Xkeman san toselti tinemij

1, 2. a) ¿Tleka tikijtouaj ika xkeman san toselti tinemij ijkuak itlaj tikixnamikij? b) ¿Tlenon tikitaskej ipan yejuin tlamachtijli?

TLA tikixnamiktokej itlaj tlen ouijtika, kanaj san toselti titomachiliaj. Kanaj tikmachiliaj kentla tla yotipoliujkej kampa melak kojyo niman xtikmatij kanon ika tiaskej. San ika, xnoneki ijkon titomachiliskej pampa toTaj iluikakchane akin melak techtlasojtla kitstika kenijki titlajyouijtokej niman yejua yotechijli ika xtechkauas. Jehová ijkin kimijlia itekipanojkauan akin itech melajkanemij: “Nejua [ . . . ] nemechpaleuiya” (Is. 41:10).

² Ipan yejuin tlamachtijli tikitaskej naui tlemach tlen kichiua Jehová para techpaleuis: 1) techyekana, 2) techmaka tlen ika titopanoltiskej, 3) techtlajpiya niman 4) techyolseuiya. Yejua kuajli yotechijli ika maski san tlenon matikixnamikikan aman, yejua xkeman techilkauas niman xkeman techkauas. Kuakon, xkeman san toselti tinemiskej.

JEHOVÁ TECHYEKANA

3, 4. ¿Kenijki techyekana Jehová? (Salmo 48:14).

³ (Xpoua Salmo 48:14). Jehová kimatstok ika xueli san toselti titoyekanaj, ika yejon, yejua techyekana. ¿Kenijki kichiua? Ika iTlajtol, Biblia (Sal. 119:105). Jehová kitekitiltia Biblia para techmachtis niman techpaleuis matiktlapejpenikan tlen kuajli niman para matikchiuakan niman matitlanemilikan ijkon ken Jehová. Ijkuak tikchiuaj tlen kijtoua Biblia, más kuajli tinemij, más tiyolpakij niman tikmatij ika uelis tikchiaskej nochipa tinemiskej.a Biblia techmachtia matitetlapojpoluikan niman maka matitetlauelitstokan, maka matitekajkayauakan niman melauak matitetlasojtlakan (Sal. 37:8; Heb. 13:18; 1 Ped. 1:22). Akin ijkon kichiuaj, más kuajli kichiuaj intekiyo ken tajtin, teueuentsitsintin niman más kuajli nouikaj imiuan oksekimej.

⁴ Biblia kinteneua sekimej tlaltikpakchanejkej akin okixnamikkej tlen tejuamej tikixnamikij niman onomachilijkej ken tejuamej (1 Cor. 10:13; Sant. 5:17). Ijkuak tikamapouaj Biblia niman tikchiuaj tlen ompa tiuelij, techpaleuiya ika ome tlemach. Kachtopa, tikitaj ika sekimej noijki okixnamikkej tlen tejuamej tikixnamiktokej niman Jehová okinpaleui matlaxikokan (1 Ped. 5:9). Niman ika ome, tiuelij kenijki uelis tikxikoskej nochi tlen xkuajli topan nochiua (Rom. 15:4).

5. ¿Akinomej kintekitiltia Jehová niman ijkon techyekanas?

⁵ Jehová noijki kintekitiltia tokniuan para techyekanas.b Tlayekankej ipan circuito kintlajpalouaj tlanechikoltin niman kinpanoltiaj tlamachtiltin tlen kichikauaj totlaneltok niman tlen techpaleuiyaj tinochimej kuajli matitouikakan (Hech. 15:​40–16:5). Tlayekankej ipan tlanechikojli noijki kinekij techpaleuiskej kuajli matitouikakan iuan Jehová (1 Ped. 5:​2, 3). Tatajtin kinpaleuiyaj inkoneuan makitlasojtlakan Jehová niman makitlapejpenikan tlen kuajli; noijki kinmachtiaj makiamapouakan inBiblia, mauiyan tlanechikoltin niman nochipa matenojnotsakan (Prov. 22:6). Tokniuan siuamej akin kipiyaj chikauak intlaneltok nokojtiliaj kichiuaskej tlen kuajli niman ijkon akin más ichpokamej intech mauelikan; noijki kimijliaj tlen kinpaleuis niman kualtsin kinyolchikauaj (Tito 2:​3-5).

