¿Kenon uelis tiyolseujtoskej ijkuak itlaj tikixnamikiskej?

1. ¿Tlenon kichiua iyolseuilis toTajtsin niman kenon techpaleuiya? (Filipenses 4:6, 7).

MIYEKEJ kinekij kipiyaskej yolseuilistli. San ika, onka se yolseuilistli tlen miyekej xkixmatij. ¿Katlejua? Iyolseuilis toTajtsin. Yejuin yolseuilistli kichiua kuajli manomachili akin kuajli nouika iuan toTajtsin iluikakchane. Ijkuak tikpiyaj iyolseuilis toTajtsin, xmás tomojtiaj ijkuak itlaj tikixnamikij (xpoua Filipenses 4:6, 7). Noijki kuajli touikaj imiuan akin kitlasojtlaj Jehová pampa, ijkon ken tejuamej, yejuamej noijki kuajli nouikaj iuan toTajtsin akin kitemaka yolseuilistli (1 Tes. 5:23). ¿Tlenon noneki tikchiuaskej tla tiknekij ika toTajtsin matechmaka iyolseuilis? Noneki tikixmatiskej, itech titlaneltokaskej niman tiktlakamatiskej. Niman yejon yolseuilistli techyolseuiya ijkuak tikixnamikij tlen ouijtika.

2. ¿Kenon tikmatij ika uelis tikpiyaskej yolseuilistli tlen kitemaka toTajtsin?

² ¿Yemelak uelis tikpiyaskej iyolseuilis toTajtsin ijkuak tikixnamiktoskej tlen ouijtika? ¿Uelis tiyolseujtoskej ijkuak uajnesiskej uejueyimej kokolistin, ijkuak san totoka itlaj panos, ijkuak noixnamikilos noso ijkuak techtlaueltokaskej? Nochi yejuin uelis techmojtis. San ika, Jesús okimijli inomachtijkauan: “Maka xmotenmatikan, nion maka xmomojtikan” (Juan 14:27). Miyekej tokniuan tlakamej niman siuamej yokichiujkej tlen okijto Jesús. Jehová yokinpaleui mayolseujtokan maski kixnamikij tlen ouijtika.

UELIS TIYOLSEUJTOSKEJ IJKUAK UAJNESISKEJ UEJUEYIMEJ KOKOLISTIN

3. ¿Kenon se ueyi kokolistli uelis kichiuas maka matiyolseujtokan?

³ Ijkuak onka se ueyi kokolistli kampa tichantij noso ipan nochi tlaltikpaktli, nochi uelis kipatlas. San matikonnemilikan kenon COVID-19 okimijtlako miyekej tlaltikpakchanejkej. Ipan se estudio tlen onochiuj, okintlajtoltijkej sekimej kenon okimijtlako COVID-19 niman más de tlajkotipan okijtojkej ika xok más kuajli kochiyaj. Ipan yejuin pandemia yonoitak ika miyekej opeujkej ajmankamikij niman oksekimej melak najmanayaj. Noijki opeujkej más tlauanij niman kinkuij drogas niman oksekimej opeujkej kinuisokij inchanejkauan niman oksekimej hasta kinekiyaj nomiktiskej. Tla kampa tejua tichanti onka se ueyi kokolistli, ¿tlenon uelis tikchiuas para maka melak tiajmankamikis niman tikpiyas yolseuilistli tlen kitemaka toTajtsin?

4. ¿Tleka techmaka yolseuilistli tlen Jesús okijto itech tlen nochiuaskia itlamiyan tonaltin?

⁴ Jesús okijto ika ipan itlamiyan tonaltin, miyekan oniaskiaj uejueyimej kokolistin (Luc. 21:11). Tlen Jesús okijto techmaka yolseuilistli. ¿Tleka? Pampa itikmatstoyaj ika nochi yejuin panoskia, ika yejon, xtechmojkatlachialtia. Aman inochiujtika nochi tlen Jesús okijto. Yejua ika, tikchiuaj tlen Jesús okijto ika nonekiya kichiuaskej akin nemiskiaj itlamiyan tonaltin. Yejua okijto: “Pero maka nemoyolpajsoloskej” (Mat. 24:6).

5. a) Ken kijtoua Filipenses 4:8, 9, ¿tlenon noneki tiktlajtlaniliskej Jehová ijkuak onias se ueyi kokolistli? b) ¿Kenon techpaleuiya tla tijkakij grabaciones de Biblia?

