¿Kenon uelis tikixmatiskej toTajtsin?

Uelis tikixmatiskej Jehová tla tikixpouaj Biblia. Yeuejkaui, toTajtsin okintlapejpenij sekimej tlakamej makijkuilokan itlanemililuan. Yejon tlakuiloltin nixmatij kentla Biblia. Aman tikixmatiskej toTajtsin tla tikixpoua Biblia. Yejuin kipiya itlajtol Jehová, ika on noijki nixmati kentla toTajtsin iTlajtol. Uelis tikneltokaskej tlen kijtoa Biblia pampa Jehová xkeman tekajkayaua. “Dios xkeman kijtoua on tlen xmelauak.” (Hebreos 6:18.) Ijkon tej, toTajtsin iTlajtol kijtoa tlen melauak (Juan 17:17).

Biblia tlen sajnoye kuajli tetlayokolijli otikselijkej itech toTajtsin. Kentla se amatlakuilojli tlen kimikuilouilia ikoneuan se tajtli tetlasojtlani. Techtlajtlatouilia ika toTajtsin kineki kikuepas tlakualtsinkan in tlaltikpaktli kampa uelis tinemis, kijtosneki, se xochitlalpan. Techijlia tlen toTajtsin okichiuj yeuejkaui, tlen kichiujtika aman niman tlen kichiuas tlayekapa impampa ikoneuan akin xkeman kitlalkauiaj. Noijki techpaleuiya matikyektlalikan totlaueluan niman matiknextikan pakilistli (2 Timoteo 3:16, 17).

Iteixpantijkauan Jehová mitspaleuiskej xkasikamati tlen temachtia Biblia, pampa yejuamej iuan nouikaj Jehová. San noneki tikimijlis ika tikneki timomachtis Biblia. Xtikimintlaxtlauilis ika mitsmachtiskej (Mateo 10:8, TNM). Uelis imiuan timosentlalis akin kichiuaj ken Cristo, kampa kiueyichiua toTajtsin ipan kaltin kampa nosentlaliaj iTeixpantijkauan Jehová. Tla timosentlalia, noskaltis totoka motlaixmatilis itech toTajtsin.

Uelis tikixmatis toTajtsin tla titlanemilia ipan tlen okichijchiuj. Biblia kijtoa: “Dios [...] okichijchiuj cielo [iluikak], niman in tlaltikpaktli” (Hechos 14:15). Ijkuak Jehová okichijchiuj “iluikak”, noijki okichijchiuj tonaltsintli. Kuakon, ¿tlenon techititia yejuin itech toTajtsin? Techititia ika Jehová kipiya ueyi kojtilistli. San yejua ouel okichijchiuj tlen sajnoye ueyi ken tonaltsintli. Noijki techititia ika Jehová tlamachilise, pampa noneki tlamachilistli tikchijchiuas tonaltsintli, tlen tetotonia niman tetlauiluia niman xkeman seui.

Ika tlen okichijchiuj Jehová techititia ika techtlasojtla. Xnemili ipan miyek tlakilyomej tlen onka ipan tlaltikpaktli. Jehová ueliskia techmakaskia san seki, noso nion se. Niman yejua otechmakak miyek: sekimej uejueyimej, oksekimej pitentsitsintin, oksekimej chichiltikej, xoxoktikej niman tlamantikej noso sesejneka uelikej. Yejuin techititia ika Jehová techtlasojtla, niman noijki techmaka tlen techpoloua niman sajnoye kuajli (2 Corintios 9:10).