6. ¿Tlenon uelis tikchiuaskej niman ijkon titokauiliskej matechyekana Jehová?

⁶ Jehová yotechmakak tlen noneki niman ijkon techyekanas. ¿Tlenon uelis tikchiuas niman ijkon timokauilis mamitsyekana niman kenijki uelis tikititis ika tiktlasojkamachilia? Proverbios 3:​5, 6 kijtoua: “Maka xtlali moyojlo itech on tlen tejua tiknemilia ika kuajli. Nochipa xtejtemo on tlen toTEKO kineki”. ¿Tlenon panos tla ijkin tikchiua? “Yejua mitsijlis on tlen kuajli para tikchiuas”. Yejuin kijtosneki ika Jehová techpaleuis maka matitokalaktikan ipan tlaueltin niman más matipakikan. ¡Melak tiktlasojkamachiliaj Jehová ika melak techtlasojtla niman ika techijlia tlen techpaleuis! (Sal. 32:8).

JEHOVÁ TECHMAKA TLEN IKA TITOPANOLTISKEJ

7. Ijkon ken kijtoua Filipenses 4:​19, ¿kenijki techpaleuiya Jehová?

⁷ (Xpoua Filipenses 4:19). Jehová xsan techyekana ijkuak tikchikauaj totlaneltok, yejua noijki techpaleuiya ijkuak tikitaj kenijki tikpiyaskej tlen ika titopanoltiskej, ken tlakuajli, totlaken niman tochan (Mat. 6:33; 2 Tes. 3:12). Tinochimej kemantika titotekipachouaj ipampa tlen ika titopanoltiskej, san ika, Jehová techijlia ika xnoneki sajnoye titotekipachoskej (Mateo 6:25). ¿Tleka? Pampa toTaj kuajli yokimijli itekipanojkauan ika xkeman san inselti kinkauas (Mat. 6:8; Heb. 13:5). Uelis kuajli tikmatstoskej ika Jehová kichiuas tlen yokijto niman techmakas tlen ika titopanoltiskej.

8. ¿Kenijki Jehová okipaleui David?

⁸ Matontlanemilikan kenijki Jehová okipaleui David ijkuak kicholouilijtinemiya tekiuaj Saúl. Ipan yejon xiujtin, Jehová nochipa okinmakak David niman akin iuan kistinemiyaj tlen ika nopanoltiskej. Sejpatipan, David okilnamik tlen ipan opanok niman ijkin okijkuilo: “Nejua oniaj nitelpokatl, niman aman ye niueuentsin. Pero xkaman onikitak sen yolmelajki tlakatl nemi ipan mayantli”. Noijki okijto ika xkeman okitak ika inkoneuan akin yolmelajkej makitlajtlantinemikan tlen kikuaskej (Sal. 37:25). Kanaj ipan monemilis yotikitak kenijki Jehová yomitsmakak tlen ika timopanoltis niman kenijki yokinmakak tokniuan.

9. ¿Kenijki Jehová kinpaleuiya tokniuan akin chantij kampa tlaixpoliui? (Noijki xkimita tlaixkopinaltin).

⁹ Jehová noijki kinmaka itekipanojkauan tlen ika nopanoltiskej ijkuak tlaixpoliui kampa chantij. Ipan kachtopa siglo, ne Jerusalén onkatka apistli, kuakon, tokniuan akin chantiyaj ipan okseki kalpamej okintitlanilijkej tokniuan de Jerusalén tlen ika nopanoltiskiaj (Hech. 11:​27-30; Rom. 15:​25, 26). Ipan yejuin tonaltin, ikalpan Jehová noijki melak tepaleuiya. Ijkuak kanaj tlaixpoliui, Jehová, akin melak tetlasojtla, kinyolmapeua tokniuan niman ijkon makitemakakan tlakuajli, atl, tlakentli niman tlen ika nopajtiskej akin chantij kampa otlaixpoliuj. Sekimej tokniuan kinyektlaliaj inkaluan tokniuan niman Kaltin kampa tosentlaliaj. Noijki nimantsin kitaj kenijki kinyolchikauaskej niman kinchikauiliskej intlaneltok tokniuan akin okipolojkej inkal noso akin onomijkatijkej.c

10, 11. ¿Tlenon mitsmachtia tlen ipan opanok Boris?

