Nochipa matitlaneltokakan itech ikalpan Jehová

1. ¿Kenon noyekanaya ikalpan Jehová ipan kachtopa siglo?

JEHOVÁ kichia ika itekipanojkauan kuajli makichiuakan tekitl tlen kinmaka (1 Cor. 14:33). Matikonteneuakan se tekitl tlen yokinmakak. Yejua kineki nochiuiyan manotenojnotsa (Mat. 24:14). Niman yokitlali Jesús para yejua makiyekana yejuin tekitl. Niman Jesús kita ika nochi kuajli manochiua. Ipan kachtopa siglo, ne Jerusalén nemiya se grupo kampa nemiyaj apóstoles niman tlayekankej akin kijtouayaj tlenon nochiuas niman sakin kimijliayaj tlanechikoltin tlen yonotlapejpenijka (Hech. 15:2; 16:4). Ipan nochi tlanechikoltin nemiyaj tlayekankej niman yejuamej kimijliayaj tokniuan tlen yejuin grupo yokitlapejpenijka (Hech. 14:23). Tokniuan tetlakamatiyaj, ika yejon, ipan tlanechikoltin “noyolchikauayaj ipan intlaneltok niman on tlaneltokakej mojmostla más miyekixtiayaj” (Hech. 16:5).

2. ¿Kenon Jehová kuayekantiuj ikalpan desde 1919?

² Aman Jehová ok kiyekantika ikalpan. Ipan 1919 Jesús okichijchiuj se grupo kampa nemiyaj sekimej tokniuan tlapejpeniltin. Yejuin grupo opeuj kiyekana tenojnotsalistli niman opeuj kinmaka inomachtijkauan Jesús tlen ika kichikauaskej intlaneltok (Luc. 12:42).a Kuajli nesi ika Jehová kiteochiujtika itekiyo yejuin grupo (Is. 60:22; 65:​13, 14).

3, 4. a) Xkijto ika se neskayotl kenon melak techpaleuiya pampa kuajli toyekanaj. b) ¿Tlenon tikitaskej ipan yejuin tlamachtijli?

³ Tla ikalpan Jehová xkuajli techyekanaskia, xueliskia tikchiuaskiaj tlen Jesús yotechnauati (Mat. 28:​19, 20). San matikonteneuakan yejuin. Tla tokniuan xtechijliskiaj kanon titenojnotsaskej, kanaj nochipa san no ompa titenojnotstoskiaj, noso xkeman tiaskiaj oksekan tontenojnotsaskej. ¿Okseki yotikitak kenon melak kuajli noyekana ikalpan Jehová?

⁴ Jesús kiyekantika ikalpan Jehová ijkon ken okinyekan inomachtijkauan ijkuak nemiya ipan tlaltikpaktli. Ipan yejuin tlamachtijli, tikitaskej kenon ikalpan Jehová kichiua ijkon ken Jesús okichiuj. Noijki tikitaskej tlenon uelis tikchiuaskej niman ijkon tikteititiskej ika titlaneltokaj itech ikalpan Jehová.

IKALPAN JEHOVÁ KICHIUA IJKON KEN JESÚS

5. ¿Kenon ikalpan Jehová kichiua ijkon ken Jesús? (Juan 12:49).

⁵ Tlen kichiuaya niman tlen kijtouaya Jesús ouel itech iTaj iluikakchane. Aman, ikalpan Jehová san kichiua tlen nesi ipan Biblia (xpoua Juan 12:49; 2 Tim. 3:​16, 17). Ika yejon, nochipa techijlia mojmostla matikpouakan Biblia niman matikchiuakan tlen ompa tiuelij. ¿Kenon techpaleuis tla ijkon tikchiuaj?

6. ¿Kenon techpaleuiya ijkuak tomachtiaj Biblia?

⁶ Tla tomachtiaj Biblia niman toamatlajkuiloluan, melak techpaleuis pampa uelis tikitaskej ika tlen techijlia niman tlen technauatia ikalpan Jehová nestika ipan Biblia. Niman yejon techpaleuiya más matitlaneltokakan itech ikalpan Jehová (Rom. 12: 2).

