Tlamachtijli 8
Tlen toTajtsin kineki makichiuakan akin chantij ipan se kajli
¿Tlenon kichiuas se teueuentsin itech ichanejkauan? (1)
¿Kenon se teueuentsin nouikas iuan isiuauj? (2)
¿Tlenon noneki kichiuas se tajtli? (3)
¿Tlenon itekiyo se tesiuauj itech ichanejkauan? (4)
¿Tlenon kineki toTajtsin makichiuakan tajtin niman tekoneuan? (5)
¿Kemanon kijtoa Biblia uelis timoxelos niman kemanon uelis tias ixpan tekiuajkej niman titekauas? (6, 7)
1. Biblia kijtoa ika teueuentsin kinyekanas ichanejkauan (1 Corintios 11:3). Tlakatl san se isiuauj kipiyas, niman nijkuiloskej ixpan tekiuajkej ika yononamiktijkej (1 Timoteo 3:2; Tito 3:1).
2. Teueuentsin noneki kitlasojtlas isiuauj ijkon ken yejua notlasojtla. Kitlasojtlas ijkon ken Jesús kintlasojtla akin kineltokaj (Efesios 5:25, 28, 29). Xkeman kiuisokis nion xkiyolkokos. Kitlakaitas niman kitlasojkaitas yejon tlenon kema noneki kichiuas (Colosenses 3:19; 1 Pedro 3:7).
3. Tajtli kipiya ika tekitis chikauak niman ijkon kinmakas ichanejkauan tlen kimpoloua. Kipiya ika kiminmakas tlen kikuaskej, tlen ika notlakentiskej niman kajli kampa chantis isiuauj niman ikoneuan. Noijki kinchikauilis intlaneltokil ichanejkauan (1 Timoteo 5:8). Yejua kinyekanas ichanejkauan niman kimpaleuis manomachtikan itech toTajtsin niman makimatikan tlen toTajtsin kineki kichiuas (Deuteronomio 6:4-9; Efesios 6:4).
4. Tesiuauj noneki kuajli makipaleui iueuentsin (Génesis 2:18). Kipiya ika kipaleuis makinmachti ikoneuan (Proverbios 1:8). Jehová kineki ika se tesiuauj makinmachiua noso makimita ichanejkauan ika tetlasojtlalistli (Proverbios 31:10, 15, 26, 27; Tito 2:4, 5). Siuatl noneki sajnoye kitlakaitas iueuentsin (Efesios 5:22, 23, 33).
5. ToTajtsin kineki, tekoneuan makintlakamatikan intajuan (Efesios 6:1-3). Yejua kineki tajtin makinmachtikan inkoneuan niman makinmemelauakan. Tajtin kipiya ika imiuan nouikaskej inkoneuan niman imiuan nomachtiskej Biblia, niman ijkon kimatiskej tlenon impan nochiua niman kinchikauiliskej intlaneltokil (Deuteronomio 11:18, 19; Proverbios 22:6, 15). Maka keman kinyolajmanakan inkoneuan nion maka makinuisokikan (Colosenses 3:21).
6. Ijkuak akin yononamiktijkej xuelij nouikaj, tlenon kuajli kichiuaskej makiyejyekokan makitlakamatikan tlen Biblia tlanauatia. Biblia techyoleua matitetlasojtlakan niman matitetlapopoluikan (Colosenses 3:12-14). ToTajtsin iTlajtol xtechijlia matoxelokan tla tiknekij tikyektlaliskej tlaueltin xuejueyimej. San ika tesiuauj kema uelis kinemilis noxelos itech iueuentsin tla 1) xkineki kintlakualtis ikoneuan, 2) sajnoye kiuisoki, uelis kikokolismakas niman ta uelis kimiktis, noso 3) melak xkikauilia makiueyichiua Jehová (1 Corintios 7:12, 13).
7. Akin yononamiktijkej noneki maka manokajkayauakan. Tla kikajkayaua ixnamik iuan okse, tlajtlakoua ixpan toTajtsin niman itech ixnamik (Hebreos 13:4). Tla akin yononamikti kikajkayaua ixnamik iuan okse, san ijkon uelis yaskej ixpan tekiuajkej niman kijtoskej ika nokauaj niman ijkon uelis oksepa nonamiktis (Mateo 19:6-9; Romanos 7:2, 3). Jehová kintlauelita akin yauej ixpan tekiuajkej niman nokauaj maski xtla tlajtlakojli yonochiuj niman nonamiktiaj iuan okse (Malaquías 2:14-16).
[Pictures on page 16, 17]
ToTajtsin kichia tajtin makinmachtikan inkoneuan niman makinmemelauakan
[Picture on page 17]
Tajtli tetlasojtlani kiminmaka ichanejkauan tlen kimpoloua niman kiminchikauilia intlaneltokil