¿Kenijki tikitaj itoka Jehová?

1, 2. ¿Kenijki tikmatij ika Jesús melak kipatiojkaitaya itoka Jehová?

XNEMI okse ken Jesús akin más makipatiojkaita itoka Jehová. San yejua melak onokojtili para kitemachiltis itoka Jehová. Ken otikitakej ipan tlamachtijli tlen youajpanok, yejua okinek mikis niman ijkon kichipaujkateneuas itoka Jehová (Mar. 14:36; Heb. 10:​7-9). Niman ijkuak tlamis tekiuajtis Mil Xiuitl, Jesús kinektos kikuepilis iTaj iTekiuajyo pampa kineki kichipaujkaitas itoka Jehová (1 Cor. 15:​26-28). Nochi tlen Jesús okichiuj niman tlen kichiuas ipampa itoka Jehová kiteititia ika melak kitlasojtla iTaj.

² Jesús ouajla ipan tlaltikpaktli niman ijkon tlajtos ipampa Jehová (Juan 5:43; 12:13). Okimititi inomachtijkauan itoka iTaj (Juan 17:​6, 26). Otemachti niman okinchiuj milagros ika itoka Jehová (Juan 10:25). Ijkuak Jesús okichiuj se teoyotl, okinteneuj inomachtijkauan niman ijkin okijli Jehová: “Xkintlajpiya ipampa motoka” (Juan 17:11). Kuakon, tla Jesús melak kipatiojkaitaya itoka Jehová, ¿kenijki yakaj akin kijtoua ika kichiua ken Cristo xkixmati nion xkitekitiltia itoka Jehová?

3. ¿Tlenon tikitaskej ipan yejuin tlamachtijli?

³ Akin melauak tikchiuaj ken Cristo titokojtiliaj tikchiuaskej ken Jesús, ika yejon, tejuamej noijki melak tikpatiojkaitaj itoka iTaj (1 Ped. 2:21). Ipan yejuin tlamachtijli, tikitaskej tleka Jehová yokinmakak itoka akin kiteijliaj on kuajli tlajtojli itech iTekiuajyo toTajtsin (Mat. 24:14). Noijki titomachtiskej kenijki noneki tikitaskej itoka Jehová.

SE KALPAN TLEN KITLAKAITA ITOKA

4. a) ¿Tlenon okimijli Jesús inomachtijkauan ijkuak yenokuepaskia iluikak? b) ¿Tlenon tiknankiliskej?

⁴ Ijkuak Jesús yenokuepaskia iluikak, ijkin okimijli inomachtijkauan: “Nenkiseliskej poder ijkuak espíritu santo nemopan uajlas, niman notech nentlajtoskej ne Jerusalén, ipan nochi Judea niman Samaria, niman hasta kampa más uejka” (Hech. 1:8). Kuakon, on kuajli tlajtoltin xsan noteijliskia ne Israel, noijki noteijliskia ipan miyek kalpamej niman miyekej tlaltikpakchanejkej ueliskiaj nochiuaskej inomachtijkauan Jesús (Mat. 28:​19, 20). San ika, kuajli matikitakan ika Jesús okijto: “Notech nentlajtoskej”. ¿Kijtosnekiya ika akin nochiuaskiaj inomachtijkauan Jesús san tlajtoskiaj itech Jesús, noso nonekiya kixmatiskej itoka Jehová niman ijkon noijki itech tlajtoskiaj? Ipan Hechos capítulo 15 techijlia.

5. ¿Kenijki okiteititijkej apóstoles niman tlayekankej de Jerusalén ika melak nonekiya manomati itoka Jehová? (Noijki xkita tlaixkopinajli).

⁵ Ipan xiuitl 49, apóstoles niman tlayekankej de Jerusalén onosentlalijkej niman ijkon kitaskej tlenon nonekiya kichiuaskej akin xjudíos katkaj para nochiuaskej inomachtijkauan Cristo. Ijkuak otlankej tlajtouaj, Santiago, itlakpaikniuj Jesús, okijto: “Symeón [Pedro] kuajli yotechonijli tlenon opanok ijkuak toTajtsin kachtopa okinseli akin xjudíos para ompa kikixtis se pueblo tlen kitlakaitaskia itoka”. ¿Akinon itoka? Yejua okiteneuj tlen okijto teotlajtojketl Amós niman ijkin okijto: “Para akin nokauaskej makitejtemokan Jehová ika nochi inyojlo imiuan akin xjudíos, akin kitemachiltiaj notoka. Ijkon kijtoua Jehová” (Hech. 15:​14-18). Kuakon, inomachtijkauan Jesús xsan ueliskiaj itech Jehová, noijki yeskiaj se pueblo tlen kitlakaitaskia noso tlen kitokayotiskiaj ika itoka toTajtsin. Yejuin kijtosneki ika kimixmatiskiaj ika itoka Jehová niman kitemachiltiskiaj itoka.

