Ana okitlajtlan ipan teoyotl se ikoneuj

Elcaná katka se israelita akin okipix ome isiuauj: Ana niman Peniná. San ika, yejua melak kitlasojtlaya Ana. Peniná kipiaya miyekej ikoneuan niman Ana nion se xkipiaya. Ika yejon Peniná kipijpinaujtiaya Ana. Nochi xiujtin, Elcaná kinuikaya ichanejkauan Siló makiueyichiuatij Jehová ipan tabernáculo. Sejpa, ijkuak ompa nemiyaj, Elcaná okitak ika isiuatsin Ana melak noyolkokouaya. Kuakon okijli: “Nimitstlajtlanilia Ana maka xchoka. Tinechpiya niman melak nimitstlasojtla”.

Sakin, Ana oyaj iselti okichiuato teoyotl. Xueliya noteltiaya ika choka niman okitlatlaujti Jehová makipaleui, okijli: “Jehová, tla tinechmaka se nokoneuj, nejua nimitsmakas mamitstekichiuili nochi inemilis”.

Ueyi teopixketl Elí okitak ika Ana melak chokaya, yejua okinemili tla Ana yotlauanka. Ana okijli: “Ka noteko xonitlauan. Nikpiya se ueyi tlauejli, niman nikijlitoya Jehová”. Elí okitak ika onopopolo niman okijli: “Jehová mamitsmaka tlen otiktlajtlanili”. Ana kuajli onomachili niman oyaj. Xkaxiltiaya se xiuitl ijkuak yejua okipix ikoneuj akin okitokayoti Samuel. ¿Uelis tiknemilis kenon melak opak Ana?

Ana xokilkauj tlen okijlika Jehová. Ijkuak Ana okikajkauj ika kichichitia Samuel, okikauato ipan tabernáculo kampa kitekichiuiliskia toTajtsin. Yejua okijli Elí: “Yejuin nokoneuj tlen oniktlajtlanili Jehová ipan teoyotl, onijkauiliko Jehová ijkon kitekichiuilis ipan nochi inemilis”. Elcaná niman Ana kontlajpalouayaj Samuel nochi xiujtin niman kitkiliayaj se yenkuik tlakentli tlen xmaueueyak. Jehová noijki okimakak Ana yeyi ikoneuan tlakamej niman ome siuamej.