Matikmatikan itlaj tlen xakaj kimatiya

“Nimitsijlis itlaj tlen xakaj okse kimati”, ¿kemantika yakaj ijkon yotikijlika?...a Ipan Biblia onka itlaj “tlen xakaj kimatiya”, yejuin ualeua itech toTajtsin niman melak miyekej kinekiyaj kimatiskej. Noijki iluikaktekitkej noso ángeles kinekiyaj kimatiskej tlenon katka yejuin. ¿Tikuelitaskia tikmatis tlenon?...

Melak yeuejkaui, toTajtsin okichijchiuj kachtopa tlakatl niman kachtopa siuatl. ¿Kenon intoka katka?... Adán niman Eva. Yejuamej chantiyaj ipan xochitlalpan Edén. Ompa melak tlakualtsinkan katka. ToTajtsin okinmakak ompa machantikan. Kinekiya ika yejuamej niman inkoneuan makikualtsintilikan nochi tlaltikpaktli, ijkon ken xochitlalpan Edén niman manemikan nochipa ipan se xochitlalpan. San ika, xijkon opanok. ¿Tikmatstika tleka?

Pampa Adán iuan Eva xokitlakamatkej toTajtsin. Ika yejon, aman xtichantij ipan se xochitlalpan. San ika, toTajtsin yokijto ika yejkos tonajli ijkuak tlaltikpaktli yes se xochitlalpan. Xok timikiskej niman tinochimej tinemiskej ika yolpakilistli. ¿Kenijki nochiuaskia tlen okijto? Melak ouejkauj ika xkimatiyaj kenon nochiuaskia. ¡Xakaj kimatiya!

San ika, ika yolik opeuj okimatstiajkej. Ijkuak Jesús ouajlaka ipan tlaltikpaktli, okimijli tlaltikpakchanejkej ika tlen xakaj kimatiya katka iTekiuajyo toTajtsin. Ijkuak tikchiuiliaj teoyotl, tikijliaj toTajtsin: “Mauajla motekiuajyo”. ¿Tleka yejon tiktlajtlanij? Pampa iTekiuajyo toTajtsin kikualtsintilis tlaltikpaktli.

¿Tikuelitaskia tinemis ipan yejon xochitlalpan?... Xkilnamiki ika san akinomej kitlakamatij toTajtsin nemiskej ipan Xochitlalpan. Biblia kijtoua tlenon inpan onochiuj tlakamej niman siuamej akin okitlakamatkej toTajtsin Jehová. Ipan yejuin amatlajkuilojli tikmatiskej akinomej niman kenon uelis tikchiuaskej ken yejuamej. ¿Tikuelitaskia tikmatis akinomej?...