⁵ Ijkuak onka se ueyi kokolistli, tinochimej tomojtiaj pampa xtikmatij tlenon panos. Yejon tlen ipan onochiuj se tokniuj itoka Desi.b Itío, iprimo niman akin kipajtiaya omijkej ipampa COVID-19, niman yejua noijki nomojtiaya kualos niman kimauas inan akin iueyi katka. Noijki kajmanaya tla xok kipiyaskia itekiyo niman notlajtoltiaya kenon kitlaxtlauaskia kampa chantiya niman kenon kikouaskia tlen kikuaskia. Pampa san yejon kinemilijtoya, xok más kuajli kochiya. San ika, ouel oyolseuj. ¿Kenon? Okinots Jehová niman okijli makipaleui mayolseui niman makipaleui matlanemili itech tlen kuajli (xpoua Filipenses 4:8, 9). Tokniuj Desi kikakiya Jehová ijkuak kintlaliaya grabaciones de Biblia. Yejua kijtoua: “Ijkuak nijkakiya kenon tokniuan kualtsin kiamapoujtiayaj Biblia, niuajyolseuiaya niman nikilnamikiya ika Jehová najmana nopampa” (Sal. 94:19).

6. ¿Kenon uelis techpaleuis tla tomachtiaj niman tla tiauej tlanechikoltin?

⁶ Melauak ika ijkuak onka se ueyi kokolistli, xok ueli tikchiuaj tlen kachtopa tikchiuayaj. San ika, maka matijkauilikan ika yejon makichiua maka sa matomachtikan noso maka sa matiuiyan tlanechikoltin. Ipan amatlajkuiloltin niman videos tlen techmaka ikalpan toTajtsin, tikitaj ika tokniuan noijki kixnamiktokej tlen tejuamej tikixnamiktokej niman melajkanemij itech Jehová (1 Ped. 5:9). Ijkuak tiauej tlanechikoltin, peua titlanemiliaj itech tlen kualtsin temachtia Biblia niman noijki toyolchikauaj imiuan tokniuan (Rom. 1:11, 12). Tla titlanemiliaj itech kenon Jehová yokinpaleui itekipanojkauan ijkuak kualouayaj, ijkuak nomojtiayaj noso ijkuak san inselti nomachiliayaj, chikauis totlaneltok niman kuajli tikmatstoskej ika Jehová noijki techpaleuis.

7. ¿Kenon uelis tikchiuaskej ken apóstol Juan?

⁷ Se ueyi kokolistli uelis kichiuas maka melak matikinnisiuikan tokniuan maski imiuan tinemij. San ika, maka matijkauilikan ika yejon makichiua maka matikinnotsakan. Matontlanemilikan itech apóstol Juan. Yejua okijto ika kinekiya kitas iamigo Gayo (3 Juan 13, 14). San ika, okijto ika se tiempo xueliskia kitas. Kuakon okititlanili se carta. Tla xueliskia tikomintaskej tokniuan, ueliskia san tikominotsaskej ipan teléfono noso ika videollamada noso ueliskia tikomintitlaniliskej se mensaje. Ijkuak tikominnotsaj tokniuan, xsan toselti tomachiliaj niman más ika toyojlo tinemij. ¿Niman tlenon uelis tikchiuaskej tla melak tajmanaj? Matitlajtokan imiuan tlayekankej niman matikinkauilikan matechyolseuikan (Is. 32:1, 2).

UELIS TIYOLSEUJTOSKEJ IJKUAK SAN TOTOKA ITLAJ PANOS

8. ¿Kenon uelis timomachilis ijkuak san totoka itlaj panos?

⁸ Tla yotlalolinka kampa tichanti, yotiapachiujka noso yotikalchijchinaujka, kanaj youejkauj ika tiajmankamiki. Tla yotimomijkati noso yoixpoliuj miyek tlen tikpiaya, kanaj melak timoyolkokoua, timajmana noso hasta titlauelmiki. Maski ijkon timomachilia, yejon xkijtosneki tla melak tiktlasojtla tomin noso tla xchikauak motlaneltok. Tejua otikixnamik tlen melak ouijtika, niman kanaj akin tikimixmati ikimatstoyaj ika xkuajli timomachiliskia (Job 1:11). San ika, maski melak ouijtika tlen tikixnamiktoskej, uelis tiyolseujtoskej. Matikitakan kenon.

