¿Kemantika san moselti timomachilia niman timomojtia?

¿Yotikitak telpokatsin akin nesi ipan tlaixkopinajli? ¿Xmelak ika nemi iselti niman ika nomojtia? ¿Kemantika itlaj omitsmojti?... Tinochimej ijkon topan yonochiuj. Ipan Biblia tlajtoua itech itekipanojkauan toTajtsin akin, maski kitlasojtlayaj Jehová, noijki onomojtijkej niman ijkon onomachilijkej. Se itoka katka Elías. ¿Matikitakan tlenon ipan opanok?

Elías ochantik ipan Israel melak yeuejkaui, ijkuak xiuajtlakatiya Jesús. Ipan yejon tonajli, tekiuaj ipan Israel niman isiuauj xkiueyichiuayaj toTajtsin akin melauak, Jehová. Yejuin tekiuaj itoka katka Acab niman isiuauj Jezabel, yejuamej kiueyichiuayaj Baal, se tatajtsin akin xmelauak. Ika yejon, miyekej akin chantiyaj ipan Israel noijki kiueyichiuayaj Baal. Jezabel melak xkuajli katka niman kinekiya kinmiktiskia nochimej akin kitlakamatiyaj Jehová. Pampa Elías kitekichiuiliaya Jehová, ¡yejua noijki kinekiyaj kimiktiskej! ¿Tlenon kichiuaskia Elías? ¿Tlenon tikchiuaskia tejua?...

¡Elías oyaj melak uejka! Oyaj ipan tlaluaktli niman oniyanato ijtik se teostotl. ¿Tleka oniyanato?... Kema, pampa melak onomojti. San ika, Elías xkipiaya ika nomojtiskia. ¿Tleka? Pampa kimatstoya ika toTajtsin ueliskia kipaleuis. Niman toTajtsin yokipaleuijka. Se tonajli, Elías okichiuili teoyotl toTajtsin, niman yejua okinankili ijkuak okuajtitlan tlitl tlen oualeuj iluikak. Jehová kipiya ueyi kojtilistli, ¿xmelak? Ika yejon, Elías kimatstoya ika Jehová oksejpa kipaleuiskia.

Ijkuak Elías nemiya ijtik teostotl, Jehová okitlajtolti: “¿Tlenon tikchiua nikan?”. Elías okinankili: “Xok nemij oksekimej akin mitsueyichiuaj, sa noselti yoninokauj. Niman ninomojtia manechmiktikan noijki”. Elías kinemiliaya ika nochimej akin kitekipanouayaj Jehová yokinmiktijkaj. San ika, Jehová okijli Elías: “Ka, xsan moselti timokaua. Nemij siete mil akin ok nechueyichiuaj. Maka xmomojti, nikpiya se tekitl tlen tikchiuas”. Ijkuak toTajtsin ijkon okijli, ¿kenon tiknemilia onomachili Elías?... Kema, ¡melak okiyolpakti!

¿Tlenon tiuelij itech tlen ipan onochiuj Elías?... Tejua xkeman moselti tinemis niman xkeman itlaj mitsmojtis. Nemij oksekimej akin noijki kitlasojtlaj Jehová ken tejua niman uelis iuan timouikas. ¡Jehová kipiya melak ueyi kojtilistli niman nochipa mitspaleuis! ¿Xmitsyolpaktia tikmatis ika xkeman moselti tinemis?...