¿Tleka miyekej xok notlakaitaj ipan familia?
TLEKA MELAK NONEKI TIKINTLAKAITAS MOCHANEJKAUAN
Ijkuak ipan se familia notlakaitaj, teueuentsitsinuan, tesiuauan niman tekoneuan kuajli nomachiliaj.
Ipan libro Siete reglas de oro para vivir en pareja kijtoua ika ijkuak se teueuentsin niman se tesiuatsin notlakaitaj, noititiaj ika notlasojtlaj ipan tlen mojmostla kichiuaj maski tla ueyi noso xueyi nesiskia.
Sekimej ixtlamatkej yokitakej ika tekoneuan akin tetlakaitaj, más kuajli nomachiliaj, más kuajli nouikaj imiuan intajuan niman más kuajli tlanemiliaj.
TLEN TEJUA UELIS TIKCHIUAS
Xtlajto imiuan mochanejkauan. Kachtopa, nemochimej noneki nenkasikamatiskej tlenon kijtosneki tetlakaitalistli. Ika ome, xkijkuilokan tlen cada se noneki kichiuas niman tlen xkeman noneki nenkichiuaskej. Ika yeyi, xtlajtokan ken familia niman ijkon nochimej kimatiskej tlenon noneki nenkichiuaskej para nemotlakaitaskej.
Xteititi ika tlen tikchiua. Kanaj uelis timotlajtoltis: “¿Nochipa nikimixkoijlia nofamilia ijkuak nopopolouaj? ¿Nikinpijpinaujtia ijkuak nechijliaj tlen kinemiliaj? ¿Xnikinkakisneki noso nikintlajtolkotona ijkuak tlajtojtokej?”. Xkilnamikij ika tejua kachtopa noneki titetlakaitas.
Tlen uelis tikchiuas: Xyejyeko tikitas tetlakaitalistli ken itlaj tlen mochanejkauan kinamiki kiseliskej, niman xken itlaj tlen noneki kinotlaniliskej.
Maski xnemotlajtolnamikij, xmotlakaitakan. Maka xkijto “tejua nochipa” noso “tejua xkeman”. Yejuin tlajtoltin uelis kiyolkokos se mochanejkauj niman uelis kichiuas maueyiya se tlauejli.
TLEN TIKCHIUAJ AKIN TIITEIXPANTIJKAUAN JEHOVÁ
Akin tiiteixpantijkauan Jehová tikteijliaj ika ipan familia noneki notlakaitaskej. Niman yejon nesi ipan tlamachtiltin, libros, folletos niman videos tlen tikinchijchiuaj tlen nochimej uelis kitaskej niman xtlaj kitlaxtlauaskej.
PARA AKIN YONONAMIKTIJKEJ: Tlamachtiltin itech “Tlen kinpaleuis mochanejkauan” uelis melak kinpaleuis teueuentsitsinuan niman tesiuauan ipan yejuin:
Kuajli nemokakiskej
Maka xkajkauakan ika nemonotsaj
Maka melak xmokualanikan
(Xuiya ipan jw.org niman kampa kijtoua “Xtejtemo” noso ipan lupita, xkijkuilo “Tlen kinpaleuis mochanejkauan”).
PARA TAJTIN: Tlamachtiltin itech “Tlen kinpaleuis mochanejkauan” uelis kinpaleuis tajtin makinmachtikan inkoneuan ipan yejuin:
Matetlakamatikan
Matlapaleuikan inchan
Kualtsin itlaj makitlajtlanikan niman makijtokan tlaxtlaui
(Xuiya ipan jw.org niman kampa kijtoua “Xtejtemo” noso ipan lupita, xkijkuilo “Kenon tikinmachtis mokoneuan” noso “Hijos Adolecentes”).
Noijki xkita apéndice “Los padres preguntan” itech libro Lo que los jóvenes preguntan. Respuestas prácticas (volumen 1) (xuiya ipan jw.org niman kampa kijtoua “Xtejtemo” noso ipan lupita, xkijkuilo “Los padres preguntan”).
PARA TELPOKAMEJ: Sección “Telpokamej niman ichpokamej” ipan jw.org kinpiya tlamachtiltin, videos niman okseki tlemach tlen kinpaleuis telpokamej ipan yejuin:
Kuajli nouikaskej imiuan intajuan niman imikniuan
Tlajtoskej ika tetlakaitalistli imiuan intajuan itech tlen kimijliaj makichiuakan
Intajuan intech matlaneltokakan
(Xuiya ipan jw.org niman kampa kijtoua “Xtejtemo” noso ipan lupita, xkijkuilo “Telpokamej niman ichpokamej”).
Xtlaj tiktlaxtlauas tla tijkui página ipan Internet jw.org, nion xnoneki tikalakis ika se correo niman noijki xmitstlajtlaniliskej modatos.