9. ¿Tlenon okijto Jesús tlen techpaleuiya matikmatikan ika ueliskia topan nochiuas tlen xkuajli?

⁹ Miyekej tlaltikpakchanejkej kinemiliaj ika xkeman inpan nochiuas tlen xkuajli. San ika, tejuamej kuajli tikmatij tlen Jesús okijto. Tikmatstokej ika melak tlaixpoliuiskia niman ika ipampa yejon, kemantika melak titlajyouiskej. Jesús okimijli inomachtijkauan ika “temojtij tlalolinis” niman ika nochiuaskia miyek tlen xkuajli ipan tlaltikpaktli achto tlapopoliuis (Luc. 21:11). Jesús okijto ika miyekiyas on tlen xkuajli, niman kema ijkon panotika. Tikitaj kenon nouisokilo, noixnamikilo niman temiktilo (Mat. 24:12). Jesús xkeman okijto ika tla topan nochiua tlen xkuajli kijtosneki ika Jehová yotechtlalkaui. Tikmatstokej ika miyekej itekipanojkauan toTajtsin akin itech omelajkanenkej otlajyouijkej ipampa tlen xkuajli opanok (Is. 57:1; 2 Cor. 11:25). Kanaj Jehová xkichiuas se milagro para techpaleuis, san ika, kema techpaleuis matiyolseujtokan ijkuak ijkon topan panos.

10. ¿Tleka tikijtouaj ika tla nimantsin tiknemiliaj tlenon tikchiuaskej aman ika xipanoua tlen xkuajli tikteititiaj ika titlaneltokaj itech toTajtsin? (Proverbios 22:3).

¹⁰ Ijkuak san totoka itlaj panos, xmás tomojtiskej tla itikmatstokej tlenon tikchiuaskej niman tla itikpiyaj nochi tlen noneki. San ika, tla nimantsin tiknemilijtiuej tlenon tikchiuaskej ijkuak itlaj panos, ¿xtikteititijtoskiaj ika xtitlaneltokaj itech Jehová? Ka, yej tikteititijtoskiaj ika tikneltokaj ika Jehová uelis techtlajpiyas. ¿Tleka? Pampa yejon tlen Biblia techijlia matikchiuakan, techijlia matiknemilikan tlenon uelis tikchiuaskej tla kemantika itlaj topan panoua (xpoua Proverbios 22:3). Niman ikalpan toTajtsin nochipa techilnamiktia yejuin ipan revistas, tlanechikoltin niman anuncios.c ¿Tlenon tikchiuaskej tla titlaneltokaj itech Jehová? Tikchiuaskej tlen techijlia ikalpan toTajtsin desde aman, amantsin ika xitopan nochiua tlen xkuajli.

11. ¿Tlenon techmachtia tlen okichiuj Margaret?

¹¹ Matitlanemilikan itech tlen ipan onochiuj se tokniuj akin itoka Margaret. Kampa yejua chantiya melak tlachichinaujtoya, yejua ika, tekiuajkej okijlikej oksekan mauiya. Miyekej tlaltikpakchanejkej opeujkej kisaj, ika yejon, omiyekiyakej carros ipan carretera niman xok ueliyaj panouayaj. Margaret ononek nokauas ipan icarro pampa melak tlapoktlan katka, san ika, pampa yokinemilijka tlenon kichiuas niman kipiaya nochi tlen nonekiya, ouel omakis. Ipan icartera yejua kitkiya se mapa kampa nesiya okse ojtli kampa ueliskia yas. Margaret ikixmatstoya yejon ojtli pampa achto ika panoskia yejon, ompa yonojuitijka. Yejua ouel omakis pampa yokinemilijka tlenon kichiuaskia.

12. ¿Tleka noneki titetlakamatiskej ijkuak nochiuas itlaj tlen xkuajli?