¹⁰ Jehová kuelita kitemakas, ika yejon, hasta kinmaka tlen noneki akin ok xekitekichiuiliaj. Tejuamej noijki ijkon tikchiuaj niman tikitaj kenijki tikinpaleuiskej akin xkitekichiuiliaj Jehová (Gál. 6:10). Niman pampa ijkon tikchiuaj, miyekpa noueyiteneua itoka toTajtsin. Matikitakan tlen ipan opanok Boris, se tlakatsintli akin xiteixpantijkauj Jehová. Yejua director ipan se escuela ne Ucrania niman sekimej akin kinmachtiaya iteixpantijkauan Jehová katkaj. Boris nochipa kuajli kinnotsaya niman kintlakaitaya. Ijkuak opeuj guerra ne Ucrania, yejua ocholo ipan okse kalpan kampa xmás itlaj nochiujtoya, niman ompa tokniuan okipaleuijkej. Sakin, oyaj Conmemoración. Boris kilnamiki nochi tlen tokniuan okichiujkej ipampa niman ijkin okijto: “Iteixpantijkauan Jehová melak onechpaleuijkej niman onechtlajpixkej. Melak nikintlasojkamachilia”.

¹¹ Tinochimej uelis titeikneliskej ijkon ken toTaj iluikakchane. Uelis tikinpaleuiskej akin noneki makinpaleuikan maski tla xiteixpantijkauan Jehová (Luc. 6:​31, 36). Tikchiaj ika tla tikimititiaj ika tikintlasojtlaj, makinekikan más kixmatiskej Jehová niman touan makitekichiuilikan (1 Ped. 2:12). San ika, maski xkinekiskej kitekichiuiliskej Jehová, tejuamej kuajli titomachiliskej pampa ijkuak titepaleuiyaj, melak tiyolpakij (Hech. 20:35).

JEHOVÁ TECHTLAJPIYA

12. ¿Tlenon yokijto Jehová kichiuas ipampa ikalpan? (Salmo 91:​1, 2, 14).

¹² (Xpoua Salmo 91:​1, 2, 14). Jehová kuajli yokijto ika nochipa kinchikauilis intlaneltok akin nemij ipan ikalpan niman ijkon uelis nochipa iuan nouikaskej. Yejua xkeman kikauilis Satanás makijtlako ken kiueyichiua ikalpan (Juan 17:15). Niman ijkuak peuas “on temojtij tlajyouilistli”, Jehová kichiuas tlen yokijto: kinchikauilis intlaneltok itekipanojkauan niman kinmakas tlen ika nopanoltiskej (Apoc. 7:​9, 14).

13. ¿Kenijki Jehová toseselti techtlajpiya?

¹³ ¿Niman kenijki Jehová toseselti techtlajpiya? Yejua yotechmakak Biblia niman ijkon matikmatikan tlenon kuajli niman tlenon xkuajli (Heb. 5:14). Ijkuak tikchiuaj tlen tiuelij ipan Biblia, kentla tiktekitiltiskiaj se escudo tlen techpaleuiya maka matikijtlakokan ken titouikaj iuan Jehová. Noijki techpaleuiya matiktlapejpenikan tlen techpaleuis matiyolpakikan niman maka matikualokan (Sal. 91:4). Noijki, Jehová techtlajpiya itechkopa tlanechikojli (Is. 32:​1, 2). Ijkuak titouikaj imiuan akin kitlasojtlaj Jehová niman kitlakamatij, tiyolchikauij niman tikpiyaj kojtilistli para xtikchiuaskej tlen xkuajli (Prov. 13:20).

