Matikchikauakan totlaneltok

1. ¿Tlenon kineki Jehová matikchiuakan?

AKIN yononamiktijkej melak yolpakij ijkuak tlakati inkonetsin. San ika, maski melak kitlasojtlaj inkonetsin, xkuelitaskiaj san nochipa manokaua ken se konetsintli. Yejuamej peuaskiaj najmanaskej tla kitaj ika inkonetsin xnoskaltia. Noijki ijkon, Jehová melak yolpaki ijkuak kita ika kemach yopeuj tomachtiaj, san ika, xkuelitaskia nochipa matinemikan ken selikakokonej itech Cristo (1 Cor. 3:1). Yejua kineki tinochimej matochiuakan ken “tlakamej yejuan yochikajkej” (1 Cor. 14:20).

2. ¿Tlenon tiknankiliskej ipan yejuin tlamachtijli?

² ¿Kenijki tlanemilia niman tlenon kichiua yakaj akin yokiskalti itlaneltok? ¿Tlenon noneki tikchiuaskej niman ijkon tikiskaltiskej totlaneltok? ¿Kenijki tla más kuajli tomachtiaj Biblia techpaleuiya más kuajli matouikakan iuan Jehová? ¿Tleka xnoneki tiknemiliskej ika tla yotikiskaltijkej totlaneltok xok noneki tokojtiliskej más touikaskej iuan Jehová? Nochi yejuin tiknankiliskej ipan yejuin tlamachtijli.

¿KENIJKI TLANEMILIA NIMAN TLENON KICHIUA YAKAJ AKIN YOKISKALTI ITLANELTOK?

3. ¿Tlenon kijtosneki ijkuak yakaj yochikauj?

³ Tlajtojli ika griego “yochikajkej”, tlen uajnestiuj ipan 1 Corintios 14:​20, noijki kijtosneki “youeyiyakej” noso “yonoskaltijkej” (1 Cor. 2:6).a Kuakon, ijkuak se tokniuj yochikauj, kijtosneki ika yejua yokiskalti itlaneltok niman xok kichiua ijkon ken se selikakonetl. Kuakon, ¿xok noneki itlaj kichiuas akin yokiskalti itlaneltok? Ka, yejua ok noneki kichikaujtos itlaneltok (1 Tim. 4:15). San ika ¿kenijki uelis tikmatiskej tla se tokniuj telpochtli noso se tokniuj akin iueyi yokiskalti itlaneltok?

4. ¿Tlenon kichiua yakaj akin yokichikauj itlaneltok?

⁴ Yakaj akin yokichikauj itlaneltok kintlakamati nochi itlanauatiluan Jehová niman xsan kintlakamati tlen xouijtika kita. Maski uelis nopopolos pampa tlajtlakole, yejua nokojtilia tlanemilis niman kichiuas ijkon ken Jehová kineki. Noijki, xok kichiua tlen yeuejkaui xkuajli kichiuaya niman mojmostla nokojtilia más tlanemilis ken Jehová (Efes. 4:​22-24). Noijki, ijkuak itlaj kitlapejpenia, kachtopa kimita itlanauatiluan niman itlajtolyekanalisuan Jehová. Niman xnoneki makimakakan se lista kampa makijlikan tlenon noneki kichiuas niman tlenon xnoneki kichiuas. Niman ijkuak itlaj yokitlapejpeni, nokojtilia ijkon kichiuas (1 Cor. 9:​26, 27).

5. ¿Tlenon inpan nochiua akin xichikaui intlaneltok? (Efesios 4:​14, 15).

⁵ Akin xichikaui intlaneltok nimantsin kinokauiliaj makinkajkayauakan “on tlakamej yejuan sanoyej kimatij ken tlakajkayauaskej”. Yejuamej kineltokaj tlen xkuajli kijtouaj itech iteixpantijkauan Jehová. Noso nimantsin kineltokaj tlen kijtouaj akin kixnamikij ikalpan toTajtsin (xpoua Efesios 4:​14, 15).b Noijki, tenexikolitaj, nimantsin kualanij, nimantsin noyolkokouaj noso kichijtiuetsij tlen kinyolpaktia (1 Cor. 3:3).

6. ¿Tlen neskayotl techpaleuiya matikasikamatikan kenijki yakaj kiteititia ika yokiskalti itlaneltok? (Noijki xkita tlaixkopinajli).

