Jehová okiyolchikauj Elías

Jezabel okimat tlen inpan onochiuj iteotlajtokauan Baal niman melak okualan. Otlanauati makijlitij Elías: “Mostla noijki timikis ken iteotlajtokauan Baal”. Elías melak onomojti niman ocholojteuj kampa tlaluaktli. Ompa okichiuj teoyotl niman okijto: “Jehová xok nitlaxikoua. Xnechkauili manimiki”. Elías melak siaujtoya niman okoch itsintlan se kojtli.

Se iluikaktekitketl okitlatlachialti niman ika yemanki tlajtojli okijli: “Xmokuiteua, xtlakua”. Elías okitak se pan yeualtik totonixtoya ipan temej niman se atekontli. Yejua otlakua niman oatlik, sakin oksejpa okoch. Iluikaktekitketl oksejpa okitlatlachialti niman okijli: “Xtlakua. Noneki tichikaujtos pampa uejka tinejnemis”. Kuakon Elías oksejpa otlakua. Sakin onejnen 40 tonajli niman 40 yeuajli hasta oajsik tepetl Horeb. Ompa okochito ijtik se teostotl. Kuakon Jehová okijli: “Elías, ¿tlenon nikan tikchiujtika?”. Elías okinankili: “Israelitas xkichiujtokej tlen okijtokej. Yokinxoxotonijkej kampa mitsuentlaliliayaj niman yokinmiktijkej moteotlajtokauan. Aman yejuamej noijki kinekij nechmiktiskej”.

Jehová okijli: “Xkisa niman xijkato ipan tepetl”. Kuakon chikauak oajakak, melak otlalolin niman sakin, tlitl. Sa ika tlami, Elías okikak se tlajtojli tlen kakistiya yolik niman yemanki. Yejua onoxayakatlapacho ika itlaken niman onokauj ikiyauak teostotl. Jehová okitlajtolti tleka cholojtinemiya. Elías okijto: “Sa nejua ninokaua”. San ika, Jehová okijli: “Xmoselti tinemi. Ipan Israel ok nemij 7,000 akin nechueyichiuaj. Xuiya niman xkijli Eliseo ika yejua mitstekipatlas ken teotlajtoketl”. Elías nimantsin okichiuj tlen Jehová okinauati. ¿Tiknemilia ika Jehová noijki mitspaleuis tla tiktlakamati? Kema kichiuas. Aman matikitakan tlenon opanok ijkuak ok xkiyauiya.