan okuikak Jesús niman okijli: “¡NoTeko, xmokneli! Yejon xkeman mopan nochiuas” (Mat. 16:22). Pedro niman Jesús xsan noijki otlanemilijkej pampa Pedro xtlanemilijtoya ken Jehová.

6. ¿Kenijki okiteititi Jesús ika tlanemiliaya ken Jehová?

⁶ Jesús tlanemiliaya ken iTaj iluikakchane. Ika yejon, ijkin okijli Pedro: “¡Neka xuiya Satanás! San tinechtsatsakuilia. Pampa xtitlanemilijtika ken toTajtsin, titlanemilijtika ken se tlakatl” (Mat. 16:23). Jesús kimatstoya ika tla kinekiya kichiuas tlen Jehová kinekiya, tlajyouiskia niman mikiskia. Ika yejon, xokinek kikakis tlen okijli Pedro, maski kanaj yejua san kinekiya kipaleuis. Apóstol Pedro okajsikamat ika nonekiya tlanemilis ken Jehová. ¡Tejuamej noijki noneki titlanemiliskej ken Jehová!

7. ¿Kenijki okiteititi Pedro ika nokojtilijtoya tlanemilis ken Jehová? (Xkita tlaixkopinajli).

⁷ Sakin, Pedro okiteititi ika nokojtilijtoya tlanemilis ken Jehová tlanemilia. ToTajtsin yokijtojka ika yeueliskia kinselis ipan ikalpan tlaltikpakchanejkej itech okseki kalpamej. Ika yejon, okijli Pedro makinojnotsati Cornelio, akin xjudío katka, niman yejua yeskia akin kachtopa tlaneltokaskia itech Cristo. Judíos xkinnotsayaj akin xjudíos katkaj, kuakon Pedro kanaj ouijtika kitaskia kinojnotsaskia Cornelio. San ika, ijkuak Pedro okajsikamat ika yejon tlen kinekiya Jehová, okipatlak ken tlanemiliaya. Ijkuak Cornelio okijli Pedro makitlajpaloti, yejua oyaj niman xtlaj okijto (Hech. 10:​28, 29). Pedro okinojnots Cornelio niman akin imiuan chantiya, niman onoapolaktijkej (Hech. 10:​21-23, 34, 35, 44-48).

8. ¿Kenijki tikteititiaj ika titlanemiliaj ken Jehová? (1 Pedro 3:​8, TNM).

⁸ Seki xiujtin sakin, Pedro ijkin okimijli tokniuan: “Nemochimej san noijki xtlanemilikan” (xpoua 1 Pedro 3:​8, TNM).b Akin tiiteixpantijkauan Jehová melak noneki matitlanemilikan ken Jehová para ijkon tinochimej san noijki titlanemiliskej. ¿Niman kanon uelis tikitaskej kenijki tlanemilia Jehová? Ipan iTlajtol. San matikonteneuakan yejuin: ipan Mateo 6:​33, Jesús okimijli inomachtijkauan kachtopa makitlakamatikan Jehová ipan innemilis. Matikonnemilikan ika se tokniuj ipan totlanechikol peua tekiti ken precursor noso kipiya okse tekitl ipan ikalpan Jehová. ¿Tikchiuaskiaj ken Pedro niman tikijliskiaj ika ueliskia itlaj okse kichiuas? Ka, tejuamej xijkon tikijliskiaj. Tejuamej yej tikijliskiaj ika melak kuajli tlen okitlapejpeni, niman ika tla kemantika nonekis, uelis tikpaleuiskej.

MATIYOLYEMANKEJ

9, 10. ¿Kenijki okiteititi Jesús ika yolyemanki katka?

⁹ Se yeuajli achto ika kimiktiskiaj Jesús, yejua okimachti Pedro niman oksekimej iapóstoles ika melak nonekiya yolyemankej yeskej. Jesús yokijlijka Pedro niman Juan matlayektlalikan niman ijkon sa ika tlami tlakuaskia imiuan inomachtijkauan achto kimiktiskiaj. Kanaj Pedro niman Juan ompa okitlalijkej se uajkajli niman tlakentin para makiminikxijpajpakakan akin ontlakuaskiaj. San ika ¿akinon teikxipajpakaskia?