7. ¿Itech tlenon otenojnots Jesús, niman aman tlenon kichiua ikalpan Jehová?

⁷ Jesús okiteijli “kuajli tlajtojli” itech iTekiuajyo toTajtsin (Luc. 4:​43, 44). Niman okimijli inomachtijkauan noijki ijkon makichiuakan (Luc. 9:​1, 2; 10:​8, 9). Aman, akin tinemij ipan ikalpan Jehová noijki titenojnotsaj itech iTekiuajyo toTajtsin.

8. ¿Tlenon ueli tikchiuaj?

⁸ Melak tiyolpakij pampa yotechmakakej se kualtsin tekitl: titenojnotsaj itech iTekiuajyo toTajtsin. Yejuin xnochimej uelij kichiuaj. Ijkuak Jesús nemiya ipan tlaltikpaktli, yejua xokinkauili demonios itech matenojnotsakan (Luc. 4:41). Aman, ijkuak yakaj kineki tenojnotsas imiuan iteixpantijkauan Jehová, kachtopa noneki kichiuas tlen Jehová kineki. ¿Niman kenon tikteititiaj ika tikpatiojkaitaj yejuin tekitl tlen yotechmakakej? Tla nochipa titenojnotsaj maski san kanon tikistinemij. Matikchiuakan ijkon ken Jesús: matokojtilikan matitenojnotsakan niman matitemachtikan tlen melauak (Mat. 13:​3, 23; 1 Cor. 3:6).

9. ¿Tlenon yonotekitilti para ijkon makimatikan itoka toTajtsin?

⁹ Jesús okiteijli kenon itoka toTajtsin. Ijkuak yejua okichiuj se teoyotl, okijto ika yokitemachistilijka itoka iTaj (Juan 17:26). Ijkon ken Jesús, ikalpan toTajtsin kineki nochimej makimatikan itoka toTajtsin. Ika yejon, yokichijchiuj Traducción del Nuevo Mundo, niman ompa yonotlali itoka toTajtsin kampa noneki nestos. Yejuin Biblia yonotlajtolkuep ipantsin 270 tlajtoltin, seki nochi Biblia yonotlajtolkuep niman okseki san tlajko yonotlajtolkuep. Ipan folleto Tlen tepaleuiya timomachtis iTlajtol toTajtsin, páginas 1-5 niman 6-13 kijtoua kanon oksejpa yonotlali itoka toTajtsin. Niman ipan apéndice C, tlen onka ipan Biblia de estudio, kijtoua tleka ipan Tlajkuiloltin ika Griego noneki nestos 237 veces itoka toTajtsin.

10. ¿Tlenon techmachtia tlen ipan opanok se siuatsintli akin chanti Myanmar?

¹⁰ Ijkon ken Jesús okiteijli kenon itoka iTaj, tejuamej noijki tiknekij tikinpaleuiskej oksekimej makimatikan itoka toTajtsin. Ne Myanmar, se tokniuj okinojnots se siuatsintli akin kipiaya 67 xiuitl. Yejua okijli kenon itoka toTajtsin niman yejuin siuatsintli hasta opeuj choka niman okijli tokniuj: “Kemach aman nijkaki itoka toTajtsin. […] Yotinechmachti itlaj tlen melak ueyi kijtosneki”. Tlen ipan opanok yejuin siuatsintli, techititia ika ijkuak tikteijliaj itoka toTajtsin, melak kinpaleuiya akin kipiyaj kuajli inyojlo.

MATIKTEITITIKAN IKA TITLANELTOKAJ ITECH IKALPAN TOTAJTSIN

11. ¿Kenon tlayekankej uelis kiteititiskej ika tlaneltokaj itech ikalpan Jehová? (Noijki xkita tlaixkopinajli).