14. a) ¿Tleka Jehová xnochipa techkixtilia tlen tikixnamikij? b) ¿Tlenon techijlia Salmo 9:10? (Noijki xkita nota).

¹⁴ Yeuejkaui, Jehová okintlajpix itekipanojkauan para maka makinkokokan noso makinmiktikan, san ika, xnochipa ijkon okichiuj. Biblia temachtia ika “san kemanon niman ijkuak xtlaj nochia, nochimej itlaj inpan panoua” (Ecl. 9:​11, TNM). Yeuejkaui niman ipan yejuin tonaltin, Jehová yokitekauili ika itekipanojkauan makintlaueltokakan noso hasta makinmiktikan. ¿Tleka? Para kiteititis ika Satanás san tekajkayaua (Job 2:​4-6; Mat. 23:34). Kema, Jehová xnochipa techkixtilis tlen tikixnamikij, san ika, uelis kuajli tikmatstoskej ika yejua xkeman kinkaua akin kitlasojtlaj (Sal. 9:10).d

JEHOVÁ TECHYOLSEUIYA

15. ¿Kenijki techyolseuiya Jehová ika teoyotl, ika iTlajtol niman itechkopa tokniuan? (2 Corintios 1:​3, 4).

¹⁵ (Xpoua 2 Corintios 1:​3, 4). Tinochimej kemantika titajmanaj, titoyolkokouaj noso tiajmankamikij. Kanaj aman itlaj topan panotika tlen melak techajmankamiktia niman san toselti titomachiliaj. Kanaj tiknemiliaj ika xakaj kajsikamati kenijki titlajyouijtokej, san ika, Jehová kema kajsikamati. Niman xsan yejon, yejua noijki “techyoltlalia ipan nochi on tlen tikijyouiyaj”. ¿Kenijki techyoltlalia? Ika teoyotl, ika Biblia niman itechkopa tokniuan. Ijkuak tikchiuiliaj teoyotl, yejua technankilia ijkuak techmaka yolseuilistli tlen “más ueyi yejuan xakaj uelis kajsikamatis” (Filip. 4:​6, 7). Ijkuak tikamapouaj iTlajtol, tiuelij tlen techpaleuis, tiyolseuij ijkuak tikitaj tlen kichiuas ika tlayekapan niman tikitaj ika yejua melak techtlasojtla. Niman ijkuak tiauej tlanechikoltin, tokniuan techititiaj ika techtlasojtlaj niman techyolchikauaj ika Biblia.

16. ¿Tlenon mitsmachtia tlen ipan opanok Nathan niman Priscilla?

¹⁶ Para tikitaskej kenijki Jehová techyolseuiya niman techyolchikaua itechkopa Biblia, matikitakan tlen inpan opanok Nathan niman Priscilla, akin chantij Estados Unidos. Yeuejkaui, yejuamej onochantitoj kampa nonekiyaj más tenojnotskej. Nathan kijtoua: “Tikmatstoyaj ika Jehová techteochiuaskia”. San ika, sakin ika oajsikej kampa otlapaleuitoj, opeujkej kualoj niman xueliyaj kinextiayaj se tekitl. Kuakon ononek nokuepaskej inchan, san ika, maski ijkon, ok xkipiayaj tomintsin. Nathan kijtoua: “Ninotlajtoltiaya tleka toTajtsin xotechteochiuj ijkon ken tikchiayaj. Hasta opeuj ninotlajtoltia tla onikchiuj itlaj tlen xkuajli”. San ika, sakin, okitakej ika toTajtsin xkeman okinkauj. Nathan oksejpa kijtoua: “Tejuamej tikamapouayaj toBiblia ijkuak tikixnamiktoyaj tlen ouijtika niman yeskia kentla tla se totlasojkaikniuj techyolchikaujtoskia niman techijlijtoskia tlen techpaleuis. Otikitakej ika xnonekiya san tiknemilijtoskej tlen tikixnamiktoyaj, yej nonekiya titlanemiliskej itech kenijki Jehová techpaleuijtoya matitlaxikokan. Niman nochi tlen topan opanok yotechpaleui kuajli matikmatstokan ika Jehová techpaleuis ika tlayekapan maski san tlenon matikixnamikikan”.