¹⁰ Yejuin tekitl kichiuaya se tlakeuajli. San ika, aman Jesús yejua akin oteikxipajpak. ¡San xkonnemili kenijki omojkatlachixkej iapóstoles ijkuak okitakej ika okinokixtili itlakenpani, onotlajkosalo ika se tlakentli, okitekak atl ipan uajkajli niman opeuj kiminikxipajpaka! (Juan 13:​4, 5). ¡San xkonnemili kech ouejkauj Jesús para kichiuas nochi yejuin! Okimiikxipajpak 12 apóstoles, hasta Judas, akin sakin kitemaktiliskia. ¡Jesús okiteititi ika melak yolyemanki katka! Sakin, ijkin kualtsin okimijli iapóstoles: “¿Nenkasikamatij tleka ijkon onikchiuj? Nemejuamej nennechijliaj Maestro niman noTeko, niman yejon melauak, pampa nejua nimechmachtia niman ninemoTeko. Yejua ika, tla nejua, akin ninemoTeko niman nemoMaestro, yonimechikxipajpak, nemejuamej noijki noneki nemokxipajpakaskej” (Juan 13:​12-14).

11. ¿Kenijki okiteititi Pedro ika yeyolyemanki katka? (1 Pedro 5:5; noijki xkita tlaixkopinajli).

¹¹ Pedro ouel itech Jesús kenijki tiyolyemanki yes. Ijkuak Jesús yonokuepka iluikak, Pedro okipajti ika se milagro se tlakatl akin xueliya nejnemiya desde ijkuak ouajnen (Hech. 1:​8, 9; 3:​2, 6-8). Tlen okichiuj Pedro melak miyekej okinmojkatlachialti (Hech. 3:11). ¿Tlenon kichiuaskia Pedro? Matikilnamikikan ika judíos melak kuelitayaj makinueyiteneuakan. ¿Kuelitaskia Pedro makiueyiteneuakan? Ka, yejua onoyolyemanili niman okijto ika Jehová niman Jesús yejuamej akin okipajtijkaj yejon tlakatsintli. Sakin okijto: “San ikan itokatsin Jesús, niman itechkopa totlaneltok itech itokatsin, in tlakatl yejuan nemejuamej nenkitaj niman nenkixmatij, opajtik ipan ikxiuan” (Hech. 3:​12-16). Sakin, ipan se icarta, Pedro okimijli tokniuan tleka melak nonekiya yolyemankej yeskej. Ika tlajtojli griego, Pedro okitekitilti seki tlajtoltin tlen kiteajsikamachiltiaj ika noneki titotlakentiskej ika yolyemanilistli. Yejuin techilnamiktia ijkuak Jesús onotlajkosalo ika se tlakentli niman okimiikxipajpak iapóstoles (xpoua 1 Pedro 5:5).

12. ¿Kenijki uelis tiyolyemankej yeskej ken Pedro?

¹² Ijkon ken Pedro, tejuamej noijki uelis tiyolyemankej yeskej. San ika, yakaj xsan nesi ika yolyemanki ika tlen kijtoua. Kuakon, ¿tlenon kichiua yakaj akin yolyemanki? Xkinemilia ika ueyixtika. Ipan 1 Pedro 5:​5, ijkuak kiteneua tlajtojli “yolyemanilistli”, kiteneujtika kenijki yakaj tlanemilia itechkopa niman intechkopa oksekimej. Tejuamej titepaleuiyaj pampa tiktlasojtlaj Jehová niman tlaltikpaktlakamej niman xpampa tiknekij matechueyiteneuakan. Tla ika toyojlo tiktekichiuiliaj Jehová niman tikinpaleuiyaj tokniuan maski miyekej xtechitaj, tikteititiskej ika yemelak tiyolyemankej (Mat. 6:​1-4).

KUAJLI MATITLANEMILIKAN

13. ¿Tlenon kijtosneki ijkuak Biblia kijtoua “kuajli xmonemilikan”, noso, “kuajli xtlanemilikan”?

