Samuel nochipa okichiuj tlen Jehová kinekiya

Samuel ochantik niman opeuj tekiti ipan tabernáculo ijkuak pitentsin katka, kampa tlaltikpakchanejkej konueyichiuayaj Jehová. ¿Tikneki tikmatis kenon Samuel oajsik ipan tabernáculo? Kachtopa matiuelikan itech inanaj noso inan Samuel.

Ana xueliya kipiaya ikonetsin. Yejua nochipa melak okinek kipiyas se ikonetsin. Ika yejon, okichiuili teoyotl Jehová niman okitlajtlanili makipaleui. Okijli ika tla kipiyaskia se ikonetsin, kititlaniskia makitekichiuiliti niman machantiti ipan tabernáculo. Jehová okinankili Ana iteoyouj, niman ijkon, Ana okipix se ikonetsin niman okitokayoti Samuel. Ijkuak Samuel ikipiaya kanaj yeyi noso naui xiuitl, Ana okikauato Samuel ipan tabernáculo niman ijkon okichiuj tlen okijli toTajtsin ipan iteoyouj.

Elí katka akin tekitiya ken ueyi teopixki ipan tabernáculo. Omemej ikoneuan noijki ompa tekitiyaj. Xkilnamiki, tabernáculo katka se kajli kampa kiueyichiuayaj toTajtsin niman nonekiya manochiua nochi tlen kuajli. San ika, ikoneuan Elí kichiujtoyaj tlemach tlen melak xkuajli niman Samuel kitaya nochi tlen kichiujtoyaj. ¿Okichiuj Samuel tlen xkuajli ken ikoneuan Elí?... Ka, yejua nochipa okichiuj tlen Jehová kinekiya, ijkon ken okimachtijkej itajuan.

¿Tlenon tiknemilia nonekiya kinchiuiliskia Elí yejon omemej ikoneuan?... Kipiaya ika kinmelajkatlaliskia niman xok kinkauiliskia matekitikan ipan tabernáculo. San ika, Elí xijkon okichiuj, kuakon Elí niman ikoneuan melak okikualanijkej Jehová. Ika yejon, Jehová kichiuaskia ika makitlaxtlauakan tlen xkuajli kichiujtoyaj.

Se tonajli, ika tlayoua, ijkuak Samuel kochtoya, okikak ika yakaj kinotstoya niman okijli: “¡Samuel!” onotlalo kampa Elí, san ika, Elí okijli: “Nejua xonimitsnots”. Okpa ijkon opanok. Ijkuak ika yexpa, Elí okijli Samuel ika tla oksejpa yakaj kinotsa, makinankili: “Nimitstlajtlanilia Jehová, xnechijli; nejua nimitskaktika”. Samuel ijkon okichiuj. Kuakon Jehová okijli Samuel: “Xkijli Elí ika nikchiuas makitlaxtlauakan ichanejkauan ipampa tlemach tlen xkuajli yokichiujkej”. ¿Kenon tiknemilia onomachili Samuel?... ¡Kema, melak xkuajli onomachili! San ika, maski Samuel nomojtiaya kiteijlis tlen Jehová okijto, yejua okitlakamat. Tlen Jehová okijto ijkon onochiuj, niman Elí iuan omemej ikoneuan omijkej.

Melak miyek techmachtia tlen Samuel okichiuj. Maski oksekimej xkuajli tlen kichiuayaj, yejua okichiuj tlen Jehová kinekiya. Aman tejua, ¿tikchiuas ijkon ken Samuel niman nochipa tiktlakamatis Jehová? Tla ijkon tikchiua, melak tikyolpaktis Jehová niman motajuan.