¹¹ Ikalpan Jehová kimijlia tokniuan tlayekankej tlenon noneki kichiuaskej. Ika yejon, yejuamej noneki kuajli kiamapouaskej tlen kinmakaj niman nokojtiliskej para ijkon kichiuaskej. Matikonteneuakan yejuin. Yejuamej kimijliaj kenon noneki nopanoltis se tlamachtijli ipan tlanechikojli niman kenon noneki nochiuas teoyotl. Noijki kimijliaj kenon noneki kintlajpiyaskej iborreguitos Cristo. Ijkuak tlayekankej nokojtiliaj kichiuaskej nochi tlen ikalpan toTajtsin kimijlia, tokniuan uelij kitaj kenon Jehová kintlasojtla niman kintlajpiya.

12. a) ¿Tleka noneki matikintlakamatikan akin techyekanaj? (Hebreos 13:​7, 17). b) ¿Tleka xnoneki san matikitstokan kenon nopopolouaj tlayekankej?

¹² Ijkuak techijliskej tokniuan tlayekankej tlenon tikchiuaskej, matikintlakamatikan ika nochi toyojlo. Tla ijkon tikchiuaj, xkintekiyomakas kichiuaskej intekiyo. Biblia kijtoua matikintlakamatikan akin techyekanaj (xpoua Hebreos 13:​7, 17). Kanaj kemantika xmás tiknekiskej tikintlakamatiskej pampa yejuamej noijki tlajtlakolejkej. San ika, tla san tikitstokej kenon nopopolouaj tokniuan tlayekankej, peuas xkuajli intech titlanemiliskej niman xok titlaneltokaskej itech ikalpan Jehová, niman yejon tlen kinekij totlauelikniuan. San ika ¿tlenon uelis techpaleuis nimantsin matikitakan ijkuak kinekiskej techkajkayauaskej totlauelikniuan?

MAKA MATECHKAJKAYAUAKAN

13. ¿Tlenon kiteijliaj totlauelikniuan itech ikalpan Jehová?

¹³ Totlauelikniuan kijtouaj ika tlen kichiua ikalpan toTajtsin xkuajli. Yejuamej xkuelitaj ika tiktlakamatij tlen kijtoua Biblia. San seki matikteneuakan. Biblia kijtoua ika akin kitekichiuiliaj Jehová noneki chipaujkanemiskej. Noijki kijtoua ika tla yakaj kichiua se tlajtlakojli niman xnoyolkuepa, noneki kikixtiskej itech tlanechikojli (1 Cor. 5:​11-13; 6:​9, 10). Niman pampa ijkin tikchiuaj, totlauelikniuan kijtouaj ika tejuamej xkuajli tlen tikchiuaj, xtitetlasojtlaj niman ika melak toueyimatij.

14. ¿Akinon kichiua maka kuajli matlajtokan itech ikalpan Jehová?

¹⁴ Matikilnamikikan ika Satanás yejua akin techixnamiktika. Satanás, “imintataj on yejuan tlakajkayauaj”, kichiua maka kuajli matlajtokan itech ikalpan Jehová (Juan 8:44; Gén. 3:​1-5). Yejua kintekitiltia tlaltikpakchanejkej para makijtokan tlen xmelauak. Yejuin xtechmojkatlachialtia pampa yejua ijkon yokichiujka ipan kachtopa siglo.

15. ¿Tlenon okichiujkej akin tlayekanayaj ipan tlaneltokiltin?