¹³ ¿Tlenon kijtosneki ijkuak Biblia kijtoua “kuajli xmonemilikan”, noso, “kuajli xtlanemilikan”? (1 Ped. 4:7). Kijtosneki tiktlapejpeniskej tlen makiteititi ika titlanemiliaj ken Jehová. Noijki kijtosneki ika ken touikaj iuan Jehová yejon tlen más tikpatiojkaitaj ipan tonemilis. Kuakon, tla kuajli titlanemiliaj, xtiknemiliskej ika melak tiuejueyixtokej noso ika nochi tikmatstokej. Noijki, ika yolyemanilistli, miyekpa tikijliskej Jehová matechpaleui.c

14. Xkijto ijkuak Pedro xonopaleui itech Jehová.

¹⁴ Se yeuajli achto mikis Jesús, okimijli inomachtijkauan: “Yejuin yeuajli nochimej nemejuamej nemopopoloskej san nopampa”. Niman Pedro nion xoometlamat ijkuak ijkin okijto: “Maski nochimej nopopoloskej san mopampa, ¡nejua xkeman ninopopolos!”. Yejon yeuajli Jesús ijkin okimijli inomachtijkauan: “Xtlatlachixtokan niman xchijtokan oración” (Mat. 26:​31, 33, 41). Tla Pedro kikakiskia tlen okijto Jesús, kanaj noyolchikauaskia kijtos ika yejua katka inomachtijkauj. San ika, pampa xokitlakamat, okiteijli ika xkixmatiya iTeko. . . ¡niman yejon melak okiyolkoko! (Mat. 26:​69-75).

15. ¿Tlenon okipaleui Jesús kuajli matlanemili ipan yejon yeuajli achto mikis?

¹⁵ Jesús nochipa onopaleui itech Jehová. Maski yejua xtlajtlakole katka, miyekpa okichiuj teoyotl ipan yejon yeuajli achto mikis. Ika yejon, ouel onoyolchikauj para kichiuas tlen iTaj kinekiya (Mat. 26:​39, 42, 44; Juan 18:​4, 5). Pedro okitak kenijki Jesús melak miyekpa okichiuj teoyotl, niman yejon xkeman okilkauj.

16. ¿Kenijki okiteititi Pedro ika kuajli tlanemiliaya? (1 Pedro 4:7).

¹⁶ Sakin, Pedro ouel kenijki nopaleuis itech Jehová ika teoyotl. Sakin ika Jesús oyoliuj, yejua okimijli Pedro niman oksekimej apóstoles ika kiseliskiaj espíritu santo niman ijkon ueliskiaj tenojnotsaskej. San ika, okimijli ika chika kichiayaj ijkon mapano, nonekiskia tlamachiaskej Jerusalén (Luc. 24:49; Hech. 1:​4, 5). ¿Tlenon okichiuj Pedro chika tlamachiaya? Biblia kijtoua ika yejua niman oksekimej tokniuan mojmostla “kichiuayaj oración” (Hech. 1:​13, 14). Sakin, ipan kachtopa iamatlajkuilol, okimijli tokniuan ika nonekiya kuajli tlanemiliskej niman nopaleuiskej itech Jehová ika teoyotl (xpoua 1 Pedro 4:7). Pedro ouel kenijki nopaleuis itech Jehová, ika yejon, ouel okinpaleui niman okinyolchikauj tokniuan (Gál. 2:9).

17. ¿Tlenon noneki nochipa tikchiuaskej? (Noijki xkita tlaixkopinajli).

¹⁷ Tla tiknekij kuajli titlanemiliskej, melak noneki matikchiuilikan teoyotl Jehová. Nochipa noneki tiktlajtlaniliskej matechyekana, maski kemantika nesi ika xouijtika tlen tikchiuaskej. Niman más tiktlajtlaniliaj matechpaleui ijkuak tiktlapejpeniaj itlaj tlen melak ueyi kijtosneki pampa tikmatstokej ika yejua kimatstika tlenon más techpaleuis.

18. Ijkon ken Pedro, ¿tlenon uelis tikchiuaskej?

¹⁸ Melak tiktlasojkamatij ika Jehová okichiuj matiuelikan matikinpiyakan ikualneskayouan (Gén. 1:26). Tikmatstokej ika xuelis kuajli tikixkopinaskej Jehová (Is. 55:9). San ika, ijkon ken Pedro, uelis titomajmachtiskej titlanemiliskej ken Jehová, tiyolyemankej yeskej niman kuajli titlanemiliskej.