Más tipakij ijkuak itlaj tikchiuaj inpampa oksekimej

1, 2. ¿Tleka melak kuajli ika Jehová otexchijchiuj para más matipakikan ijkuak itlaj tiktemakaj xijkon ken ijkuak itlaj tikseliaj?

JEHOVÁ otexchijchiuj para más matipakikan ijkuak itlaj tiktemakaj xijkon ken ijkuak tejuamej itlaj techmakaj (Hech. 20:35). Melauak, ijkuak yakaj itlaj techtlayokolia, noijki tipakij. San ika, más tipakij ijkuak tejuamej itlaj tikchiuaj inpampa oksekimej. Niman melak kuajli ika Jehová ijkon otexchijchiuj. ¿Tleka?

² Pampa sa no tejuamej uelis tikchiuaskej más matipakikan. Tla tikitaj kenijki uelis tikinpaleuiskej oksekimej, más tiyolpakiskej. ¡Melak kualtsin ken Jehová otexchijchiuj! (Sal. 139:14).

3. ¿Tleka Biblia kijtoua ika Jehová se toTajtsin akin yolpaki?

³ Biblia kijtoua ika akin kitemaka tlen kipiya yolpaki, ika yejon, kuajli tikasikamatij tleka Biblia kijtoua ika Jehová se toTajtsin akin yolpaki (1 Tim. 1:11). Jehová yejua kachtopa akin okitemakak tlen kipiya, niman xakaj nemi akin melak miyek makitemaka ijkon ken yejua. Apóstol Pablo okijto ika ipampa toTajtsin, “tiyoltokej, niman titoliniaj niman tinemij” (Hech. 17:28). Niman xsan yejon, “nochi kuajli tetlayokolijli yejuan tikseliaj ualeua” itech Jehová (Sant. 1:17).

4. ¿Tlenon techpaleuis más matiyolpakikan?

⁴ Tla tikchiuaj ijkon ken Jehová, techpaleuis más matiyolpakikan ijkuak itlaj tiktemakaskej. Niman yejon tlen tikitaskej ipan yejuin tlamachtijli (Efes. 5:1). Noijki tikitaskej tlenon uelis tikchiuaskej tla tikitaj ika sekimej xkitlasojkamatij tlen tikchiuaj inpampa. Nochi yejuin techpaleuis maka matijkajkauakan tiktemakaskej tlen tikpiyaj niman más matiyolpakikan.

MATIKTEMAKAKAN TLEN TIKPIYAJ IJKON KEN JEHOVÁ

5. ¿Tlenon techmaka Jehová?

⁵ Matikitakan kenijki Jehová techititia ika kuelita kitemakas tlen kipiya. Yejua techmaka tlen noneki. Kanaj xueyi tomin tikpiyaj, san ika, yejua kita ika tinochimej matikpiyakan tlakuajli, totlaken niman kampa tichantiskej (Sal. 4:8; Mat. 6:​31-33; 1 Tim. 6:​6-8). Jehová xtechmaka nochi yejuin san pampa kinemilia ika noneki techmakas. Kuakon, ¿tleka ijkon kichiua?

6. ¿Tlenon tiuelij ipan Mateo 6:​25, 26?

⁶ Jehová techmaka tlen noneki pampa techtlasojtla. Matikitakan tlen okijto Jesús ipan Mateo 6:​25, 26 (xpoua). Ipan yejuin tlaxeloltin, Jesús otlajto itech totomej niman okijto: “Yejuamej xtôkaj nion pixkaj, nion kejeuaj ipan se kueskontli on tlen kikuaskej”. Niman sakin okijto: “NemoTajtsin iluikak chanej kinmakatikaj tlen kikuaj”. Niman otetlajtolti: “¿Tline nemejuamej xmás nenueyi kijtosnekij xken yejuamej on totomej?”. Jesús kinekiya temachtis ika Jehová más kinpatiojkaita itekipanojkauan xijkon ken yolkamej. Niman tla Jehová kintlajpiya yolkamej, noneki tikmatstoskej ika tejuamej más techtlajpiyas. Kema, Jehová yejua se toTaj akin melak techtlasojtla, niman techmaka tlen techpoloua (Sal. 145:16; Mat. 6:32).

7. ¿Kenijki tikchiuaj ijkon ken Jehová? (Noijki xkimita tlaixkopinaltin).

