Tlakuikaltin tlen kichiuaj kuajli iuan matouikakan toTajtsin

Tlakuikaltin se itetlayokolil toTajtsin, tlen kichiua kuajli matomachilikan, matipakikan niman techyolchikauaj. Niman tlakuikaltin tlen kisaj ipan JW Broadcasting^® techpaleuiyaj más matiknisiuikan toTajtsin.

Desde ipan 2014, yokinchijchiujkej ipantsin 70 tlakuikaltin, niman noijki uelis tikinkakis ipantsin 500 tlajtoltin. Kanaj timotlajtoltia: “¿Kenon nochijchiuaj tlakuikaltin? ¿Niman akinon kinchijchiua?”.

Kenon nochijchiuaj tlakuikaltin

Grupo akin kiyekanaj Tlamachtijli itech Grupo akin Tlayekana, kijliaj Equipo de Música itech Servicio de Audio y Video kenon kinchijchiuaskej tlatsotsonaltin niman tlakuikaltin tlen nesij ipan JW Broadcasting niman okseki tlakuikaltin. Ipan Equipo de Música nemij 13 tokniuan niman yejuamej kitaj ika kuajli manochiua yejon tekitl ipan composición, sonido niman itech ipan okseki tekitl tlen noneki. Niman Grupo akin kiyekana Tlamachtijli, okijto ika kuajli yeskia tla tlapaleuiyaj tokniuan akin uejka chantij ipan nochi tlaltikpaktli niman ijkon manochiua yejon tekitl. Niman noijki nemij tokniuan akin kichijchiuaj tlakuikajli, tlatsotsonajli niman nokuikatiaj. Yejuin tokniuan xnoueyimatij niman kinchiuaj intekiyo ika yolyemanilistli.

¿Kenon nochijchiuaj tlakuikaltin? Kachtopa, Grupo akin kiyekana Tlamachtijli, kitlapejpeniaj ipan tlen textos kikixtiskej niman tlenon kineki makimachilikan akin kikakiskej tlakuikajli. Noijki, Equipo de Música kijtoua akinon kijkuilos tlakuikajli niman tlatsotsonajli, sakin kichiuaj kachtopa grabación. Niman Grupo akin kiyekana Tlamachtijli, kita tla itlaj kipoloua. Sakin, Equipo de música kipatla tlen tokniuan kitlajtlanij niman kichiuaj grabación final. Miyekan kampa nochiuaj grabaciones itech tlakuikaltin, kemantika ipan sucursal noso inchan tokniuan.

Tokniuan kitekitiltiaj seki programas ipan computadoras para kijkuiloskej tlakuikaltin niman grabaciones. Noijki kitekitiltiaj okseki tlemach para nochijchiuaskej tlatsotsonaltin, ken mezcladoras de sonido, amplificadores, bocinas niman micrófonos. Se micrófono kikouaj kanaj 100 noso ipantsin 1,000 dólares. Ipan 2020 okitlaxtlaujkej 116,000 dólares ipan equipo de grabación.

¿Tlenon nochiua para xueyi nopopolos tomin? Miyekej tokniuan akin tlapaleuiyaj nemij inchan niman xnoneki yaskej Betel para kichiuaskej yejon tekitl. Niman xnoneki kinotsaskej tokniuan para matlatsotsonatij, pampa Equipo de Música kichijchiuaj tlatsotsonajli ipan computadoras.

“Melak nechpaleuiyaj manitlaneltoka”

Tokniuan melak kuelkakij tlakuikaltin, Tara, akin ualeua Alemania kijtoua: “Melak nechpaleuiyaj tlakuikaltin, niman ijkuak najmankamiki kichiuaj ika kuajli maninomachili. Noijki ijkuak nijkaki ika notlajtol, nikmachilia kenon Jehová nechyolseuiya”. Dimitri, akin chanti Kazajistán, kijtoua: “Melak nikuelita nikinkakis tlakuikaltin pampa nikmatstika ika xkijtoua tlen xkuajli. Niman yejon tlakuikaltin más nechpaleuiyaj kuajli maninouika iuan Jehová”.

Delia, akin chanti Sudáfrica, kijtoua tleka melak kuelita tlakuikaltin: “Melak nechpaleuiyaj manitlaneltoka, pampa ijkuak ninajmana noso itlaj nikixnamiktok, nochipa onka se tlakuikajli tlen kijtoua itech tlen nopan nochiujtok. Niman ijkuak san nijkaki tlatsotsonajli, kichiua kuajli maninomachili”.

Miyekej kinpiyaj tlakuikaltin tlen melak kinuelitaj kinkakiskej. Lerato, akin chanti Sudáfrica, kijtoua: “Tlakuikaltin Melak nisiuj niman Sajnoye tipakis kichiuaj maniknemili ijkuak nonan oksejpa yoliuis. Niman ijkuak nikinkaki yejuin tlakuikaltin nikmachilia kentla ompa ninemiskia niman niknapalojtoskia nonan”.

Onka se tlakuikajli tlen melak okipaleui se ichpochtli de Sri Lanka. Yejua kijtoua: “Nomaestra de Ciencias onechijli miyek tlemach tlen xkuajli imixpan nocompañeros, pampa niiteixpantijkauj Jehová. Melak oninomojti hasta nion xonikmat tlen nikijlis. Ijkuak onajsik nochan, nonan onechijli ika manijkaki tlakuikajli Fuerte tú serás. Yejuin tlakuikajli onechpaleui kuajli maninoyektlali. Uajmostla iuan onitlajto nomaestra. Yejua onechkak niman onechijli ika aman kasikamatiya tlen nejua nikneltoka. Niktlasojkamachilia ikalpan Jehová pampa kinchijchiuaj yejuin tlakuikaltin tlen melak techyolchikauaj”.

¿Kenon ueli tikinchijchiuaj yejuin tlakuikaltin? Ipampa donaciones tlen nemejuamej nenkitemakaj ipan tlen ika nochiua tekitl ipan nochi tlaltikpaktli ijkon ken nonextia ipan donate.jw.org. Tiktlasojkamatij pampa nenkuelitaj nenkitemakaskej nemotomintsin.