Kenon titenojnotsas ika se carrito noso ika se mesa

Tlanojnotsalistli ika se carrito noso mesa melak yotepaleui ika akin kipiyaj kuajli inyojlo makinekikan kimatiskej tlen melauak (Juan 6:44). Kuakon, tlayekankej nochikauaskej kitaskej ika manotenojnotsa kampa tojlan nojuitilo, kampa yokimakakej tlanechikojli matenojnotsa. Pampa titenojnotsas ika carritos noso mesa uelis timejkuanis, xnoneki tias itech tekiuajkej tiktlajtlanis mamitskauilikan ijkon xtenojnotsa. San ika, tla ijkon tlanauatiaj tekiuajkej niman ijkuak noneki, uelis kintlajtlaniliskej makinkauilikan. ¿Akinomej ijkon kuajli tenojnotsaskej? Akin kitekitiltiaj kuajli intlamachilis, kuajli noteixpantiaj niman kuajli tlajtouaj iuan oksekimej. Tlen nikan uajnestiuj kinpaleuis akin tenojnotsaj kuajli makisati intekiyo. Seki tlen uelis nochiuas niman tlen xnochiuas.

Tlen tikchiuas:

Tiyolyemanki yes, titenotski niman tikinpaleuis akin ompa panouaj. Sekimej tenojnotskej teuetskiliaj niman kualtsin tetlajpalouaj. Tla yakaj akin ompa panoua ontlachia kampa onka amatlajkuiloltin, uelis tikijlis: “Uelis tikitkis se tla tikuelita”.
Xmotelketsa itech carrito noso mesa ken kinamiki. Ipan oksekan akin tenojnotsaj kitaj ika kuajli onkisaj tla nisiuj nemij. Oksekimej kitaj ika tla ijkon notelketsaj xakaj noteltia, kuakon uejka nemij hasta kichiaj yakaj manotelti kampa onka carrito noso mesa. Ijkuak yakaj nonisiuiya, aman kiyejyekouaj iuan tlajtoskej niman kijliaj: “¿Yotimotlajtoltijka yejuin?”.
Xtekitilti Biblia nochipa ijkuak uelis.
Xkijli kenon titemachtiaj itech Biblia akin kajsi se amatlajkuilojli tlen ika titemachtiaj, ken amoxtli Temachtia Biblia. Xkijli ika tikneki tikititis video ¿Tleka noneki timomachtis Biblia?
Nochipa ijkuak tiuelis, xtlajtolti akin okuelitak kenon uelis oksejpa iuan titlajtos.