⁶ Ken yotikitakej, Biblia kijtoua ika ijkuak yakaj peua kiskaltia itlaneltok, yeskia ijkon ken se konetl akin kemach peua noskaltia. Se konetl xkimati tlenon kichiuas, ika yejon, noneki ika yakaj akin iueyi makitlajpiya. Matikonteneuakan yejuin: se ichpokatsin noneki makimatilantiuj inan ijkuak kipanauis carretera pampa san iselti xuelis. San ika, ijkuak más yonoskalti, inan xok kimayana ijkuak kipanauiyaj carretera, aman san kilnamiktia ika noneki kuajli kitas tla xuajlauj se carro. Niman ijkuak yoichpochtiak, ueli san iselti kipanauiya carretera. Noijki ijkon, akin xichikaui intlaneltok noneki nochipa yakaj makinpaleui para ijkon maka inpan nochiuas tlen xkuajli niman makinpaleui makitlapejpenikan tlen kuajli. San ika, akin yokichikaujkej intlaneltok uelij san inselti kitlapejpeniaj tlen kichiuaskej pampa youelkej kitejtemouaj ipan Biblia tlen Jehová kuelita.

7. ¿Ok noneki makinpaleuikan akin yokiskaltijkej intlaneltok?

⁷ ¿Kijtosneki ika akin yokiskaltijkej intlaneltok xok noneki makinpaleuikan? Ka, xyejon kijtosneki, kemantika uelis kitlajtlaniliskej se tokniuj tlamachilise niman akin chikauak itlaneltok makinpaleui noso makimijli tlenon ueliskia kichiuaskej. San ika, kimatstokej ika “cada se noneki kinomamaltis on tlajtlamach pajsolouilistli yejuan ipan uajlau”, ika yejon, san yejuamej kitlapejpeniaj tlenon kichiuaskej (Gál. 6:5). San ika, akin xikiskaltiaj intlaneltok kinekij nochipa makimijlikan tlenon kichiuaskej.

8. Xkijto tleka akin yochikauj intlaneltok xsan noijki kitlapejpeniaj tlen kichiuaskej.

⁸ Nochimej akin yonoskaltijkej xsan noijki tlachiaj. Noijki ijkon, akin yokiskaltijkej intlaneltok xsan noijki kualneskayomej kinpiyaj. Sekimej melak tlamachilisejkej, sekimej melak yolchikaujkej, sekimej melak kuelitaj tetlatlayokoliskej niman oksekimej melak teasikamatij. Noijki, kemantika xonias se tlanauatijli itech tlen tikixnamikij, kuakon, noneki tiktlapejpeniskej tlen maka makipajsolo totlamachilis. Ika yejon, kemantika omemej tokniuan ueliskia xsan noijki kijtoskej tlen kichiuaskej maski san noijki tlen kixnamiktokej. San ika, xakaj noneki kijtos tla xkuajli tlen okse tokniuj okitlapejpeni kichiuas. Nochimej noneki nokojtiliskej san sekan kuajli nouikaskej (Rom. 14:10; 1 Cor. 1:10).

¿TLENON NONEKI TIKCHIUASKEJ NIMAN IJKON TIKISKALTISKEJ TOTLANELTOK?

9. ¿Tleka tikijtouaj ika xsan noneki tiempo para manoskalti totlaneltok?

⁹ Se konetl noskaltijtiuj ijkuak panoua tiempo. San ika, para noskaltis totlaneltok xsan noneki tiempo. ¿Tleka ijkon tikijtouaj? Pampa yeuejkaui, sekimej tokniuan corintios ok xchikauiya intlaneltok maski youejkaujkaj ika yonoapolaktijkaj, yokiselijkaj espíritu santo niman miyek youelkaj itech apóstol Pablo (Hech. 18:​8-11; 1 Cor. 3:2). ¿Tlenon techpaleuis maka ijkon topan manochiua?

10. ¿Tlenon noneki tikchiuaskej niman ijkon machikaui totlaneltok? (Judas 20).

¹⁰ Melak noneki matiknektokan tikchikauaskej totlaneltok. Akin kinekij nochipa nemiskej ken kokonej akin xtlamachilisejkej xkeman uelis kiskaltiskej intlaneltok (Prov. 1:22). Tejuamej xtiknekij tiyeskej ken akin yonoskaltijkej niman xkinekij tekitiskej niman nochipa san kinekij ika intajuan makimijlikan tlenon kichiuaskej. Tejuamej tiknekij san toselti tikitaskej kenijki más tikchikauaskej totlaneltok (xpoua Judas 20). Kuakon, xtlajtlanili Jehová mamitspaleui xnekto tikchikauas motlaneltok niman mamitsmaka chikaualistli para uelis ijkon tikchiuas (Filip. 2:13).

11. ¿Kenijki techpaleuiya Jehová machikaui totlaneltok? (Efesios 4:​11-13).

