Matitenojnotsakan ika toyojlo ijkon ken Jesús

1. ¿Tlenon kichiuaj iteixpantijkauan Jehová tlen sekimej xkichiuaj?

ITEIXPANTIJKAUAN Jehová chikauak tenojnotsaj itech on kuajli tlajtoltin. Yejuin itlaj tlen miyekej xkichiuaj maski kijtouaj ika kichiuaj ken Cristo (Tito 2:14). San ika, kemantika, akin tiiteixpantijkauan Jehová, tikmachiliaj ika xok más ika toyojlo titenojnotsaj. Kanaj titomachiliaj ken se tokniuj akin chikauak tekiti ken tlayekanketl, yejua kijtoua: “Kemantika xnikneki nias nontenojnotsas”.

2. ¿Tleka kemantika xmás tikuelitaj titenojnotsaskej?

² Kanaj xmás tikuelitaj titenojnotsaskej niman kanaj más tikuelitaj tikchiuaskej okseki tekitl ipan ikalpan Jehová, ken tikchijchiuaskej noso tikyektlaliskej se Kajli kampa tosentlaliaj, tikinpaleuiskej tokniuan kampa tlaixpoliui noso tikinyolchikauaskej. ¿Niman tleka más tikuelitaj tikchiuaskej yejon? Pampa ijkuak ijkon tikchiuaj, nimantsin nesi kenijki tepaleuiya totekiyo niman kuajli titomachiliaj. Noijki tikuelitaj pampa titekitij imiuan tokniuan niman tinochimej kuajli titouikaj, titotlasojtlaj niman tikmatij ika kitlasojkamatij niman kipatiojkaitaj tlen tikchiuaj. Niman kanaj xmás tikuelitaj titenojnotsaskej pampa kanaj miyek xiuitl yotiuejkaujkej ika titenojnotsaj ipan san no yejua kaltin niman xmiyekej techkakij. Niman sekimej hasta kualanij ijkuak tikinnojnotsaj. Noijki, tikmatstokej ika uelis más techtlaueltokaskej pampa yenonisiuijtiuj ijkuak tlapopoliuis (Mat. 10:22). Kuakon, ¿tlenon techpaleuis nochipa matitenojnotsakan ika toyojlo? Noso tla xok ika toyojlo titenojnotsaj, ¿tlenon techpaleuis oksejpa matipakikan ijkuak titenojnotsaskej?

3. ¿Tlenon tiuelij itech Jesús ipan Lucas 13:​6-9?

³ Tla tikitaj tlen okichiuj Jesús, techpaleuis nochipa matitenojnotsakan ika toyojlo. Ijkuak yejua nemiya ipan tlaltikpaktli, xkeman okikajkauj ika chikauak tenojnotsa, yej hasta más nokojtiliaya tenojnotsas (xpoua Lucas 13:​6-9). Ipan se neskayotl, Jesús onoteneuj ken se tlakatl akin yeyi xiuitl okitlajpix se higokojtli tlen xkeman otlatlakilti. Niman ijkon onoteneuj pampa maski okinnojnots judíos yeyi xiuitl, xmiyekej onochiujkej inomachtijkauan. San ika, ijkon ken yejon tlakatl xokikajkauj ika okitlajpix higokojtli para matlatlakilti, Jesús noijki xkeman okikajkauj ika tenojnotsa. Yejua hasta más nokojtiliaya kinnojnotsas judíos para matlaneltokakan itech on kuajli tlajtojli.

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli, tikitaskej kenijki Jesús okiteititi ika nochipa ika iyojlo otenojnots, niman más ipan on sa ika tlami chikuasen metstin tlen onen ipan tlaltikpaktli. Tikitaskej naui tlemach tlen okichiuj Jesús niman tlen melak techpaleuis: 1) nochipa okichiuj tlen Jehová kineki, 2) kinmilnamiktoya teotlajtoltin, 3) okineltokak ika Jehová kipaleuiskia niman 4) kimatstoya ika nemiyaj akin kinektoskiaj kikakiskej.

NOCHIPA OKICHIUJ TLEN JEHOVÁ KINEKI

5. ¿Kenijki okiteititi Jesús ika kinekiya kichiuas tlen Jehová kineki?