⁷ Tejuamej tikintlasojtlaj oksekimej niman ijkuak tiuelij, tikinmaka tlen kinpoloua, ijkon ken kichiua Jehová. ¿Tejua tikixmati se tokniuj akin xkipiya tlen kikuas noso xkipiya itlaken? Jehová uelis mitstekitiltis para xpaleui yejon tokniuj. Akin tiktekichiuiliaj Jehová techixmatij pampa tiktemakaj tlen tikpiyaj ijkuak itlaj panoua. Matikteneuakan tlen opanok ijkuak onkatka ueyi kokolistli COVID-19. Sekimej tokniuan okinmakakej tlakuajli, tlakentin niman okseki tlen noneki akin kinpolouaya. Oksekimej okitemakakej intomintsin niman ijkon ueliskia kinpaleuiskej tokniuan ipan nochi tlaltikpaktli. Nochimej yejuin tokniuan okichiujkej ijkon ken kijtoua Hebreos 13:16: “Maka xkelkauakan para nenkichiuaskej on tlen kuajli niman nenkinpaleuiskej oksekimej ika on tlen nenkipiyaj, pampa on yejua uentli yejuan kipaktia Dios”.

8. ¿Tlenon ueli tikchiua pampa Jehová mitskojtilia? (Salmo 138:3).

⁸ Jehová techkojtilia. Jehová melak ueyi kojtilistli kipiya, niman kuelita seki kinmakas itekipanojkauan akin melajkanemij (xpoua Salmo 138:3). ¿Kemantika yotikijlijka Jehová mamitskojtili para uelis tikxikos se tetlatlatalistli noso para uelis tikxikos itlaj tlen tikixnamiktoyaj? ¿Noso kanaj san yotiktlajtlanilijka mamitskojtili para uelis titekitis? Ijkuak tikita ika Jehová mitskojtilia, kanaj titlanemilia ijkon ken teotlajtoketl Isaías, akin okijkuilo: “Yejua, kimaka chikaualistli on yejuan siaui niman yejuan xok kojtik” (Is. 40:29).

9. ¿Kenijki uelis tiktemakaskej tlen tikpiyaj ijkon ken Jehová kichiua? (Noijki xkita tlaixkopinajli).

⁹ Tejuamej xtiuelij tikinpanoltiliaj oksekimej tokojtilis ijkon ken Jehová kichiua. Maski ijkon, uelis tiktemakaskej tlen tikpiyaj ijkon ken Jehová. ¿Kenijki? Tla tiktekitiltiaj tokojtilis para tikinpaleuiskej oksekimej. Uelis tikontlakouiliskej noso tikontlachipauiliskej ichan se tokniuj akin iueyi noso kualo. Niman tla tiuelij, uelis titlachipauaskej noso titlayektlaliskej ipan Kajli kampa tosentlaliaj. Tla tejuamej tiktekitiltiaj tokojtilis para tikchiuaskej nochi yejuin, melak tikinpaleuiskej tokniuan.

10. ¿Kenijki uelis tikinyolchikauaskej oksekimej?

¹⁰ Maka matikilkauakan ika tlen tikimijliaj oksekimej, uelis kinkojtilis. ¿Tikixmati yakaj akin noneki makiyolchikauakan noso makiyolseuikan? Tla kema, uelis tikonitas, tikonnotsas ipan teléfono, tikontitlanilis se mensaje noso itlaj tikijkuilouilis ipan se amatsintli. Maka xnemili ika noneki tikijlis tlen melak kualtsin makakisti, san xkijli tlen kisa ipan moyojlo. Niman tlen tikijlis kanaj kiyolchikauas para mamelajkanemi noso kanaj kichiuas mayolseui (Prov. 12:25; Efes. 4:29).

11. ¿Tlenon kichiua Jehová ika tlamachilistli tlen kipiya?

¹¹ Jehová techmaka tlamachilistli. Santiago ijkin okijkuilo: “Tla semej nemejuamej xnenkimatij on tlen kuajli nenkichiuaskej, xtlajtlanilikan Dios tlamatkilistli [noso tlamachilistli]”. Niman noijki okijto: “Niman yejua miyek mechmakas. Yejua tej, melauak nochimej kinmaka, niman xitlaj kiteixkomaka” (Sant. 1:5). Yejuin techititia ika Jehová xsan yejua kineki kipiyas tlamachilistli, yejua noijki kinektok techmakas. Niman ijkuak techmaka, yejua xtechixkomaka noso xtechpijpinaujtia pampa tiknekij matechyekana. Yejua hasta techijlia matiktlajtlanilikan tlamachilistli (Prov. 2:​1-6).

12. ¿Kemanon uelis tikinmajmachtiskej oksekimej?