¹¹ Jehová kimatstok ika noneki matechpaleuikan para tikiskaltiskej totlaneltok. Ika yejon, yotechinmakak tokniuan akin techyekanaj niman akin techmachtiaj ipan tlanechikojli niman ijkon “titoskaltijtiaskej ipan tonemilis, niman hasta kuajli tichikauiskej no ijki ken Cristo” (xpoua Efesios 4:​11-13). Noijki techmaka iespíritu santo niman ijkon matitlanemilikan ken Cristo (1 Cor. 2:​14-16). Noijki okichiuj manoijkuilokan naui evangelios kampa kijtouaj tlen okichiuj Jesús ijkuak nikan ouajla. Kuakon tla titlanemiliaj, tla titlajtouaj niman tla tikchiuaj ijkon ken Jesús, melak chikauis totlaneltok.

MATOMACHTIKAN TLEN OUIJTIKA ITECH BIBLIA

12. ¿Katlejua “on tlen más xouijtikaj itemachtiluan Cristo”?

¹² Ijkuak opeuj tikixmatij Jehová, opeuj techmachtiaj “on tlen más xouijtikaj itemachtiluan Cristo”. Otikasikamatkej tlenon kijtosneki timoyolkuepas niman titlaneltokas. Noijki otechmachtijkej itech apolaktilistli niman itech yoliuilistli (Heb. 6:​1, 2). Ijkuak apóstol Pedro otenojnots ipan Pentecostés, yejon tlen otemachti pampa yejon tlen noneki kimatis yakaj akin kineki yes inomachtijkauj Cristo (Hech. 2:​32-35, 38). Niman Pablo okijto ika tla yakaj xtlaneltoka itech yoliuilistli, san noijki yeskia kentla tla xtlaneltokaskia (1 Cor. 15:​12-14). San ika, para más tikiskaltiskej totlaneltok, xsan noneki tomachtiskej “on tlen más xouijtikaj itemachtiluan Cristo”.

13. Tla tiknekij matechpaleui on yetik tlakuajli tlen kiteneua Hebreos 5:​14, ¿tlenon noneki tikchiuaskej? (Noijki xkita tlaixkopinajli).

¹³ Biblia kijtoua ika melak noneki matijkuakan on yetik tlakuajli, yejuin kijtosneki ika melak noneki matomachtikan tlen ouijtika temachtia Biblia. Uelis tomachtiskej itlanauatiluan Jehová niman itlajtolyekanalisuan. Yejuin techpaleuis matitlanemilikan ijkon ken Jehová tlanemilia. Kuakon, melak noneki matomachtikan Biblia, itech matitlanemilikan niman matokojtilikan matikchiuakan tlen ompa yotomachtijkej. Nochi yejuin techpaleuis matikchiuakan tlen Jehová kuelita (xpoua Hebreos 5:14).c

14. ¿Kenijki Pablo okinpaleui tokniuan akin chantiyaj Corinto?

¹⁴ Tokniuan akin xinoskaltia intlaneltok xkimatij tlenon kichiuaskej ijkuak xkinextiaj ipan Biblia se tlanauatijli itech tlen kixnamiktokej. Niman ijkuak ijkon panoua, kanaj kinemiliaj ika uelis kichiuaskej tlen yejuamej kinekij. Oksekimej kanaj kinekij manotlali se tlanauatijli. Matikteneuakan tlen yeuejkaui opanok. Nesi ika sekimej tokniuan akin chantiyaj Corinto okijlijkej Pablo makitlali se tlanauatijli tlen makijto tla ueliskia kikuaskej tlakuajli tlen yokinuentlalilijkaj tajtsitsintin. San ika, Pablo xokimijli tlenon noneki kichiuaskej, yejua yej okimijli ika cada se noneki kitlapejpenis tlen maka makipajsolo itlamachilis niman tlen maka makintlajkali oksekimej (1 Cor. 8:​4, 7-9). Tlen okichiuj Pablo okinpaleui tokniuan mauelikan san yejuamej makinemilikan tlenon kitlapejpeniskej niman maka matetlajtoltijtinemikan tlenon kichiuaskej.

15. ¿Kenijki Pablo okinpaleui tokniuan hebreos machikaui intlaneltok?