6, 7. a) ¿Tleka ouajla Jesús ipan tlaltikpaktli? b) ¿Tlenon más nonekiya kichiuas Jesús ijkuak ouajla ipan tlaltikpaktli?

⁶ Matikilnamikikan ika itoka Jesús kijtosneki “Jehová toTemakixtijkauj”. Niman Jehová okitekitilti Jesús niman ijkon kinmakixtis akin itech tlaneltokaskiaj. Jesús ouajla ipan tlaltikpaktli niman ijkon kitemakas inemilis topampa (Mat. 20:28). Pampa yejua otlatlaxtlauj, aman ueli techtlapojpoluiyaj niman ueli tikchiaj nochipa tinemiskej (Juan 3:16).

⁷ Aman tej, ¿tleka nonekiya manotemaka se tlaxtlauijli inpampa tlaltikpakchanejkej? Ipampa tlen opanok ipan jardín de Edén. Ijkon ken otikitakej ipan okse tlamachtijli, toachtotajuan Adán niman Eva okixnamikkej Jehová niman xok ouel nochipa onenkej (Gén. 3:​6, 24). San ika, Jesús xouajla ipan tlaltikpaktli san para techmakixtis, noijki ouajla ipampa itlaj tlen más nonekiya: kichipauas itoka Jehová pampa Satanás yokitlajtolchijchiuilijka (Gén. 3:​4, 5). Kuakon, tlaltikpakchanejkej nonekiya kimatiskej ika Jehová xokichiuj tlen xkuajli niman ika itoka chipauak. Jesús otlajto ipampa iTaj niman yejua okichiuj nochi tlen Jehová kinekiya makichiua. San yejua akin más otepaleui manochipaujkateneua itoka Jehová.

8. ¿Tlenon nonekiskia kajsikamatiskej niman kiseliskej akin nochiuaskiaj inomachtijkauan Jesús?

⁸ Nochimej akin nochiuaskiaj inomachtijkauan Jesús, maski tla judíos noso xjudíos katkaj, nonekiya kajsikamatiskej niman kiseliskej ika iTaj Jesús, Jehová, yejua akin kinmakixtiaya (Juan 17:3). Niman, ijkon ken Jesús, yejuamej kimixmatiskiaj ika itoka toTajtsin. Noijki nonekiya makajsikamatikan tleka melak nonekiya makichipaujkaitakan itoka Jehová, pampa san ijkon ueliskiaj makisaskej (Hech. 2:​21, 22). Kuakon, nochimej inomachtijkauan Jesús akin melajkanemiyaj nonekiya ueliskej itech Jehová niman itech Jesús. Niman ipan Juan 17, tikitaj kenijki Jesús otlan kichiua teoyotl: “Yonikimititi motoka, niman nochipa ijkon nikchiuas. Ijkon, tikintlasojtlas ken nejua otinechtlasojtlak niman nejua imiuan ninemis” (Juan 17:26).

“NEMEJUAMEJ NENNOTEIXPANTIJKAUAN”

9. ¿Kenijki uelis tikteititiskej ika melak tikpatiojkaitaj itokayo Jehová?

⁹ Ken yotikitakej, tinochimej akin melauak tikchiuaj ken Cristo melak noneki matikchipaujkaitakan itoka Jehová (Mat. 6:​9, 10). Ika tlen tikchiuaj, noneki tikteititiskej ika tejuamej más tikpatiojkaitaj itokayo Jehová xijkon ken okse tokayotl. ¿Tlenon uelis tikchiuaskej niman ijkon titepaleuiskej manochipaujkaita itoka Jehová niman tikteititiskej ika tlen Satanás okijtouili Jehová xmelauak?

10. ¿Tlenon noijtoua ipan Isaías 42-44? (Isaías 43:9; 44:​7-9; noijki xkita tlaixkopinajli).

¹⁰ Ipan Isaías capítulo 42-44 techijlia tlenon noneki tikchiuaskej niman ijkon manochipaujkaita itoka Jehová. Ipan yejon tlaxeloltin nesi ika teyolkuitilo niman ijkon noitas akinon melauak toTajtsin. Jehová kimijlia akin noteneuaj dioses makiteititikan tla yemelak dioses. Noijki, kitlajtlani mauiyan akin makiteijlikan ika melauak tlen kijtouaj yejon dioses. San ika, xakaj ueli kiteititia yejon (xpoua Isaías 43:9; 44:​7-9).