⁵ Jesús kuelitaya tenojnotsas itech “on kuajli tlajtoltin itech iGobierno toTajtsin” pampa kimatstoya ika yejon tlen kinekiya Jehová (Luc. 4:43). Jesús kinemiliaya ika yejon tlen más nonekiya kichiuas ipan nochi inemilis. Hasta ipan on sa ika tlami metstin ika tenojnotstinemiya, yaya ipan uejueyimej kalpamej niman ipan kalpantsitsintin para kinnojnotsas tlaltikpakchanejkej (Luc. 13:22). Noijki okinmachti inomachtijkauan para matenojnotsatij ijkon ken yejua okichiuj (Luc. 10:1).

6. ¿Kenijki tekitl tlen nochiua ipan ikalpan Jehová kipaleuiya tenojnotsalistli? (Noijki xkimita tlaixkopinaltin).

⁶ Aman, ok noneki matitenojnotsakan itech on kuajli tlajtojli pampa Jehová niman Jesús yejon tlen más kinekij matikchiuakan (Mat. 24:14; 28:​19, 20). Niman nochi tekitl tlen nochiua ipan ikalpan Jehová tepaleuiya ipan tenojnotsalistli. San seki matikonteneuakan. Tikinchijchiuaj Kaltin kampa tosentlaliaj niman ijkon akin tikinnojnotsaj ompa makiueyichiuatij Jehová. Nochi tlen nochiua Betel niman ipan okseki kaltin tepaleuiya para kuajli manotenojnotsa. Niman ijkuak titlapaleuiyaj kampa tlaixpoliui, xsan tikinpaleuiyaj tokniuan ika tlen kinpoloua, noijki tikinpaleuiyaj oksejpa mauelikan nimantsin matenojnotsakan niman makiueyichiuakan Jehová. Maka matikilkauakan ika para Jehová más ueyi kijtosneki tenojnotsalistli. Tla xtikilkauaj yejon, nochipa tiknekiskej chikauak titenojnotsaskej. Se tokniuj tlayekanketl akin itoka János niman chanti Hungría, kijtoua: “Nochipa ninotlalnamiktia ika nion se tekitl tlen nochiua ipan ikalpan Jehová uelis kitekipatlas totenojnotsalis, pampa yejon se tekitl tlen más noneki matikchiuakan”.

7. ¿Tleka kineki Jehová maka matijkajkauakan ika titenojnotsaj? (1 Timoteo 2:​3, 4).

⁷ Tla tikimitaj tlaltikpakchanejkej ijkon ken Jehová kimita, más ika toyojlo titenojnotsaskej. Yejua kineki ika nochimej tlaltikpakchanejkej makikakikan niman makiselikan on kuajli tlajtojli (xpoua 1 Timoteo 2:​3, 4). Yejuin kuajli tlajtojli temakixtia, ika yejon, Jehová kineki techmajmachtis kenijki más kuajli titenojnotsaskej. Yejua yotechmakak folleto Xtetlasojtla: Xtemachti, ompa techijlia kenijki uelis tipeuaskej titenotsaskej niman ijkon uelis peuas tikinmachtiskej tlaltikpakchanejkej para manochiuakan inomachtijkauan Jesús. Maski kanaj aman sekimej xkiseliskej on kuajli tlajtojli, kanaj sakin uelis kiseliskej achto tlamis ueyi tlajyouilistli. Tlen aman tikimijliaj kanaj yejon tlen kinpaleuis makiselikan on kuajli tlajtojli ika tlayekapan. Ika yejon, melak noneki maka matijkajkauakan ika titenojnotsaj.

KINMILNAMIKTOYA TEOTLAJTOLTIN

8. ¿Tlenon okichiuj Jesús pampa kuajli kinmilnamiktoya teotlajtoltin?

⁸ Jesús kimatstoya kenijki nochiuaskiaj teotlajtoltin tlen noteneuaj ipan Biblia, ika yejon, kimatstoya ika san tenojnotsaskia yeyi xiuitl uan tlajko (Dan. 9:​26, 27). Noijki kimatstoya kenijki niman kemanon mikiskia pampa yonoijtojka (Luc. 18:​31-34). Pampa kuajli kinmilnamiktoya teotlajtoltin, Jesús kuajli okitekitilti itiempo para tenojnotsas ika iyojlo niman ijkon uelis tlamis tlen toTajtsin okinauati.

