Tlen sekimej kineltokaj

Hinduismo

Hindúes kineltokaj ika titlajyouiyaj pampa tiktlaxtlauaj tlen nikan xkuajli otikchiujkej noso ijkuak oksekan tinemiyaj. Niman yejuamej tlaneltokaj itech moksha, kijtosneki ika xok tlajyouiskej pampa xok keman oksejpa uajnemiskej. Niman tla kinekij ijkon inpan mapano, xnoneki makinmajmana tlen panotok ipan yejuin tlaltikpaktli.

Islam

Musulmanes kinemiliaj ika titlajyouiyaj ipampa totlajtlakoluan niman pampa kitlatlataj totlaneltok. Ixtlamatki Sayyid Syeed, akin tlayekana ipan Sociedad Islámica de América del Norte, okijto ika titlajyouiyaj pampa techilnamiktia ika noneki tiktlasojkamachiliskej toTajtsin ipampa tlen techmaka niman ika noneki tikinpaleuiskej akin noneki makinpaleuikan.

Judaísmo

Judíos kineltokaj ika titlajyouiyaj ipampa tlen tikchiuaj. Noijki, sekimej judíos kineltokaj ika ajsis se tonajli ijkuak yoliuiskej akin otlajyouijkej maski xkinamikiya niman ika kinyolseuiskej. San ika, oksekimej judíos kineltokaj ika ijkuak se miki oksejpa uajnemi ipan itlalnakayo yakaj noso ipan itlaj okse niman ijkon uelis kintlaxtlauas itlajtlakoluan.

Budismo

Budistas kineltokaj ika miyekpa tiuajnemij niman ika ijkuak tiuajnemij titlajyouiyaj hasta ijkuak noyektlalia tlen tikileuiyaj, tlen tikchiuaj niman tlen tikmachiliaj. Yejuamej tlaneltokaj itech nirvana tlen kijtosneki ijkuak xok titlajyouis, niman yejuin san uelis inpan panos tla kuajli tlanemiliaj, kuajli tlen kichiuaj niman kuajli kiyekanaj tlen kinemiliaj.

Confucionismo

Diccionario de religiones comparadas, kijtoua ika akin tlaneltokaj ken Confucio kineltokaj ika titlajyouiyaj “ipampa tlen xkuajli kichiuaj tlaltikpakchanejkej”. Kineltokaj ika xok más titlajyouiskej tla tikchiuaj tlen kuajli. San ika, noijki kinemiliaj ika techtlajyouiltiaj espíritus akin melak kojtikej xijkon ken tlaltikpakchanejkej. Kuakon, san noneki tikseliskej tlen topan nochiuas.

Religiones tribales

Miyekej religiones kijtouaj ika tlajyouiyaj pampa kinnaualuiyaj. Sekimej kinemiliaj ika nanaualtin uelis kichiuaskej ika kuajli manemikan noso matlajyouikan niman ika uelis notlatsakuiliskej tla kinnaualuiyaj. Ika yejon, ijkuak kualoj onnotlatemouiliaj niman ijkon xinpan nochiuas tlen xkuajli.

Cristianismo

Akin kijtouaj ika kichiuaj ken Cristo kineltokaj ika titlajyouiyaj ipampa tlen xkuajli okichiujkej Adán iuan Eva, ijkon ken kijtoua Génesis. San ika, oksekimej sa kontlatlaliliaj tlen yejuamej kinemiliaj. Sekimej católicos kinemiliaj ika uelis kitlajtlaniliskej toTajtsin makintlajyouilti niman ijkon makinteochiuili inteopan noso yakaj makimakixti.