11. Ijkon ken kijtoua Isaías 43:​10-12, ¿tlenon kimijlia Jehová itekipanojkauan?

¹¹ (Xpoua Isaías 43:​10-12). Jehová ijkin kimijlia itekipanojkauan: “Nemejuamej nennotestigos [ . . . ], nejua ninemoDios”. Niman kintlajtlanilia makiteititikan ika san yejua toTajtsin akin melauak (Is. 44:8). Melak kualtsin ika tejuamej uelis tikteititiskej ika san Jehová melauak toTajtsin niman ika itoka más ueyixtok xken okseki tokayomej. ¿Kenijki uelis tikteititiskej? Ika tlen tikijtouaj niman ika tlen tikchiuaj. Noijki, tlen tiktlapejpeniaj ipan tonemilis kiteititia ika tiktlasojtlaj Jehová ika nochi toyojlo niman ika itech timelajkanemij maski san tlenon matechchiuili Satanás. Ijkuak ijkon tikchiuaj, titlapaleuiyaj manochipaujkaita itoka Jehová.

12. ¿Kenijki onochiuj teotlajtojli tlen nesi ipan Isaías 40:​3, 5?

¹² Teotlajtojketl Isaías noijki yokijtojka ika yakaj kiyektlaliskia “iojui Jehová” (Is. 40:​3, TNM). ¿Kenijki onochiuj yejon teotlajtojli? Juan Teapolaktijketl okiyektlali yejon ojtli para ijkuak uajlaskia Jesús, akin ouajla ika itoka Jehová niman otlajto ipampa itoka Jehová (Mat. 3:3; Mar. 1:​2-4; Luc. 3:​3-6). Isaías noijki okijto: “ToTEKO kiteititis iueyilis” (Is. 40:5). ¿Kenijki onochiuj yejuin? Ijkuak Jesús ouajla ipan tlaltikpaktli, kuajli okiteititi kenijki iTaj, ika yejon, kentla tla Jehová uajlaskia (Juan 12:45).

13. ¿Kenijki uelis tikchiuaskej ken Jesús?

¹³ Ijkuak tikpaleuiyaj itoka Jehová, tikchiuaj ken Jesús. Ijkon ken yejua, tejuamej tiiteixpantijkauan toTajtsin Jehová. Tikpiyaj itoka Jehová niman tikinnojnotsaj tlaltikpakchanejkej itech nochi tlen kualtsin okichijchiuj. San ika, tla tiknekij kuajli tikchiuaskej totekiyo, noijki noneki tikteijliskej nochi tlen okichiuj niman tlen kichiuas Jesús para manochipaujkaita itoka Jehová (Hech. 1:8). Xnemi okse ken Jesús akin melak kuajli matlajto itech Jehová, niman tejuamej tikchiuaj ken yejua (Apoc. 1:5). Aman tej, ¿kenijki noijki tikteititiaj ika itoka Jehová melak ueyi kijtosneki?

KEN TIKTEITITIAJ IKA MELAK TIKPATIOJKAITAJ ITOKA JEHOVÁ

14. Ijkon ken kijtoua Salmo 105:​3, ¿tlenon tikmachiliaj ipampa itoka Jehová?

¹⁴ Titoueyimatij ipampa itoka Jehová (xpoua Salmo 105:3). Jehová melak kuelita matitoueyimatikan ipampa itoka niman matikueyiteneuakan (Jer. 9:​23, 24; 1 Cor. 1:31; 2 Cor. 10:17). Tikueyiteneuaskej itoka Jehová kijtosneki titoueyimatiskej pampa Jehová yejua toTajtsin. Tejuamej melak tipakij pampa ueli tiktlakaitaj itoka niman titlapaleuiyaj manochipaua. Xkeman noneki tipinauiskej tikteijliskej ika tejuamej tiiteixpantijkauan Jehová, maski san kanon matinemikan: kampa titekitij, kampa titomachtiaj noso kampa tichantij. Diablo kineki matijkajkauakan ika tikteijliaj itoka Jehová (Jer. 11:21; Apoc. 12:17). Yejua niman iteotlajtojkauan akin tlakajkayauaj kinekij ika tlaltikpakchanejkej makilkauakan itoka Jehová (Jer. 23:​26, 27). San ika, tejuamej melak tiktlasojtlaj itoka, ika yejon, nochi tonajli tiknekij tikueyiteneuaskej (Sal. 5:11; 89:16).

