Akin iuan nouikaj toTajtsin nemiskej ipan Xochitlalpan

Xijkon yes Xochitlalpan ken aman tlaltikpaktli. ToTajtsin xkeman okinek ma onia ipan tlaltikpaktli tlauejli, tekokojkayotl niman tlajyouilistli. ToTajtsin kichiuas tlaltikpaktli manokuepa ipan se xochitlalpan. ¿Kenon yes? Matikitakan tlen kijtoa Biblia:

Tlaltikpakchanejkej kuakualtin. Akin iuan nouikaj toTajtsin chantiskej ipan se Xochitlalpan. Yejuin nopaleuiskej se iuan okse niman melajkanemiskej ken Jehová tlanauatia (Proverbios 2:21).

Onias miyek tlakuajli. Ipan Xochitlalpan, xakaj apismikis. Biblia kijtoa: “Yejuamej, tej, xok tlajyouiskej ikan apistli, nion amiktli” (Apocalipsis 7:16).

Kaltin chikaujkej niman tekitl teyolpakti. Ipan Xochitlalpan, nochimej kipiyaskej inkal, niman kipiyaskej tekitl tlen teyolpakti (Isaías 65:21-23).

Yolseuilistli ipan nochi tlaltikpaktli. Tlaltikpakchanejkej xok nouisokiskej niman xkeman mikiskej ipan guerra. ToTajtsin iTlajtol kijtoa: “[ToTajtsin] kipopolos guerras” (Salmo 46:8, 9).

Xok onias kokolistli. Biblia kijtoa: “Nion se tlaltikpakchane [ipan Xochitlalpan] xkijtos: ‘Nikualoʼ” (Isaías 33:24). Noijki xok nemiskej akin xtlakakij, akin xtlachiaj, koxomej, nion nontsitsintin (Isaías 35:5, 6).

Xok onias tekokojkayotl nion mikilistli. ToTajtsin iTlajtol kijtoa: “Xok onias mikilistli, nion chokistli nion ajmantli nion kokolistli, pampa nochi tlen achtoj onkatka yopanok” (Apocalipsis 21:4).

Xok nemiskej tlaltikpakchanejkej xkuakualtin. Jehová kijtoa: “Akin xkuakualtin, kimpopoloskej ipan in tlaltikpaktli” (Proverbios 2:22).

Tlaltikpakchanejkej notlasojtlaskej niman notlakaitaskej. Xok onias tlajyouilistli nion nexikojli niman tlauejli. Tlaltikpakchanejkej kuajli nouikaskej niman nemiskej ken toTajtsin tlanauatia (Isaías 26:9).