Matomachtikan melak kuajli matitenojnotsakan: xpeua xtemachti Biblia itech puerta ika amatlajkuilojli ¡ToTajtsin techijlia tlen kualtsin!
Tleka melak noneki. Tla tiknekij tikinpaleuiskej tlaltikpakchanejkej makichiuakan ken Cristo, noneki kuajli titemachtiskej iTlajtol toTajtsin (Mat. 28:19, 20). Tinochimej uelis kuajli titemachtiskej tlen melauak tla kuajli tiktekitiltiaj tlen tikpiyaj. Amatlajkuilojli ¡ToTajtsin techijlia tlen kualtsin! techpaleuis kuajli matitemachtikan. Yejuin amatlajkuilojli uelis techpaleuis matikpeualtikan se tlamachtijli itech Biblia ijkuak kemach sejpa iuan yakaj titlajtoskej itech ipuerta kampa chanti.
Ipan yejuin metstli xyejyeko yejuin:
Xchiua teoyotl niman ika nochi moyojlo xtlajtlani ika tikneki tiknextis se akin tikmachtis. Xtlajtlanili Jehová mamitspaleui tikpeualtis se tlamachtijli itech Biblia niman mamitspaleui kuajli xtemachti tlen melauak (Filip. 2:13).
Ijkuak tikueyichiuas Jehová iuan mochanejkauan noso ijkuak moselti timomachtis, xmomajmachti niman xtsontekontlali tlenon uelis tikijtos. Ijkon xtimomojtis ijkuak titlajtos niman peuas timomachtis iuan yakaj ika Biblia itech ipuerta kampa chanti.