9. ¿Tleka teotlajtoltin techpaleuiyaj ika toyojlo matitenojnotsakan?

⁹ Tla tikinmajsikamatij teotlajtoltin, techpaleuis matiknekikan ika toyojlo titenojnotsaskej. Tikmatij ika sa achijtsin poliui para tlapopoliuis. Tlen aman panotika niman tlen kichiuaj tlaltikpaktlakamej, techititia ika yemelak yepanotok tlen Biblia okijto panoskia ipan itlamiyan tonaltin. Tikajsikamatij ika yenochiujtika teotlajtojli kampa noijtoua ika rey del sur (Reino Unido niman Estados Unidos) niman rey del norte (Rusia niman akin kipaleuiyaj) noixnamikiskiaj (Dan. 11:40). Noijki tikajsikamatij ika on ikxiuan tlamachijchiuajli tlen noteneua ipan Daniel 2:​43-45 kinneskayotia países tlen más uejueyixtokej: Reino Unido niman Estados Unidos. Ijkuak titomachtiaj yejuin teotlajtoltin, más tikneltokaj ika sa achijtsin poliui ijkuak iTekiuajyo toTajtsin kinpopolos nochimej tlaltikpaktekiuajkej.

10. ¿Kenijki noijki techyolchikauaj teotlajtoltin más matitenojnotsakan?

¹⁰ Teotlajtoltin noijki techijliaj itlaj tlen sa tiknektokej tikteijliskej. Tokniuj Carrie, akin tlapaleuiya República Dominicana, kijtoua: “Ijkuak niknemilia tlen kualtsin techmakas toTajtsin ika tlayekapan, nikmachilia ika noneki nochimej nikimijlis. Ijkuak nikita nochi tlen kixnamikij tlaltikpakchanejkej, niknemilia ika Jehová xsan nejua kineki manikmatsto tlen kualtsin kichiuas, yejua kinekiskia nochimej makimatikan”. Teotlajtoltin tlen uajlauej ipan Biblia techilnamiktiaj ika Jehová techpaleuiya ijkuak titenojnotsaj, ika yejon, techyolchikauaj maka matikajkauakan ika titenojnotsaj. Tokniuj Leila, akin chanti Hungría, kijtoua: “Tlen kijtoua Isaías 11:​6-9 nechmachtia ika Jehová san akinon uelis kipaleuis manopatla. Niman yejon nechyolchikaua nochimej manikinnojnotsa maski nesi ika sekimej xkinekij nechkakiskej”. Tokniuj Christopher akin chanti Zambia kijtoua: “Ijkon ken yonoijtojka ipan Marcos 13:​10, on kuajli tlajtojli noteijliskia ipan nochi tlaltikpaktli, niman nejua melak nipaki nitepaleuis manochiua yejon teotlajtojli”. ¿Niman tejua? ¿Katlejua teotlajtojli mitsyolchikaua xtenojnotsa?

OKINELTOKAK IKA JEHOVÁ KIPALEUISKIA

11. ¿Tleka Jesús nonekiya tlaneltokas itech Jehová niman ijkon nochipa tenojnotsas ika iyojlo? (Lucas 12:​49, 53).

¹¹ Jesús kuajli kimatstoya ika Jehová kipaleuiskia nochipa matenojnotsa ika iyojlo. Maski Jesús tenojnotsaya ika tetlakaitalistli, kimatstoya ika on kuajli tlajtojli itech Tekiuajyotl kichiuaskia ika sekimej makualanikan niman makitlaueltokakan (xpoua Lucas 12:​49, 53). Noijki, akin tlayekanayaj ipan tlaneltokiltin melak okitlauelitakej ipampa tlen tenojnotsaya niman miyekpa okiyejyekojkej kimiktiskej (Juan 8:59; 10:​31, 39). Maski ijkon, Jesús xkeman okikajkauj ika tenojnotsa pampa kimatstoya ika Jehová iuan nemiya. Yejua okijto: “Xnoselti ninemi, noTaj, akin onechajtitlan, nouan nemi” (Juan 8:16). Noijki okijto: “Xnoselti nechkaua, pampa nejua nochipa nikchiua tlen yejua kuelita” (Juan 8:29).

