Jehová okinots Samuel

Ueyi teopixketl Elí okipix ome ikoneuan akin tekitiyaj ken teopixkej ipan tabernáculo. Intoka katka Hofní iuan Finehás. Yejuamej xkitlakamatiyaj itlanauatiluan Jehová niman kitlajyouiltiayaj kalpan. Ijkuak israelitas kiuentlaliliayaj Jehová, Hofní iuan Finehás nokauiliayaj nakatl tlen melak kuajli katka. Elí okitekakili tlen ikoneuan kichiuayaj, san ika, xtlaj kichiuaya. ¿Kinkauiliskia Jehová ok ijkon makichiujtokan?

Maski Samuel san konetl katka, xkichiuaya ken Hofní iuan Finehás. Samuel melak kiyolpaktiaya Jehová. Se yeuajli, ijkuak kochtoya, Samuel okikak se tlajtojli tlen okinots. Yejua onokuiteuj, onotlalo kampa Elí niman okijli: “¡Nikan ninemi!”. San ika, Elí okijli: “Nejua xonimitsnots. Oksejpa xkochiti”. Samuel oksejpa onotekak. Kuakon oksejpa ijkon opanok. Ijkuak Samuel ika yexpa okikak yejon tlajtojli, Elí okimat ika Jehová akin kinotstoya Samuel. Yejua okijli Samuel ika tla oksejpa kikakiya yejon tlajtojli makijto: “Xtlajto Jehová pampa motekipanojkauj mitskaktika”.

Samuel oksejpa onotekak niman kuakon okikak: “¡Samuel! ¡Samuel!”. Yejua okinankili: “Xtlajto pampa motekipanojkauj mitskaktika”. Jehová okijli: “Xkijli Elí ika niktlajtlakolmakas niman noijki ichanejkauan. Yejua kimatstok ika ikoneuan kichiujtokej tlen xkuajli ipan tabernáculo, san ika, xtlaj kichiua”. Uajmostla ika kualkan, Samuel okintlapo ipuertas tabernáculo ijkon ken nochipa. Yejua nomojtiaya kijlis ueyi teopixketl tlen Jehová okijlika. San ika, Elí okinots niman okitlajtolti: “Nokoneuj, ¿tlenon yomitsijli Jehová? Nochi xnechijli”. Kuakon Samuel nochi okijli.

Ken noskaltijtiaya Samuel, Jehová iuan nemiya. Nochiuiyan, israelitas kimatstoyaj ika Jehová yokitlapejpenijka Samuel ken teotlajtoketl niman juez.