Jehová okiteititi ika yejua toTajtsin akin melauak

Majtlaktli uejueyimej familias itech Israel okipixkej xkuakualtin tekiuajkej, san ika, Acab katka melak xkuajli. Yejua ononamikti iuan se xkuajli siuatl akin kiueyichiuaya Baal. Itoka katka Jezabel. Acab iuan Jezabel okichiujkej ika miyekej makiueyichiuakan Baal niman okinmiktijkej iteotlajtokauan Jehová. ¿Tlenon okichiuj Jehová? Okititlan teotlajtoketl Elías makijliti Acab tlen yokijlika.

Elías okijli tekiuaj Acab ika pampa kichiuaya tlen xkuajli, xkiyauiskia ipan Israel. Ipantsin yeyi xiuitl xtlaj otlak niman kalpan opeuj kipiya apistli. Sakin, Jehová oksejpa okititlan Elías itech Acab. Tekiuaj okijli: “¡Tejua akin tikpeualtia tlauejli! Nochi yejuin motlajtlakol”. Elías okinankili: “Xnotlajtlakol ika xkiyaui. Tejua otikchiuj pampa tikueyichiujtika Baal. Matikchiuakan itlaj tlen kiteititis akinon toTajtsin akin melauak. Xsentlali kalpan niman iteotlajtokauan Baal ipan tepetl Carmelo”.

Kalpan onosentlali ipan tepetl. Elías okimijli: “Xtlapejpenikan. Tla Jehová yejua toTajtsin akin melauak, xtokakan. San ika, tla Baal, xtokakan yejua. Matikchiuakan yejuin: 450 iteotlajtokauan Baal kipiyaj ika tlauentlaliskej niman kinotsaskej intajtsin niman nejua nitlauentlalis niman niknotsas Jehová. Akin tlanankilis ika tlitl yejua yes toTajtsin akin melauak”. Kalpan okinek.

Iteotlajtokauan Baal okiyektlalijkej uentli. Osetonalojkej kinotstoyaj intajtsin: “¡Baal, xtechnankili!”. Pampa Baal xokinnankili, Elías opeuj kinpijpinaujtia. Yejua okijto: “Xchikajkatsatsilikan, kanaj yokoch niman noneki yakaj makitlachialti”. Itlapoyaujtoya niman iteotlajtokauan Baal ok kitsatsilitoyaj. San ika, xkinnankiliaya.

Elías okitlali uentli ipan tlaixpan niman okitoyauili miyek atl. Sakin, okichiuj teoyotl niman okijto: “Jehová, nimitstlajtlanilia xkauili kalpan makimati ika san tejua titoTajtsin akin melauak”. Nimantsin Jehová okichiuj mauetsiki tlitl itech iluikak niman okitlati uentli. Kalpan otsajtsik: “¡Jehová yejua toTajtsin akin melauak!”. Aman Elías okijto: “¡Xkinmasikan iteotlajtokauan Baal!”. Ipan yejon tonajli, okinmiktijkej 450 iteotlajtokauan Baal.

Ouajnonexti se moxtsintli ipan mar niman Elías okijli Acab: “Melak chikauak kiyauis. Xsalo carreta niman xuiya mochan”. Melak otlamoxten, oajakak niman opeuj melak chikauak kiyaui. Ijkon otlan ika xkiyauiya. Acab totoka oyaj ipan icarreta. Jehová okipaleui Elías manotlalo chikauak, ¡hasta okitlan yejon carreta! San ika ¿ompa otlan nochi itlaueluan Elías? Matikitakan.