¿Se iteixpantijkauj Jehová uelis kikauas ireligión?
Kema. Ika yejuin ome tlemach yakaj uelis kiteititis ika xok kineki yes iteixpantijkauj Jehová:
Yejua kiteijlis. Se iteixpantijkauj Jehová uelis kiteijlis noso kijkuilos ika yejua xok kineki yes iteixpantijkauj Jehová.
Ika tlen kichiua. Se iteixpantijkauj Jehová kanaj uelis peuas kichiuas itlaj tlen kiteititis ika yejua xok kineki nemis ipan ikalpan Jehová (1 Pedro 5:9). Kanaj uelis peuas nosentlalis iuan okse religión niman ijkon kiteititis ika kineki ompa nemis (1 Juan 2:19).
¿Niman tla yakaj xok tenojnotsa noso xok yauj ipan tlanechikoltin, kitaj ken akin xok iteixpantijkauj Jehová?
Ka. Ijkuak yakaj xmás kojtik itlaneltokil xsan noijki kijtosneki ken ijkuak yakaj kiteijlia noso kiteititia ika xok kineki yes iteixpantijkauj Jehová. Miyekej akin achijtsin kikauaj ika kiueyichiuaj Jehová ok tlaneltokaj itech Jehová, san ika, yejuamej melak noyolajmanaj. Ika yejon, tejuamej tikinyolchikauaj niman xtikintlalkauiyaj (1 Tesalonicenses 5:14; Judas 22). Niman tla yejua kineki makipaleuikan niman ijkon kichikauas itlaneltokil, tlayekankej akin nemij ipan itlanechikol kinektoskej kipaleuiskej (Gálatas 6:1; 1 Pedro 5:1-3).
San ika, tlayekankej xkeman kichiualtiaj yakaj akin xok kineki yes iteixpantijkauj Jehová para maka makikaua Jehová. Noneki toseselti tiktlapejpeniskej ipan katlejua religión tinemiskej (Josué 24:15). Akin kitekichiuiliaj toTajtsin noneki ijkon kichiuaskej pampa kisa ipan inyojlo (Salmo 110:3; Mateo 22:37).