¹⁵ Satanás okichiuj makitlajtolchijchiuilikan Jesús, iKoneuj toTajtsin, maski yejua xkipiaya tlajtlakojli niman kichiuaya miyek milagros ijkuak nikan nemiya. Sejpa, akin tlayekanayaj ipan tlaneltokiltin okijtojkej ika Jesús tlayekanketl katka “intech nochimej on xkuajkualtin espíritus” (Mar. 3:22). Niman ijkuak kiyolkuitijtoyaj, okitlajtlakoltijkej ika yejua yokiuijuikaltijka toTajtsin niman okimijlijkej tlaltikpakchanejkej makijtokan makimiktikan Jesús (Mat. 27:20). Sakin, ijkuak inomachtijkauan Cristo opeuj tenojnotsaj, intlauelikniuan “okimajkomankej niman tlamach okinmijlijkej on yejuan xhebreos para ma kualanikan intechkopa on tokniuan” niman ijkon makintlaueltokakan (Hech. 14:​2, 19). La Atalaya del 1 de diciembre de 1998 otlajto itech Hechos 14:2. Ompa onoijto ika judíos akin kitlauelitayaj ikalpan toTajtsin xokinejkej makinnojnotsakan niman opeuj kijtouaj tlen xmelauak para ijkon oksekimej noijki maka makinekikan kinkakiskej tokniuan niman makintlauelitakan.

16. ¿Tlenon noneki tikilnamikiskej tla tijkakij tlen xkuajli itech ikalpan Jehová?

¹⁶ Satanás ok kikajkayaujtinemi “nochi tlakatl chanej ipan in tlaltikpaktli” (Apoc. 12:9). Ika yejon, kemantika tijkakij tlen xkuajli itech ikalpan Jehová noso intech tokniuan akin techyekanaj. San ika, ijkuak ijkon tijkakiskej, matikilnamikikan ika yeuejkaui noijki okintlajtolchijchiuilijkej Jesús niman inomachtijkauan. Noijki, Biblia yokijtojka ika iteixpantijkauan Jehová noijki ijkon kinchiuiliskiaj niman kintlaueltokaskiaj (Mat. 5:​11, 12). Tla totlajpiyaj niman tla tikilnamikij akinon tekajkayaujtinemi, itlauelikniuan Jehová xuelis techkajkayauaskej. San ika ¿kenon uelis totlajpiyaskej?

17. ¿Tleka xnoneki tijkakiskej tlen xmelauak? (2 Timoteo 1:13; noijki xkita recuadro “¿Tlenon uelis tikchiuas tla mitsuajtitlaniliaj noso mitsijliaj itlaj tlen xmelauak?”).

¹⁷ Maka matijkakikan tlen xmelauak. Ipan 1 Timoteo 1:​3, 4, apóstol Pablo okijli Timoteo tlenon nonekiya kichiuaskej tokniuan ijkuak kikakiskiaj tlen xmelauak, yejua okijli: “Xkinnauati maka más ma kinkakikan on tlajtoltin yejuan kixnamikij on tlen melauak”. Noijki ijkin okijli Timoteo: “Maka xkinkaki on tlajtlamach cuentojtlajtoltin yejuan kixnamiki on tlen melauak” (1 Tim. 4:7). Tlen okijto Pablo aman noijki techpaleuiya. San matikonnemilikan yejuin: tla se konetl kita ika itlaj tlajkaltok, yejua uelis kajkokuis niman kikuas, san ika, akin iueyi xkeman ijkon kichiuaskia pampa kimatstok ika tsokuiltik niman ika uelis kikualotlas. Noijki ijkon, tejuamej xtijkakij tlen xmelauak pampa uelis techijtlakos, tejuamej san tijkakij “kuajli temachtilistli” tlen melauak (xpoua 2 Timoteo 1:13).

18. ¿Kenon uelis tikteititiskej ika titlaneltokaj itech ikalpan Jehová?

¹⁸ Aman san yeyi tlemach yotikitakej itech kenon ikalpan Jehová kichiua ijkon ken Jesús, san ika, tla más tomachtiaj Biblia, uelis más miyek tikitaskej. Nochipa matikinpaleuikan tokniuan matlaneltokakan itech ikalpan Jehová niman nochipa matiktekichiuilijtokan toTajtsin. Yejua kitekitiltia ikalpan para kichiuas tlen yejua kineki, ika yejon, maka keman matikisakan itech ikalpan (Sal. 37:28). Nochipa matiktlasojkamatikan pampa tinemij ipan ikalpan Jehová, kampa nemij akin melak tetlasojtlaj niman melajkanemij.