¹² ¿Tejuamej noijki uelis tikchiuaskej ijkon ken Jehová niman tikinmachtiskej oksekimej tlen tejuamej tiueltokej? (Sal. 32:8). ¡Kema! Uelis tikinmajmachtiskej kenijki tenojnotsaskej akin kemach peujtokej. Tokniuan tlayekankej uelis kinmajmachtiskej tokniuan tlapaleuijkej niman oksekimej tokniuan tlakamej akin yonoapolaktijkej makichiuakan seki tekitl ipan tlanechikojli. Niman tokniuan tlakamej niman siuamej akin uelij kalchijchiuaj noso tlayektlaliaj uelis kinmajmachtiskej oksekimej matlapaleuikan ipan Kajli kampa tosentlaliaj noso ipan okseki kaltin kampa tikueyichiuaj Jehová.

13. ¿Kenijki uelis tikchiuaskej ijkon ken Jehová ijkuak titemajmachtiskej?

¹³ Ijkuak titemajmachtiskej, noneki tikchiuaskej ijkon ken Jehová. Ken yotikitakej, yejua kinektok kitemakas tlamachilistli. Kuakon, tejuamej noijki noneki tiknektoskej tikinmachtiskej oksekimej tlen tiueltokej. Xnoneki tiknemiliskej ika tla titemajmachtiaj, techkuiliskej totekiyo, nion xnoneki tiknemiliskej: “San yejua manomajmachti, ¡nejua xakaj onechmajmachti!”. Akin tinemij ipan ikalpan Jehová xnoneki ijkon titlanemiliskej. Niman tejuamej xsan tikteijliaj tlen tiueltokej, noijki kuajli titemajmachtiaj (1 Tes. 2:8). Niman ijkon tikchiuaj pampa tiknekij ika akin tikinmajmachtiaj noijki makinmajmachtikan oksekimej (2 Tim. 2:​1, 2). Tla tejuamej tiknektokej titemajmachtiskej, oksekimej noijki miyek ueliskej niman tinochimej tiyolpakiskej.

TLA TIKITAJ IKA XKITLASOJKAMATIJ TLEN TIKCHIUAJ

14. ¿Tlenon panoua ijkuak titepaleuiyaj?

¹⁴ Miyekpa, ijkuak yakaj tikpaleuiyaj, niman más ijkuak tikpaleuiyaj se tokniuj, techititia ika kitlasojkamati. Kanaj sekimej techijkuilouiliaj se amatsintli noso itlaj okse kichiuaj para techititiskej ika techtlasojkamachiliaj (Col. 3:15). Ijkuak ijkon kichiuaj, tejuamej más tiyolpakij.

15. ¿Tlenon noneki tikilnamikiskej ijkuak xtechtlasojkamachiliskej akin tikinpaleuiyaj?

¹⁵ San ika, matikilnamikikan ika xnochimej akin tikinpaleuiskej techtlasojkamachiliskej. Kanaj tiktekitiltiskej totiempo, tochikaualis noso totomintsin para yakaj tikpaleuiskej niman sakin tikitaskej ika nion xkitlasojkamati. Tla ijkon panoua, ¿tlenon techpaleuis maka matajmanakan noso matikualanikan? Matikilnamikikan tlen kijtoua texto kampa onokixti yejuin tlamachtijli, Hechos 20:35. Tejuamej xsan tipakij ijkuak techtlasojkamachiliaj, tejuamej tipakij ijkuak titepaleuiyaj maski akin tikinpaleuiyaj, xkitlasojkamatij. Matikitakan kenijki uelis nochipa tipakiskej.

16. ¿Tlenon noneki tikilnamiktoskej?

¹⁶ Xkilnamiki ika ijkuak tiktemaka tlen tikpiya, tikchiujtok ijkon ken Jehová. Jehová nochimej kinmaka tlen kuajli maski sekimej xkitlasojkamachiliaj (Mat. 5:​43-48). Niman yejua kineki ika itekipanojkauan makitemakakan tlen kipiyaj niman maka makichiakan makinkuepilikan. Noijki ijkin kimijlia: “Tla ijkon nenkichiuaskej, nenkipiyaskej sen ueyi tetlayokolijli” (Luc. 6:35). Kuakon, maka xmajmana tla kemantika sekimej xmitstlasojkamachiliaj. Xkilnamiki ika Jehová mitsteochiuas pampa tikinpaleuiya oksekimej niman pampa tikchiua “ikan paktli” (2 Cor. 9:7; Prov. 19:17).

17. ¿Tlenon techpaleuis matikchiuakan ijkon ken Jehová? (Lucas 14:​12-14).

