¿Iteixpantijkauan Jehová se secta?
Ka, iteixpantijkauan Jehová xse secta. Tejuamej ticristianos pampa tochikauaj tikchiuaskej ken Cristo niman tikyejyekouaj tinemiskej ken yejua otemachti.
¿Tlenon kijtosneki secta?
Miyek tlemach nonemilia itech tlen kijtosneki tlajtojli secta. Matikitakan ome tlemach niman ijkon tikmatiskej tleka iteixpantijkauan Jehová xse secta.
Sekimej kinemiliaj ika se secta kijtosneki se yenkuik tlaneltokijli tlen okis itech okse tlen noixmatstika. Tiiteixpantijkauan Jehová xotikpeualtijkej se yenkuik tlaneltokijli. Tejuamej tikchiuaj ken okichiujkej inomachtijkauan Cristo niman tiktlakamatij tlen Jesús otemachti, nochi yejuin tiknextiaj ipan Biblia (2 Timoteo 3:16, 17). Tikneltokaj ika ipan iTlajtol toTajtsin, Biblia, ompa tiknextiaj kenon noneki tikueyichiuaskej toTajtsin.
Sekimej kinemiliaj ika se secta kijtosneki se grupo akin kichiuaj tlen xkuajli niman nosentemakaj itech se tlakatl akin kinyekana. Tiiteixpantijkauan Jehová xtosentemakaj itech se tlakatl noso se siuatl ken tlayekanketl. Tejuamej tiktlakamatij tlen Jesús okimijli inomachtijkauan, ijkuak okijto: “San nejua niCristo [...], ninemotlayekankau” (Mateo 23:10).
Tiiteixpantijkauan Jehová xtikchiuaj tlen xkuajli, tiktejtemouaj tikchiuaskej tlen techpaleuiya ipan tonemilis niman ipan innemilis oksekimej tlaltikpakchanejkej. Matikteneuakan seki, kuajli tlajtojli tlen kisa itech Biblia niman tikteijliaj, yokinpaleui melak miyekej tlaltikpakchanejkej makikajkauakan alcohol niman drogas. Noijki, ijkuak titenojnotsaj, tikinmachtiaj oksekimej mauelikan maamapouakan niman matlajkuilokan, yejuin tekitl tikchiuaj ipan nochi tlaltikpaktli. Ipampa yejuin, melak miyekej tlaltikpakchanejkej youelkej amapouaj niman tlajkuilouaj. Noijki titlapaleuiyaj kampa panoua tlen xkuajli. Melak tochikauaj tikchiuaskej tlen kuajli inpampa tlaltikpakchanejkej, ijkon ken Jesús otemachti (Mateo 5:13-16).