¿Tleka Jesús melak otenojnots itech iTekiuajyo toTajtsin?

Ken otikitakej ipan okse tlamachtijli, Jesús nochipa otemachti “on kuajli tlajtojli yejuan kiteijlia ken Dios temakixtia” (Lucas 8:1). Jesús melak uejka nejnentinemiya ipan Israel, pampa kinekiya kinmachtis oksekimej itech iTekiuajyo toTajtsin. Noijki, ipan naui Evangelios kampa kijtoua tlenon okichiuj Jesús, noteneua ipantsin 100 veces iTekiuajyo toTajtsin, niman Jesús yejua akin más miyekpa okiteneuj. San ika, xsan yejuin tlen Jesús otemachti itech iTekiuajyo toTajtsin (Juan 21:25).

¿Tleka Jesús melak otenojnots itech iTekiuajyo toTajtsin? Pampa toTajtsin yokitlapejpenijka para matlayekana ipan yejon Tekiuajyotl (Isaías 9:6; Lucas 22:28-30). San ika, yejua xsan kitejtemojtoyaj sajnoye makiueyiteneuakan (Mateo 11:29; Marcos 10:17, 18). Yejua nochipa otemachti itech iTekiuajyo toTajtsin pampa kimatstoya, niman kimati, ika yejuin Tekiuajyotl, kiueyiteneuas iTajtsin niman kinpaleuis oksekimej.a

TLEN TEKIUAJYOTL KICHIUAS IPAMPA ITAJ JESÚS

Jesús melak kitlasojtla iTajtsin (Proverbios 8:30; Juan 14:31). Jesús kuelita kenon iTajtsin melak tetlasojtla, teiknelia niman nochipa kichiua tlen melajki (Deuteronomio 32:4; Isaías 49:15; 1 Juan 4:8). Ika yejon, Jesús xkuelita makijtokan tlen xmelauak itech iTajtsin. Sekimej kijtouaj ika toTajtsin xnajmana ijkuak tejuamej titlajyouiyaj, noso ika yejua akin techtlajyouiltia. Ika yejon, Jesús nochipa otemachti itech iTekiuajyo toTajtsin, pampa yejuin Tekiuajyotl kiueyiteneuas itoka toTajtsin (Mateo 4:23; 6:9, 10). ¿Kenon kichiuas?

Ijkuak kichiuas tlen kuajli para kinpaleuis tlaltikpakchanejkej. Ika iTekiuajyo, Jehová kinpaleuis tlaltikpakchanejkej niman “kimpopouilis nochi iminixayo”. Kipopolos nochi tlen kichiua matitlajyouikan, “xok onyas mikilistli, nion chokistli, nion ajmantli, nion kokolistli” (Apocalipsis 21:3, 4). ITekiuajyo toTajtsin kichiuas maka sa matitlajyouikan.b

Jesús kinekiya kinmachtis oksekimej itech iTekiuajyo toTajtsin, pampa yejuin Tekiuajyotl, kiteititis ika iTajtsin melak kojtik niman teiknelia (Santiago 5:​11). San ika, yejuin Tekiuajyotl xsan kipaleuis toTajtsin, noijki kinpaleuis akin kichiuaj ken Jesús.

TLEN ITEKIUAJYO TOTAJTSIN KICHIUAS INPAMPA AKIN KICHIUAJ KEN JESÚS

Achto ika uajlaskia ipan tlaltikpaktli, Jesús onen iuan iTajtsin ne iluikak miyek xiujtin. Yejua okipaleui ijkuak okinchijchiuj sitlalimej, galaxias, yejuin tlaltikpaktli niman nochi tlen yoltok (Colosenses 1:15, 16). Jesús melak okitlasojtlak nochi tlen toTajtsin okichijchiuj, san ika, Biblia kijtoua yejua más okintlasojtlak tlaltikpakchanejkej (Proverbios 8:31).

Jesús okinmachti pampa melak kintlasojtlaya. Yejua okijto ika ouajlajka ipan tlaltikpaktli para kinmachtis “on mayankej tlakamej on kuajli tlajtojli” (Lucas 4:18). San ika, Jesús xsan temachtiaya, noijki kinpaleuiaya oksekimej. Se tonajli, miyekej okinisiuijkej niman “yejua okimiknelij niman okimpajtij on kokoxkej yejuan kinuikayaj” (Mateo 14:14). Okse tonajli, se tlakatl akin melak kualouaya okijli: “Tla tikneki, uelis tinechpajtis”. Yejua melak okikneli niman okinankili: “Nikneki. Aman xpajti” (Lucas 5:12, 13). Niman ijkuak okitak ika iamiga Maria chokatoya pampa yomijka ikniuj Lázaro, Jesús “sanoyej onajman niman iminuan oyolkexan” (Juan 11:32-36). Kuakon okichiuj itlaj tlen melak kualtsin: Okiyoliti Lázaro maski yopanoka naui tonajli ika yomijka (Juan 11:38-44).

