Kenijki tikteijliskej tlen matepaleui

1. ¿Akinomej noneki tenonotsaskej, niman tleka?

SEKIMEJ melak kimatij kenijki tenonotsaskej noso kitemakaskej consejo, san ika, oksekimej ouijtika kitaj niman pinauij itlaj kiteijliskej. Maski tla tiuelij noso ka, kemantika tinochimej nonekis yakaj tiknonotsaskej. ¿Tleka? Pampa ijkuak tikijliaj se tokniuj tlen noneki kiyektlalis tikititiaj ika tiktlasojtlaj, niman Jesús okijto ika akin kichiuaskiaj ken yejua noneki notlasojtlaskej (Juan 13:35). Noijki, Biblia kijtoua ika ijkuak yakaj tikijliaj tlen kipaleuis, kichiuas más kuajli iuan matouikakan (Prov. 27:9).

2. ¿Tlenon noneki kimatiskej tlayekankej niman tleka? (Noijki xkita recuadro “Ken tikteijlis tlen tepaleui ipan totlanechikol itlajkotian semana”).

² Tlayekankej noneki kimatiskej kenijki tetlakanojnotsaskej pampa Jehová niman Jesús yokinmakakej se kualtsin tekitl: makitlajpiyakan tokniuan ipan tlanechikojli (1 Ped. 5:​2, 3). ¿Kenijki kichiuaj intekiyo? Kichiuaj ijkuak ipan intlamachtil techilnamiktiaj ika Biblia tlenon noneki tikchiuaskej. Noijki toseselti technonotsaj niman ijkon techijliskej tlen techpaleuis, niman kinpaleuiyaj mauajnokuepakan akin yokitlalkauijkej ikalpan Jehová. ¿Kenijki tlayekankej niman tejuamej uelis tikteijliskej tlen tepaleuis ijkuak noneki?

3. a) ¿Tlenon techpaleuis kuajli matitenonotsakan? (Isaías 9:6; noijki xkita recuadro “Matikchiuakan ken Jesús ijkuak titenonotsaskej”). b) ¿Tlenon tikitaskej ipan yejuin tlamachtijli?

³ Matikitakan kenijki sekimej akin kinteneua Biblia okiteijlikej tlen otepaleui niman ijkon tiueliskej intech yejuamej. Niman akin más kuajli ijkon okichiuj, katka Jesús, akin Biblia kitokayotia “Kuajli Tetlakanonotsketl” (xpoua Isaías 9:6). Ipan yejuin tlamachtijli tikitaskej tlenon uelis tikchiuaskej ijkuak yakaj techtlajtlanilia matiknonotsakan niman ijkuak yakaj noneki tiknonotsaskej maski xtechtlajtlanilia. Noijki tikitaskej tleka melak noneki matikteijlikan tlen tepaleuis ijkuak noneki niman san ken kinamiki.

IJKUAK YAKAJ ITLAJ TECHTLAJTOLTIS

4, 5. ¿Tlenon uelis totlajtoltiskej ijkuak yakaj itlaj techtlajtoltia? Xkijto se neskayotl.

⁴ ¿Tlenon noneki tikchiuaskej ijkuak yakaj itlaj techtlajtoltia? Kanaj kualtsin tomachiliskej niman tiknekiskej nimantsin tiknankilijtiuetsiskej. San ika, más kuajli tla achto totlajtoltiaj yejuin: “¿Kuajli nikmatstok itech tlen nechtlajtoltia para uelis nikijlis tlen kipaleuis?”. Kemantika, más titepaleuiskej tla tiktejtemouaj yakaj akin más kimatstok itech tlen otechtlajtoltijkej niman yejua makipaleui.

⁵ Matikonnemilikan ika se toamigo kipiya se kokolistli. Yejua techijlia ika yokitejtemo kenijki uelis nopajtis niman techtlajtoltia katlejua más kuajli yes ika nopajtis. Kanaj tejuamej kuajli tikmatstokej tlenon tikchiuaskiaj. San ika, tla tejuamej xtitlapajtijkej noso xotitomachtijkej itech yejon kokolistli, más kuajli tla tikpaleuiya makitejtemo yakaj akin kema kimatstok itech yejon kokolistli.