12. ¿Tlenon okimijli Jesús inomachtijkauan niman ijkon ok matenojnotsakan maski kintlaueltokaskiaj?

¹² Jesús okimilnamikti inomachtijkauan ika ueliskia kuajli kimatstoskej ika Jehová nochipa kinpaleuiskia. Jesús kimatstoya ika kintlaueltokaskiaj, ika yejon, miyekpa okimijli ika Jehová nochipa imiuan nemiskia para kinpaleuis (Mat. 10:​18-20; Luc. 12:​11, 12). Noijki okimijli ika nonekiya notlajpiyaskej (Mat. 10:16; Luc. 10:3). Niman ika tla sekimej tlaltikpakchanejkej xkinekiyaj kinkakiskej, maka makinchiualtikan (Luc. 10:​10, 11). Noijki okimijli ika ijkuak kintlaueltokaskiaj, macholokan (Mat. 10:23). Maski Jesús tlaneltokaya itech Jehová niman ika iyojlo tenojnotsaya, xyaya kampa nesiya ika ueliskia itlaj xkuajli ipan nochiuaskia (Juan 11:​53, 54).

13. ¿Tleka uelis kuajli tikmatstos ika Jehová mitspaleuis?

¹³ Aman noijki techtlaueltokaj, ika yejon, noneki matechpaleui Jehová para ok matitenojnotsakan ika toyojlo (Apoc. 12:17). ¿Tleka uelis kuajli tikmatstoskej ika Jehová toseselti techpaleuis? Ipampa teoyotl tlen Jesús okichiuj tlen tiknextiaj ipan Juan capítulo 17. Ipan yejon teoyotl, Jesús okitlajtlanili iTaj makintlajpiya iapóstoles, niman Jehová okikak. Ipan amoxtli Hechos tikitaj kenijki toTajtsin okinpaleui apóstoles ika inyojlo matenojnotsakan maski okintlaueltokakej. Ipan iteoyouj, Jesús noijki okitlajtlanili Jehová makintlajpiya nochimej akin tlaneltokaskiaj itech tlen iapóstoles kiteijliayaj. Tejuamej noijki titeuamej itech on akin tlaneltokaskiaj. Kuakon, kuajli matikmatstokan ika Jehová ok kinankilijtos iteoyouj Jesús niman techpaleuijtos ijkon ken okinpaleui apóstoles (Juan 17:​11, 15, 20).

14. ¿Tleka kuajli tikmatstokej ika uelis nochipa titenojnotsaskej ika toyojlo? (Noijki xkita tlaixkopinajli).

¹⁴ Ijkuak más nonisiuijtias ika tlapopoliuis, kanaj más ouijtika tikitaskej ika toyojlo titenojnotsaskej. San ika, Jesús otechijli ika uelis kuajli tikmatstoskej ika nochipa techpaleuiskej (Luc. 21:​12-15). Tejuamej tikchiuaj ijkon ken Jesús niman inomachtijkauan pampa tikinkauiliaj akin tikinnojnotsaj yejuamej makitlapejpenikan tla kinekij techkakiskej noso ka niman ximiuan titokualaniaj. Ipan seki países, xkinkauiliaj tokniuan matenojnotsakan, maski ijkon, yejuamej kiteijliaj on kuajli tlajtojli pampa tlaneltokaj itech Jehová niman xsan intech tlaneltokaj. Ipan kachtopa siglo, Jehová okinmakak ikojtilis itekipanojkauan niman ijkon kuajli makiteijlikan on kuajli tlajtojli. Aman, Jehová noijki techmaka ikojtilis para matitenojnotsakan hasta ijkuak kijtos ika yotlan yejuin ueyi tekitl (2 Tim. 4:17). Kuajli matikmatstokan ika tla titlaneltokaj itech Jehová, uelis nochipa titenojnotsaskej ika toyojlo.

KIMATSTOYA IKA NEMIYAJ AKIN KINEKTOSKIAJ KIKAKISKEJ

15. ¿Kenijki tikmatij ika Jesús kimatstoya ika nemiyaj tlaltikpakchanejkej akin kinektoskiaj kikakiskej on kuajli tlajtojli?