Jesús kimatstoya ika milagros tlen kinchiuaya xnochipa kinpaleuiskia oksekimej, pampa akin yejua kinpajtiaya niman kinyolitiaya, oksejpa kualoskiaj niman mikiskiaj. San ika, noijki kimatstoya ika tlen kichiuaskia iTekiuajyo toTajtsin, xkeman popoliuiskia. Ika yejon, xsan okichiuj milagros, yejua más onokojtili temachtis itech iTekiuajyo toTajtsin (Mateo 9:35). Milagros tlen yejua okinchiuj okiteititijkej tlen iTekiuajyo toTajtsin kichiuas ipan tlaltikpaktli ika tlayekapan. ¿Tlenon kichiuas? Biblia techijlia.

• 

  Xok yakaj kualos.

  “Ijkuakon, on yejuan ciegos tlachaskej, niman on tsatsamej tlakakiskej. On uilatsitsimej tsikuiniskej kenon masamej, niman on nontsitsimej pakilistsajtsiskej”. Niman noijki, “xok yakaj kijtos: ‘Nikualo’” (Isaías 33:24; 35:5, 6).

• 

  Xok yakaj mikis.

  “On yolmelajkej tlakamej kinmakaskej on kuajli tlajli, para ipan chantiskej nochipa” (Salmo 37:29).

  “ToTEKO kipopolos on mikilistli para nochipa, niman nochimej kinmixayopopouas” (Isaías 25:8).

• Akin yomijkej yoliuiskej.

  “Nochimej on mikatsitsimej kakiskej notlajtol niman kisaskej ipan intlalkon” (Juan 5:28, 29).

  “Mikatsitsimej yoliuiskej” (Hechos 24:15).

• 

  Nochimej kipiyaskej kanon chantiskej niman kanon tekitiskej.

  “On chanejkej kinchijchiuaskej inkaluan niman kuajli ompa chantiskej, tlatokaskej ikan uvas, niman yejuamej kikuaskej itlakyo on uvas. Ompa xkichijchiuaskej inkal niman yej oksekimej ompa chantiskej, nion tlatokaskej niman yej oksekimej kikuaskej on tlakijlotl. Notlapejpeniluan [...] sanoyej kipiyaskej paktli pampa inyaxka yes on tlen yejuamej kitekitiskej” (Isaías 65:21, 22).

• 

  Xok onias guerra.

  “[ToTajtsin] yokichiu para nochiuiyan ipan in tlaltikpaktli maka ma onyaj guerras” (Salmo 46:9).

  “On naciones xokaman nouijsokiskej, nion xok kintlayejyekoltiskej para ueliskej tlauisokiskej” (Isaías 2:4).

• 

  Nochimej kipiyaskej tlen kikuaskej.

  “In tlajli tlatlakitis, ¡niman toDios techtiochiuas” (Salmo 67:6).

  “¡Ma onya miyek trigo ipan on país, niman ma onya miyek trigo ipan on tepemej!” (Salmo 72:16).

• Tikpiyaskej nochi tlen noneki.

  “Xnochipa tej, kinmelkauaskej on mayankej” (Salmo 9:18).

  “Yejua kimanauis on mayanki yejuan kitlajtlanilis ma kipaleui, niman kimanauis on yejuan tlajyouiya, yejuan xkipiya akinon kipaleuis. Yejua kinmiknelis on yejuan yolyemankej niman kinmanauilis innemilis on mayankej” (Salmo 72:12, 13).

Aman ika yotikitakej yejuin, ¿yotikasikamat tleka Jesús melak tenojnotsaya itech iTekiuajyo toTajtsin? Yejua okinmachti nochimej akin kinekiyaj kikakiskej pampa yejua kimatstoya ika san iTekiuajyo toTajtsin ueliskia kinpaleuis.

¿Tikuelita tlen toTajtsin kichiuas? Tla kema, ¿kenon uelis tikmatis más itech iTekiuajyo toTajtsin? ¿Tlenon uelis tikchiuas para tikitas nochi tlen toTajtsin kichiuas ika tlayekapan? Ipan okse tlamachtijli tiuelis nochi yejon.