¿Tlenon kinemiliaj iteixpantijkauan Jehová itech nochi tlen nochiua ijkuak yakaj miki?
Itech tlen tiknemiliaj niman ken tikchiuaj ijkuak yakaj miki, nokixtia itech tlen temachtia Biblia, ken nesij tlatsintlan:
Kuajli tla tajmanaj ijkuak yakaj akin tiktlasojtlaj miki. Inomachtijkauan Jesús ochokakej ijkuak omijkej inchanejkauan (Juan 11:33-35, 38; Hechos 8:2; 9:39). Ika yejon, tlen nochiua ijkuak yakaj miki xtikitaj ken se iluitl (Eclesiastés 3:1, 4; 7:1-4). Tikitaj ken ijkuak uelis tikteititiskej ika tajmanaj inpampa akin yokipolojkej inchanejkauj (Romanos 12:15).
Akin yomijkej xtlaj kimachiliaj. Maski san kanon tiualeuaj noso san kenon titlachiaj, tikmapeuaj nochi tlen kiteititia ika akin yomijkej ok yoltokej niman uelis itlaj texchiuiliskej, pampa yejon xtemachtia Biblia (Eclesiastés 9:5, 6, 10). Se neskayotl, xtikinuentlaliliaj akin yomijkej, xtikinnotsaj, xtikintlajtlaniliaj itlaj nion xtikimiluichiuiliaj. Niman tejuamej xtikchiuaj nochi yejon pampa tiktlakamatij ijkuak Biblia kijtoua: “Xmoxelokan. Ma ka xmatokakan [noso xkajsikan] on tlen xchipauak” (2 Corintios 6:17).
Akin yomijkej uelis oksejpa nemiskej. Biblia temachtia ika tlayekapan akin yomijkej uelis oksejpa nokuiteuaskej niman yejkos tonajli ijkuak xok onias mikilistli (Hechos 24:15; Apocalipsis [Revelación] 21:4). Pampa tikpiyaj yejuin tlamachialistli, tlen noijki okinpaleui akin kachtopa okichiujkej ken Cristo, xuejkautipan san toyolkokojtokej (1 Tesalonicenses 4:13).
Manoteititi yolyemanilistli (Proverbios 11:2). Tlen nochiua ijkuak yakaj miki xtikitaj ken uelis ika toueyimatiskej niman xtiknekij tikteititiskej ika tikpiyaj miyek tomin (1 Juan 2:16). Ika yejon, nion xtikchiuaj noso xtikouaj miyek tlemach niman ijkon akin ompa yaskej manopaktikan noijki xtikinkuij cajas tlen melak patiojkej noso xtotlakentiaj melak kualtsin niman ijkon oksekimej san matechitakan.
Xtitechiualtiaj makineltokakan tlen tikneltokaj. Tejuamej tikchiuaj tlajtolyekanalistli tlen kijtoua: “Cada se ika onkaj tikijliskej Dios nochi tlen kuajli niman on tlen xkuajli tikchiuaj” (Romanos 14:12). San ika, tla tiuelij, tikyejyekouaj tikteijliskej itech tlen tikneltokaj ika yolyemanilistli niman tetlakaitalistli (1 Pedro 3:15).
¿Kenon kichiuaj iteixpantijkauan Jehová ijkuak yakaj miki?
Kampa nochiua: Ichanejkauan mijkatsintli yejuamej kitlapejpeniskej kenon niman kanon kitokaskej. Uelis notemakas se tlamachtijli ipan Kajli kampa Tosentlaliaj, ipan inkal, kampa kintlatiaj mijkatsitsintin noso kampa komintokaj.
Tlen nochiua: Notemaka se tlamachtijli tlen kisa itech Biblia kampa noijtoua itech mikilistli niman itech yoliuilistli niman ijkon kinyolseuiyaj ichanejkauan mijkatsintli (Juan 11:25; Romanos 5:12; 2 Pedro 3:13). Noijki, ijkuak xikontokaj mijkatsintli uelis noilnamikis tlen kuajli okichiuj niman noijtos tlenon techmachtia iyolmelaujkanemilis (2 Samuel 1:17-27).
Uelis nokuikatiskej se tlakuikajli tlen kisa itech Biblia (Colosenses 3:16). Niman tlami ika se teoyotl tlen teyolchikaua (Filipenses 4:6, 7).
Kech notlaxtlaua: Xnotlajtlani tomin itech tlen nochiua ijkuak yakaj miki nion ipampa okse tlemach. Xkeman notlajtlani tomin ipan totlanechikoluan (Mateo 10:8).
Akin kalakij: Ijkuak nochiua ipan Kajli kampa Tosentlaliaj maski san akinon uelis kalakis, ijkon ken nochiua ipan nochi totlanechikoluan tlen tikinpiyaj. Ika yejon, akin xiteixpantijkauan Jehová uelis yaskej.
¿Yauej iteixpantijkauan Jehová ijkuak yakaj miki niman akin tlayekanaj kipiyaj okse tlaneltokijli?
Yejuin itlaj tlen toselti noneki tiktlapejpeniskej tla yotikmachtijkej totlamachilis itech Biblia (1 Timoteo 1:19). San ika, xtikchiuaj iluitl tlen nochiuaj ipan okseki tlaneltokiltin tlen Biblia xtemachtia (2 Corintios 6:14-17).