¹⁵ Jesús kuajli kimatstoya ika nemiyaj tlaltikpakchanejkej akin kema kinekiskiaj kikakiskej on kuajli tlajtojli, ika yejon, nochipa ika iyojlo otenojnots. Itlamiyan xiuitl 30, Jesús okitak ika melak miyekej nemiyaj akin kinekiyaj kikakiskej on kuajli tlajtojli niman okijto ika yeskiaj ken se tlatoktli tlen yeueliskia nopixkas (Juan 4:35). Niman ijkuak yopanoka kanaj se xiuitl, ijkin okimijli inomachtijkauan: “Melak miyek tlen noneki nopixkas” (Mat. 9:​37, 38). Niman sakin oksejpa okijto: “Melak miyek tlen noneki nopixkas [ . . . ]. Yejua ika, xtlajtlanilikan akin iyaxka yejuin tlatoktli makinuajtitlani akin pixkaskej” (Luc. 10:2). Jesús kilnamiktoya ika nemiyaj melak miyekej tlaltikpakchanejkej akin kinektoyaj kiseliskej on kuajli tlajtojli, niman ijkuak yakaj kiseliaya, melak yolpakiya (Luc. 10:21).

16. ¿Tlen neskayomej okimijto Jesús para techititis ika nemiskiaj akin kinekiskiaj kikakiskej on kuajli tlajtojli? (Lucas 13:​18-21; noijki xkita tlaixkopinajli).

¹⁶ Jesús okinmachti inomachtijkauan ika nonekiya kimatstoskej ika nemiyaj tlaltikpakchanejkej akin kinektoskiaj kikakiskej on kuajli tlajtojli pampa yejon kinpaleuiskia matenojnotsakan ika inyojlo. Matikimitakan ome neskayomej tlen okimijto Jesús (xpoua Lucas 13:​18-21). Sejpa okijto ika on kuajli tlajtojli itech Tekiuajyotl yeskia ken iteyo mostaza tlen melak noskaltia niman nochiua se ueyi kojtli. Ika yejuin neskayotl, Jesús kinekiya kijtos ika melak miyekej tlaltikpakchanejkej kiseliskiaj on kuajli tlajtojli niman ika xitlaj kiteltiskia ijkon manochiua. Niman sejpa okijto ika on kuajli tlajtojli yeskia ken tlaxokolilistli. Ika yejuin neskayotl, kinekiya kijtos ika melak miyekan noteijliskia on kuajli tlajtojli niman ika miyekej nopatlaskiaj, maski miyekej xnimantsin kitaskiaj. Ika yejuin neskayomej, Jesús okinpaleui inomachtijkauan makitakan ika on tenojnotsalistli kuajli onkisaskia.

17. ¿Tlenon techyolchikaua ok matitenojnotstokan ika nochi toyojlo?

¹⁷ Ijkuak tikitaj kenijki melak miyekej kinpaleuiya pampa notenojnotsa, techyolchikaua maka matijkajkauakan ika titenojnotsaj ika nochi toyojlo. Sejse xiuitl, melak miyekej tlaltikpakchanejkej akin kuajli techkakij yauej Conmemoración niman peuaj nomachtiaj Biblia. Niman melak miyekej peuaj touan tenojnotsaj niman noapolaktiaj. ¿Kechmej tlaltikpakchanejkej poliuij kiseliskej on kuajli tlajtojli? Xtikmatij. San ika, kema tikmatstokej ika Jehová kisentlalijtika “sanoyej miyek tlakatl” akin makisaskej ipan ueyi tlajyouilistli (Apoc. 7:​9, 14). Jehová, akin itlatki on tlatoktli, kimatstok ika ok nemij akin kiseliskej on kuajli tlajtojli. Kuakon, maka matijkajkauakan ika titenojnotsaj.

18. ¿Tlenon tiknekij makitakan tlaltikpakchanejkej?

¹⁸ Akin melauak inomachtijkauan Jesús nochipa yokimixmatkej ika chikauak tenojnotsaj ika nochi inyojlo. Ijkuak tlaltikpakchanejkej okitakej kenijki apóstoles melak yolchikaujkej katkaj niman ika inyojlo tenojnotsayaj, “okinomakakej cuenta ika yejuamej iuan onouikakej Jesús” (Hech. 4:13). Tejuamej noijki tiknekij makitakan tlaltikpakchanejkej ika titenojnotsaj ika toyojlo ijkon ken Jesús okichiuj.