¹⁷ ¿Tlenon noijki techpaleuis matikchiuakan ijkon ken Jehová? Tla tikchiuaj tlen kijtoua Lucas 14:​12-14 (xpoua). Melauak, yejuin xkijtosneki tla xnoneki kuajli tikinseliskej noso tikinmakaskej tlen tikpiyaj akin uelis techkuepiliskej. San ika ¿tlenon uelis tikchiuaskej tla tikitaj ika tiktemakaj tlen tikpiyaj pampa tiknekij matechkuepilikan? Matikchiuakan tlen okijto Jesús: matikinmakakan tlen tikpiyaj akin tikmatstokej ika xuelis techkuepiliskej. Tla ijkon tikchiuaj, melak tiyolpakiskej pampa tikchiujtoskej ijkon ken Jehová. Noijki, tla xtikchiaj matechkuepilikan ijkuak itlaj tiktemakaskej, nochipa tiyolpakiskej maski xtechtlasojkamachiliskej.

18. ¿Tlenon techpaleuis maka nimantsin matiknemilikan tlen xkuajli intech oksekimej?

¹⁸ Maka nimantsin xnemili tlen xkuajli intech oksekimej (1 Cor. 13:7). Tla yakaj tikpaleuiyaj niman xtechtlasojkamachilia, matotlajtoltikan: “¿Yemelak xkitlasojkamati, noso san okilkauj nechtlasojkamachilis?”. Noijki ueliskia tiknemiliskej tleka xotechtlasojkamachili. Kanaj melak kitlasojkamati, san ika, ouijtika kita kiteititis tlen kimachilia noso kanaj pinaui makipaleuikan pampa kanaj yeuejkaui yejua tepaleuiaya niman aman xok ueli tepaleuiya. San ika, matikilnamikikan ika tla tikintlasojtlaj tokniuan, xnimantsin tiknemiliskej tlen xkuajli intechkopa niman xtijkajkauaskej tikinpaleuiskej ika toyojlo (Efes. 4:2).

19, 20. ¿Tleka melak kuajli tla xtosiaujkauaj? (Noijki xkimita tlaixkopinaltin).

¹⁹ Xtlamachia. Tekiuaj Salomón okijto itlaj tlen melak kualtsin: “Xtlajkali motlaxkal ipan atl; niman más sankin oksejpa tiknextis” (Ecl. 11:1). Yejuin techmachtia ika kanaj sekimej techtlasojkamachiliskej tla yopanok miyek tiempo. Matikitakan tlen ipan opanok se tokniuj.

²⁰ Yeuejkaui, isiuauj se tokniuj tlayekanketl ipan circuito, okitlajkuilouili se tokniuj siuatl akin kemach yonoapolaktijka niman okiyolchikauj mamelajkanemi. Ijkuak opanok kanaj 8 xiuitl, yejon tokniuj okontitlanili se carta isiuauj tlayekanketl niman ijkin okijli: “Nimitstlajkuilouilia pampa nikneki nimitsijlis ika melak yotinechpaleui maski tejua xtikmatiya”. Noijki okijli: “Melak kualtsin tlen otinechijkuilouili. San ika, texto tlen otinechijkuilouili yejon tlen más oajsik ipan noyojlo niman xkeman onikilkauj”.a Sakin ika yokijlijka seki tlen yokixnamijka, ijkin okijli: “Kemantika niknekiya nochi nijkauas niman xok niktekichiuilis Jehová. San ika, yejon texto tlen otinechijkuilouili nechpaleuiaya manitlaxiko. Melak otinechpaleui ipan yejuin 8 xiuitl”. ¡San xkonnemili kenijki melak oyolpak isiuauj tlayekanketl ipan circuito ijkuak okiseli yejuin carta! Tla tejuamej yakaj otikpaleuijkej, kanaj techtlasojkamachilis tla yopanok miyek tiempo.

21. ¿Tleka tiknemilia ika melak kuajli tla tikchiua ijkon ken Jehová?

²¹ Ken yotikitakej, Jehová melak kualtsin ken otexchijchiuj: yejua okichiuj ika más matipakikan ijkuak itlaj tiktemakaskej xijkon ken ijkuak itlaj tikseliskej. Tejuamej melak tiyolpakij ijkuak tikinpaleuiyaj tokniuan niman tikuelitaj ijkuak techtlasojkamachiliaj. Niman maski xtechtlasojkamachiliskiaj, tejuamej tiyolpakij pampa tikchiujtokej tlen kuajli. Kuakon, maski san tlenon matiktemakakan, nochipa matikilnamikikan tlen kijtoua 2 Crónicas 25:9: “ToTEKO uelis mitsmakas más sanoyej miyek xken yejua on”. ¡Xakaj nemi akin melak miyek makitemaka ijkon ken Jehová kichiua! Niman tejuamej melak tiyolpakij pampa yejua techteochiua. Kuakon, nochipa matokojtilikan matikchiuakan ijkon ken Jehová.