¹⁵ Matikitakan tlenon techmachtia tlen Pablo okimijli tokniuan hebreos. Yejuamej xok kiskaltijtoyaj intlaneltok, ika yejon, yejua ijkin okimijli: “Nemejuamej nemochiuaj ken kokonej yejuan sanken konij leche niman xuejli kikuaj on yetik tlakuajli” (Heb. 5:12). Yejuamej ijkon intech opanok pampa xnomachtiayaj niman xkiseliayaj tlen yenkuik kinmachtijtoya Jehová itechkopa tlanechikojli (Prov. 4:18). Miyekej tokniuan akin judíos katkaj ok kinekiyaj kitlakamatiskej Tlanauatijli tlen okimakakej Moisés maski yopanoka 30 xiuitl ika Jesús yomijka topampa niman yokitekipatlaka yejon Tlanauatijli (Rom. 10:4; Tito 1:10). Maski yopanoka miyek tiempo, yejuamej ok xkasikamatiyaj yejon. Yejua ika, Pablo kinekiya kinpaleuis makasikamatikan tlen kinmachtijtoya ipan carta tlen okintitlanili. Tlen okimijli, okinpaleui tokniuan makitakan ika melak kuajli katka ken aman noueyichiuaskia Jehová. Noijki okinpaleui manoyolchikauakan niman maka makikajkauakan ika tenojnotsaj maski judíos kintlaueltokayaj (Heb. 10:​19-23).

TLEKA NONEKI MATIKCHIKAUJTOKAN TOTLANELTOK

16. ¿Tlenon noneki tikchiuaskej maski tla yonoskalti totlaneltok?

¹⁶ Melak noneki matokojtilikan matikiskaltikan totlaneltok, san ika, tla yonoskalti maka san ijkon matokauakan, yej matikchikaujtokan totlaneltok (1 Cor. 10:12). Melak techpaleuis tla miyekpa toixtlalouaj niman ijkon tikitaskej tla tikiskaltijtokej totlaneltok (2 Cor. 13:5).

17. ¿Tlenon techmachtia tlen Pablo okimijkuilouili tokniuan colosenses?

¹⁷ Ijkuak Pablo okintlajkuilouili tokniuan colosenses, okimijli ika melak noneki makiskaltikan niman makichikaujtokan intlaneltok. Maski yejuin tokniuan yokiskaltijkaj intlaneltok, okimijli manotlajpiyakan para xtlanemiliskej ken akin xnomachtiayaj (Col. 2:​6-10). Epafras kuajli kimixmatiya tokniuan colosenses, niman Pablo okimijli tokniuan tlenon kichiuaya: “[Epafras] nochipa sanoyej kitlajtlanilia Dios para nemejuamej xmelajkanemikan niman xchijchikajtiakan ipan nemotlaneltok” (Col. 4:12). ¿Tlenon techmachtia yejuin? Ika Pablo niman Epafras kuajli kimatstoyaj ika melak noneki matokojtilikan para machikaujto totlaneltok niman melak noneki matiktlajtlanilikan Jehová matechpaleui. Yejuamej kinekiyaj ika tokniuan colosenses machikaujto intlaneltok maski san tlenon makixnamikikan.

18. ¿Tlenon ueliskia ipan panos yakaj akin xnotlajpiya? (Noijki xkita tlaixkopinajli).

¹⁸ Pablo okintlalnamikti tokniuan hebreos ika xok kiyolpaktiskiaj Jehová tla xok chikauak kipiyaskiaj intlaneltok. Niman ueliskia ijkon inpan nochiuas tla yoltechikauiyaj pampa ouijtika kitaskiaj noyolkuepaskej niman ouijtika yeskia makintlapopolui Jehová. ¡Melak kuajli ika tokniuan hebreos ok xijkon kichiujtoyaj! (Heb. 6:​4-9). Niman aman, ¿tlenon panoua imiuan tokniuan akin xok touan nosentlaliaj niman xok tenojnotsaj? ¿Noso tlenon panoua imiuan akin yokinkixtijkej ipan tlanechikojli san ika yonoyolkuepkej? Yejuamej kiteititiaj ika ok xyoltechikauij pampa onoyolyemanilijkej niman onoyolkuepkej. San ika, maski youajnokuepkej, melak nonekis makinpaleui Jehová (Ezeq. 34:​15, 16). Ika yejon, kanaj tokniuan tlayekankej kitlajtlaniliskej se tokniuj akin chikaujtok itlaneltok makinpaleui oksejpa kuajli manouikakan iuan Jehová.

19. ¿Tlenon noneki tikchiuaskej?

¹⁹ Tla tejua timokojtilijtika tikiskaltis motlaneltok, ijkon xchiujto hasta ijkuak kuajli manoskalti. Xmomachti tlen más ouijtika itech Biblia niman mojmostla más xtlanemili ijkon ken Jehová tlanemilia. Niman tla tejua yonoskalti motlaneltok, aman xmokojtili para nochipa machikaujto.