15. ¿Tlenon kijtosneki tiktekitiltis itoka Jehová?

¹⁵ Ok tiktekitiltiaj itoka Jehová (Joel 2:32; Rom. 10:​13, 14). Tiktekitiltis itoka Jehová xsan kijtosneki tikixmatis itoka niman tikteneuas. Kijtosneki tikixmatis toTajtsin, itech titlaneltokas niman itech timonisiuis para mamitspaleui niman mamitsyekana (Sal. 20:7; 99:6; 116:4; 145:18). Noijki kijtosneki tikimijliskej tlaltikpakchanejkej kenijki itoka Jehová niman tikinnojnotsaskej itech ikualneskayouan, niman tikinyolchikauaskej manoyolkuepakan niman manopatlakan niman ijkon makinseli Jehová (Is. 12:4; Hech. 2:​21, 38).

16. ¿Kenijki uelis tikteititiskej ika Satanás se tlakajkayaujketl?

¹⁶ Tiknektokej titlajyouiskej ipampa itoka Jehová (Sant. 5:​10, 11). Ijkuak timelajkanemij itech Jehová maski titlajyouiyaj, tikteititiaj ika Satanás se tlakajkayaujketl. Ijkuak nemiya Job, Satanás ijkin okijto itech itekipanojkauan Jehová: “Pero tla yakaj kimiktisneki, san tlinon kitemakasneki para nomanauis” (Job 2:4). Satanás kijtosnekiya ika tlaltikpakchanejkej san kitekichiuiliskiaj Jehová ijkuak kuajli nemiskiaj, san ika, ijkuak kixnamikiskiaj tlen xkuajli, kitlalkauiskiaj. Job okiteititi ika yejon xmelauak pampa omelajkanen. Niman tejuamej noijki uelis tikteititiskej ika, maski san tlemach matechchiuili Satanás, xkeman tiktlalkauiskej Jehová. Kuajli tikmatstokej ika Jehová techtlajpiyas ipampa itoka (Juan 17:11).

17. Ijkon ken kijtoua 1 Pedro 2:​12, ¿kenijki noijki uelis tikueyiteneuaskej itoka Jehová?

¹⁷ Tikteititiaj ika tiktlakaitaj itoka Jehová (Prov. 30:9; Jer. 7:​8-11). Pampa tlaltikpakchanejkej kimatstokej ika tiiteixpantijkauan Jehová, tlen tikchiuaj uelis kichiuas manotlakaita noso manotsojkuiloti itoka Jehová (xpoua 1 Pedro 2:12). Ika yejon, tiknekij nochipa titokojtiliskej tikueyiteneuaskej Jehová ika tlen tikchiuaj niman ika tlen tikijtouaj. Tla ijkon tikchiuaj, maski titlajtlakolejkej, uelis titlapaleuiskej manoueyiteneua itoka Jehová.

18. ¿Kenijki noijki tikteititiaj ika más tiknekij manoueyiteneua itoka Jehová? (Noijki xkita nota).

¹⁸ Tikueyiteneuaj itoka Jehová maski sekimej xkuajli techitaj (Sal. 138:2). Tejuamej melak tiktlasojtlaj Jehová niman tikchiuaj tlen yejua kuelita. Niman pampa ijkon tikchiuaj, kemantika tlaltikpakchanejkej techpijpinaujtiaj niman techtejteneuaj.a Jesús okinek makimiktikan ken se xkuajli tlakatl pampa kinekiya manoueyiteneua itoka Jehová. Ken kijtoua Hebreos 12:​2-4, “xokichiuilij cuenta on tlen tepinajtij”, yejuin kijtosneki ika xsan kinemilijtoya tlen xkuajli kijtouiliskiaj. Yejua san kinemilijtoya manochiua tlen kinekiya toTajtsin (Mat. 26:39).

19. ¿Kenijki tikita itoka Jehová, niman tleka?

¹⁹ Melak titoueyimatij ipampa itoka Jehová niman melak tiyolpakij pampa techixmatij ken iteixpantijkauan Jehová. Ika yejon, xtechajmana tla techpijpinaujtiaj noso techtejteneuaj. Tejuamej más tiknekij manoueyiteneua itoka Jehová maski sekimej xkuajli techitaskej. Tejuamej kuajli yotikijtojkej ika nochipa tikueyiteneuaskej Jehová maski san tlenon matechchiuili Satanás. Tla ijkon tikchiuaj, tikteititiskej ika melak tikpatiojkaitaj itoka Jehová ijkon ken Jesús okichiuj.