¹² Tekiuajkej kitaj kenon uelis techtlajpiyaskej, ika yejon, ijkuak panoua tlen xkuajli, kitlaliaj se hora ijkuak xok yakaj noneki kistinemis ipan ojtli noso techijliaj matiuiyan kampa topaleuiskej noso kanaj itlaj okse technauatiaj. Sekimej tlaltikpakchanejkej xtetlakamatij pampa xkinekij kikaujteuaskej tlen kipiyaj. San ika ¿tlenon tikchiuaj tejuamej akin tiktekichiuiliaj Jehová? Biblia kijtoua: “Ipampa toTEKO, xkintlakamatikan nochimej on tekiuajkej yejuan on tlakamej kintlaliaj. Xtlakamatikan on más ueyi tekiuaj emperador yejuan kipiya más ueyi tekiuajyotl. Niman no xkintlakamatikan on gobernadores yejuan kitemakaj on tlanauatijli” (1 Ped. 2:13, 14). Ikalpan Jehová noijki kineki techtlajpiyas, ika yejon, techijlia tlenon tikchiuaskej. Miyekpa, techilnamiktia matikimijlikan tlayekankej kanon tichantij noso matikinmakakan tonúmero de télefono niman ijkon ijkuak itlaj panos, ueliskej techonnotsaskej. ¿Ijkon yotikchiujkej? Noijki, kanaj ikalpan Jehová techijlis ika nonekis tokauaskej tochan, noso kanaj techijlis kanon uelis tontopaleuiskej noso kanon uelis tikonkuiskej tlen tijkuaskej. Noso noijki uelis techijliskej kemanon niman kenon uelis tikinpaleuiskej oksekimej. Tla xtitetlakamatij, uelis itlaj topan nochiuas noso uelis itlaj inpan nochiuas tlayekankej akin techtlajpiyaj niman melajkanemij itech toTajtsin (Heb. 13:17). Margaret okijto: “Kuajli nikmatstok ika onimakis pampa onikintlakamat tlayekankej niman pampa onikchiuj tlen onechijli ikalpan toTajtsin”.

13. ¿Tlenon kichiuaj miyekej tokniuan akin oksekan yonochantitoj niman ijkon yolpakiskej niman yolseuiskej?

¹³ Miyekej tokniuan oksekan yonochantitoj pampa kampa chantiyaj onka guerra, noixnamikilo noso yotlaixpoliuj. Yejuamej ika yolik nomatstiuej kampa aman chantij niman xkikajkauaj ika kitekichiuiliaj Jehová. Yejuamej kichiuaj ijkon ken tokniuan ipan kachtopa siglo akin okintlaueltokakej: nochiuiyan kiteijliaj “on kuajli tlajtojli yejuan kiteijlia ken Dios temakixtia” (Hech. 8:4). Ijkuak tenojnotsaj, yejuamej más tlanemiliaj itech iTekiuajyo toTajtsin niman xsan tlanemiliaj itech tlen xkuajli inpan panotika. Ijkon uelij yolpakij niman yolseuij.

UELIS TIYOLSEUJTOSKEJ IJKUAK TECHTLAUELTOKASKEJ

14. ¿Tleka ueliskia xok tiyolseujtoskej ijkuak techtlaueltokaskej?

¹⁴ Ijkuak techtlaueltokaj, xok ueli tonechikouaj, xok ueli titenojnotsaj niman xok ueli tikchiuaj okseki tlemach pampa tekiuajkej uelis techajsiskej. Nochi yejon ueliskia kichiuas maka matiyolpakikan niman maka matiyolseujtokan. Ijkuak tekiuajkej xok techkauiliaj ika toyojlo matiktekichiuilikan Jehová, kanaj melak tiajmankamikij pampa san tiknemilijtokej tlenon ueliskia panos. Niman xtlaj tlenon tla ijkon tomachiliaj. San ika, noneki totlajpiyaskej. Jesús okijto ika ijkuak kintlaueltokaskiaj inomachtijkauan, ueliskia xok más tlaneltokaskej (Juan 16:1, 2). Kuakon, ¿tlenon uelis tikchiuaskej tla tiknekij tiyolseujtoskej ijkuak techtlaueltokaskej?

15. ¿Tleka xnoneki tomojtiskej tla techtlaueltokaj? (Juan 15:20; 16:33).