17. ¿Kenijki okiyolseuijkej tokniuj Helga? (Noijki xkimita tlaixkopinaltin).

¹⁷ Ken yotikitakej, tokniuan noijki uelis techyolseuiskej. Matikitakan tlen ipan opanok tokniuj Helga, akin chanti Hungría. Miyek xiujtin, okixnamik miyek tlen xkuajli niman yejon okichiuj sajnoye manajmana niman makimachili ika xtlaj ika tepaleui. San ika, aman, ijkuak kilnamiki tlen ipan opanok, kajsikamati ika Jehová okiyolseui itechkopa tokniuan. Yejua okijkuilo: “Jehová nochipa onechpaleui ijkuak nikmachiliaya ika xok nikojtik niman ika xok ueliskia nikchiuas tlen nikchiuaya: nitekitis, niktlajpiyas nokoneuj akin kualo niman nikinxikos okseki tlaueltin tlen nikinpiaya. Ipan yejuin 30 xiuitl yonikitak kenijki Jehová onechyolseui ijkon ken yokijtojka, yejua xkeman onechtlalkaui. Jehová kintekitiltia tokniuan niman ijkon nechyolchikauas. Miyekpa, tokniuan kualtsin nechnotsaj niman kakisti ika melak nechtlasojtlaj. Tokniuan miyekpa nechtitlanilianij mensajes niman amatsitsintin, noijki miyekpa nechijlianij ika kuajli tlen nikchiua, ¡niman ijkin kichiuanij ijkuak más xkuajli ninomachilia!”.

18. ¿Kenijki uelis titeyolseuiskej?

¹⁸ Melak kualtsin ika tejuamej noijki ueli titeyolseuiyaj ijkon ken Jehová. ¿Niman kenijki titeyolseuiyaj? Ijkuak kuajli titekakij, ijkuak titeyolchikauaj ika totlajtoluan niman ijkuak titepaleuiyaj (Prov. 3:27). Niman tejuamej xsan tokniuan tikinyolseuiyaj, noijki tikinyolseuiyaj akin xekitekichiuiliaj Jehová. Tejuamej tikomontaj, tikinkakij niman tikinyolchikauaj ika Biblia akin kixnamiktokej tlen xkuajli, akin kualoj noso akin yonomijkatijkej. Ijkuak tikchiuaj ken toTajtsin akin teyoltlalia, tikinpaleuiyaj tokniuan makixikokan tlen kixnamikij, san ika, xsan yejon, noijki titlapaleuiyaj ika tlaltikpakchanejkej makinekikan kixmatiskej Jehová (Mat. 5:16).

JEHOVÁ NOCHIPA TOUAN NEMIS

19. ¿Kenijki techpaleuiya Jehová, niman kenijki uelis tikchiuaskej ijkon ken yejua?

¹⁹ Jehová melak techtlasojtla, ika yejon, najmana topampa niman xkeman techkaua ijkuak itlaj tikixnamikij. Yejua techtlajpiya ijkon ken se tajtli kitlajpiya ikoneuj akin melak kitlasojtla. Yejua techyekana, techmaka tlen ika titopanoltiskej niman techyolseuiya. Niman tejuamej uelis tikchiuaskej ijkon ken Jehová tla tikinpaleuiyaj niman tikinyolchikauaj akin kixnamiktokej tlen xkuajli. Maski san tlenon matikixnamikikan ipan tonemilis, uelis kuajli tikmatstoskej ika Jehová nochipa touan nemis pampa ijkin yotechijli: “Maka xmomojtikan, pampa nejua nemouan ninemi” (Is. 41:10). ¡Melak techyolseuiya tikmatiskej ika xkeman san toselti tinemiskej tla tinemij iuan Jehová!