Yenkuik tlakuikaltin ika tikueyichiuaskej toTajtsin
1 Tlanechikojli tlen kemach okichiuj Watch Tower Bible and Tract Society of Pennsylvania, ipan 4 metstli octubre xiuitl 2014, onoijto noyektlalis amoxtli Cantemos a Jehová. ¡Yejuin melak kualtsin! Akin ompa nemiyaj okimilnamiktijkej ika melak noneki tikinpiyaskej tlakuikaltin ijkuak tikueyichiua toTajtsin (Sal. 96:2).
2 Kanaj timotlajtoltia: “¿Tleka noneki manoyektlali tlakuikaltin?”. Miyek onka tlen ika. Kachtopa, tlen tikasikamatij itech Biblia noyektlalijtiuj niman ika yejon noneki nopatlas ipan tlakuikaltin (Prov. 4:18). Okse tleka noneki: pampa ipan miyek tlajtoltin noyektlalijtok Traducción del Nuevo Mundo, noneki noyektlaliskej tlajtoltin tlen onkatkaj. Pampa ika melak miyek tlajtoltin noyektlalis, noijki ononemili notlaliskej okseki tlakuikaltin yenkuikej ipan yejuin amoxtli.
3 ¿Tikchiaskej makisa amoxtli niman ijkon peuas tiueliskej tlakuikaltin yenkuikej? Ka. Tipakij timechijliskej ika ipan metstin tlen uajlauej tikintlaliskej ipan jw.org seki tlakuikaltin yenkuikej. Ijkuak se yenkuik tlakuikajli kisas, tokuikatiskej ijkuak ontlamis Tlanechikojli ken Tiktekichiuiliskej toTajtsin. Ualijkuiliujtias “yenkuik tlakuikajli”.
4 Kenon tiueliskej yenkuik tlakuikaltin. Ouijtika yes tiuelis se yenkuik tlakuikajli. Maski ijkon, tiknekij tikchiuaskej ken salmista, akin okijto: “Niman ijkon uelis nimitskuikatlalilis niman xninokamatsakuas” (Sal. 30:12). Xchiua yejuin niman ijkon tiuelis yenkuik tlakuikaltin.
Miyekpa xkaki tlatsotsonajli ika piano tlen notlalis ipan jw.org. Tla ijkon tikchiua xouijtika tiuelis.
Xmomachti tlajtoltin hasta tikintsontekontlalis.
Xmokuikati ika tlatsotsonajli hasta ijkuak xok timopopolos.
Xyejyeko tikchiuas yejuin ijkuak tikueyichiuas toTajtsin iuan mochanejkauan hasta xuelikan nemokuikatiskej.
5 Metstli ika tlayekapan notlalis yenkuik tlakuikajli ipan Tlanechikojli ken Tiktekichiuiliskej toTajtsin, kachtopa san nokakis tlatsotsonajli ika piano. Sakin, nochimej nokuikatiskej ika tlatsotsonajli, ijkon ken nochiua itech okseki tlakuikaltin.
6 Ken tikitaj, melak techyolpaktia san sekan tokuikatiskej ika tikueyichiuaskej Jehová. Kuakon, maka xmomati timokuiteuas ijkuak tokuikatiskej ipan tlanechikojli.
7 Onka okse ken tikteititiskej ika tiktlasojkaita tlatsotsonajli. Ipan ueyi tlanechikoltin, ijkuak sa achijtsin poliui niman peuas, nochipa notlaliaj tlatsotsonaltin. Okpa ipan se xiuitl, tokniuan akin ualeuaj itech nochiuiyan tlaltikpaktli yauej Patterson, Nueva York. Ompa kichijchiuaj tlatsotsonaltin tlen tiktekitiltiaj ika tikueyichiuaj toTajtsin niman yejuamej kitlaxtlauaj tlen ika yauej. Kuakon, ijkuak techijliskej matotlalikan niman matijkakikan tlatsotsonajli, noneki titetlakamatiskej. Yejuin techpaleuis tikyektlaliskej toyojlo itech tlamachtijli tlen tijkakiskej (Esd. 7:10).
8 Amanin, tontlamiskej tlanechikojli ika se tlen yenkuik tlakuikajli itoka “¡Que venga el Reino establecido por Dios!”. Yejuin tlakuikajli okis ipan tlanechikojli tlen okipix Watch Tower Bible and Tract Society of Pennsylvania. Onochijchiuj ika onoteititi ika itekiuajyo toTajtsin kajxiltia 100 xiuitl.
9 Kuajli tikmatstokej ika yenkuik tlakuikaltin yejuin “tlen kuajli” ualeua itech Jehová (Mat. 12:35a). ¡Matiuelikan yenkuik tlakuikaltin niman matikuikatlalilikan niman matikueyichiuakan toTajtsin ken kinamiki! (Sal. 147:1.)