¹⁵ ITlajtol toTajtsin techijlia: “Nochimej kintlauelitaskej niman kintlajyouiltiskej on yejuan kinekiskej nouikaskej yolchipajkej itech Cristo Jesús” (2 Tim. 3:12). Se tokniuj akin itoka Andréi, chanti ipan se país kampa tokniuan xok okinkauilijkej makitekichiuilikan Jehová. Yejua ouijtika okitak kineltokas ika nochimej itekipanojkauan Jehová kintlaueltokaskej. Yejua kinemiliaya: “Nikan melak timiyekej akin tiiteixpantijkauan Jehová, xnikneltoka tla nochimej techtsakuaskej”. Maski ijkon tlanemiliaya, yejua xyolseujtoya, yej más nomojtiaya. San ika, oksekimej tokniuan tlaneltokayaj itech Jehová niman xkinemiliayaj tla yejuamej xkeman kintsakuaskiaj. Kimatstoyaj ika yejon ueliskia panos, yejua ika, xsajnoye ajmankamikiyaj ken Andréi. Kuakon, Andréi opeuj tlanemilia ken yejon tokniuan niman más opeuj tlaneltoka itech toTajtsin. Yejon melak okipaleui pampa oyolseuj niman aman melak yolpaki maski miyek tlen kixnamiki. Tejuamej noijki uelis tomachiliskej ijkon ken Andréi. Tikmatstokej ika Jesús okijto ika techtlaueltokaskiaj, san ika, noijki okijto ika uelis timelajkanemiskej (xpoua Juan 15:20; 16:33).

16. ¿Tlenon ueliskia technauatiskej sucursal noso tlayekankej ijkuak techtlaueltokaskej?

¹⁶ Ijkuak xok techkauiliskej tikueyichiuaskej Jehová, kanaj sucursal noso tlayekankej techijliskej kenon uelis totlajpiyaskej, kenon tikseliskej tlen ika tomachtiskej niman kenon uelis titenojnotsaskej. Ijkuak ijkon panos, matikintlakamatikan akin techyekanaj maski xmás tikasikamatiskej tlen technauatiaj (Sant. 3:17). Niman maka keman matikijlikan akin xkinamiki kimatis itlaj itech se tokniuj noso tlen tikchiuaj ipan tlanechikojli (Ecl. 3:7).

17. ¿Kenon uelis tikchiuaskej ijkon ken apóstoles akin onenkej ipan kachtopa siglo?

¹⁷ Satanás kimixnamiki itekipanojkauan Jehová pampa yejuamej “ikan yolchikaualistli kijtouaj ika kineltokaj JesuCristo” (Apoc. 12:17). Maka matijkauilikan ika Satanás niman akin kinyekana matechmojtikan. Melak tiyolpakiskej niman tiyolseuiskej tla titenojnotsaj niman titemachtiaj tlen melauak maski techtlaueltokaj. Ipan kachtopa siglo, tekiuajkej judíos okimijlikej apóstoles maka sa matenojnotsakan, san ika, yejuamej xokintlakamatkej, yej okitlakamatkej toTajtsin niman itech omelajkanenkej. Yejuamej nochipa otenojnotskej niman yejon melak okinyolpakti (Hech. 5:27-29, 41, 42). Kuakon, nochipa matitenojnotsakan ijkon ken apóstoles, san matikilnamikikan ika ijkuak tekiuajkej xtechkauiliskej matitenojnotsakan, nonekis más totlajpiyaskej (Mat. 10:16). Tla tokojtiliaj ijkon tikchiuaskej, tiyolseuiskej pampa tikyolpaktijtoskej Jehová niman tikinpaleuijtoskej oksekimej mamakisakan.

“DIOS YEJUAN MECHMAKA YOLSEUILISTLI NEMOUAN NEMIS”

18. ¿Akinon uelis techmakas yolseuilistli tlen techpaleuis?

¹⁸ Kuajli matikmatstokan ika uelis tiyolseujtoskej maski tikixnamikiskej miyek tlen ouijtika. Nochipa matikilnamiktokan ika ijkuak topan nochiuas tlen xkuajli, san uelis techpaleuis iyolseuilis toTajtsin, noso yolseuilistli tlen san Jehová ueli kitemaka. Ijkuak onias se ueyi kokolistli, ijkuak sa totoka itlaj panos noso ijkuak techtlaueltokaskej, matitlaneltokakan itech Jehová. Nochipa matinemikan ipan ikalpan toTajtsin niman matitlanemilikan itech nochi tlen toTajtsin yokijto techmakas ika tlayekapan. Tla ijkon tikchiuaj, toTajtsin akin kitemaka yolseuilistli touan nemis (Filip. 4:9). Ipan okse tlamachtijli, tikitaskej kenon uelis tikinpaleuiskej tokniuan makipiyakan iyolseuilis toTajtsin ijkuak itlaj kixnamikiskej.