Historia 104

Jesús nokuepa iluikak

PANOUAJ tonaltin, niman Jesús miyekpa noteititia ixpan inomachtijkauan. Se tonajli, kanaj 500 inomachtijkauan kitaj. Ijkuak kitaj, ¿tikmatstika itech tlenon kinnojnotsa Jesús? Itech itekiuajyo toTajtsin. Jehová okuajtitlan Jesús ipan tlaltikpaktli matemachtiki itech Tekiuajyotl. Niman ijkuak oyoliuj yejua xkikajkaua ika tenojnotsa.

¿Tikilnamiki tlenon yejuin Tekiuajyotl? Yejuin melauak itlayekanalis toTajtsin ipan iluikak, niman yejua okitlapejpeni Jesús matekiuajti. ¡Ken yotikitakej, Jesús okiteititi kenon melak kuajli tekiuajtis ijkuak okintlakualti akin xkipiaya tlen kikuaskej, okinpajti kokoxkej niman okinyoliti akin yomijkaj!

Ika yejon, ijkuak Jesús uajtekiuajtitos iluikak mil xiuitl, ¿tlenon panos ipan tlaltikpaktli? Kema, nochi tlaltikpaktli nokuepas se kualtsin xochitlalpan. Xok onias guerras, xok nomiktilos, xok onias kokolistli, nion mikilistli. Tikmatstokej ika ijkon nochiuas, pampa ijkuak toTajtsin okichijchiuj yejuin tlaltikpaktli kinekiya tlaltikpakchanejkej manemikan ipan se xochitlalpan. Ika yejon, okichijchiuj xochitlalpan Edén. Jesús kichiuas ika tlen toTajtsin yokijto melauak ijkon manochiua.

Oajsik tonajli ijkuak Jesús nokuepas iluikak. Ipan 40 tonaltin onoteititi ixpan inomachtijkauan niman yejuamej kimatstokej ika yoltika. San ika, ijkuak sa achijtsin poliuiya ika iyaskia iluikak, kimijlia: ‘Xmokauakan Jerusalén hasta ijkuak nenkiseliskej espíritu santo’. Yejuin ikojtilis toTajtsin, kentla yeskia ajakatl, tlen kinpaleuis inomachtijkauan, makichiuakan tlen kineki toTajtsin. Jesús kimijlia: ‘Niman nennechteixpantiliskej, nochiuiyan ipan in tlaltikpaktli’.

Sakin, ijkuak yokijto yejuin, panoua itlaj tlen melak kinmojkatlachialtia. Peua tlejkoua iluikak niman se moxtli okitlapacho, kuakon inomachtijkauan xok ouel okitakej. Jesús yauj iluikak, niman ompa ne tlakpak peua kinuajyekantika inomachtijkauan akin nemij ipan tlaltikpaktli.

1 Corintios 15:​3-8; Apocalipsis 21:​3, 4; Hechos 1:​1-​11.