6. ¿Tleka más kuajli tla xnimantsin titenankiliaj ijkuak itlaj techtlajtoltiaj?

⁶ Kemantika uelis tiknemiliskej ika melak tikmatstokej itech tlen techtlajtoltia niman uelis nimantsin titenankiliskej. San ika, más kuajli yes tla tochiaj niman xnimantsin titenankilijtiuetsij. ¿Tleka? Pampa ipan Proverbios 15:​28, kijtoua ika “on tlakatl yejuan yolmelajki, achtoj kuajli tlanemilia ijkuak tenankilia”. Ika yejon, maski tla tikmatij kenijki titenankiliskej, más kuajli tla kachtopa tomachtiaj itech tlen otechtlajtoltijkej, itech titlanemiliaj niman tikchiuaj teoyotl. Tla ijkon tikchiuaj, tikteijliskej tlen Jehová kuelita. Matikitakan tlenon ipan onochiuj Natán.

7. ¿Tlenon techmachtia tlen ipan onochiuj Natán?

⁷ Ijkuak David okijli Natán ika kinekiya kichijchiuas iteopan Jehová, yejua nimantsin okijli ika kuajli tlen kinemilijtoya. San ika, Jehová xkinekiya ika David makichijchiuili iteopan. Kuakon, Natán kachtopa nonekiya kitlajtoltis Jehová achto kinankilis David (1 Crón. 17:​1-4). Yejuin techmachtia ika ijkuak yakaj techtlajtoltis ken tikitaj tlen kinemilijtika kichiuas, xnoneki nimantsin titlajtoskej (Sant. 1:19).

8. Xteneua okse tleka más kuajli tla xnimantsin titenankiliaj

⁸ Matikteneuakan okse tleka más kuajli tla xnimantsin titenankiliaj ijkuak itlaj techtlajtoltiaj. Pampa kanaj tlen tikijliskej kichiuas ika itlaj makitlapejpeni niman tla xkuajli okisato noijki totlajtlakol yes. Ika yejon, melak kuajli tla kachtopa tiknemiliaj tlen tikteijliskej.

IJKUAK TITENONOTSAJ MASKI XTECHTLAJTLANILIAJ

9. ¿Tlenon noneki kimatstoskej tlayekankej achto kitlakanojnotsaskej se tokniuj? (Gálatas 6:1).

⁹ Kemantika, tlayekankej nonekis kitlakanojnotsaskej se tokniuj akin “okichiuj itlaj tlen xkuajli”, ijkon ken kijtoua Gálatas 6:1 (xpoua). Yejuin kijtoskej ijkuak se tokniuj peua kichiua tlen xkinamiki tlen sakin uelis kichiuas matlajtlako. Tlayekankej kiyejyekoskej kipaleuiskej tokniuj maka matlajtlako niman ijkon xkipolos nemilistli tlen xkeman tlamis (Sant. 5:​19, 20). San ika, kachtopa noneki kuajli kimatiskej tla tokniuj yemelak yopeuj kichiua tlen xnoneki. Matikilnamikikan ika Jehová techkauilia matijkuikan totlamachilis niman san notejuamej matiktlapejpenikan tlen tikchiuaskej (Rom. 14:​1-4). San ika, tla tlayekankej kitaj ika yejon tokniuj yemelak yopeuj kichiua tlen xkuajli, ¿kenijki uelis kinonotsaskej?

10-12. ¿Tlenon noneki kichiuaskej tlayekankej ijkuak kinonotsaskej se tokniuj akin xokintlajtlanili? Xkijto se neskayotl (noijki xkimita tlaixkopinaltin).

¹⁰ Tlayekankej ouijtika kitaj kinonotsaskej yakaj akin xokintlajtlanili makipaleuikan. ¿Tleka? Pampa apóstol Pablo okijto ika uelis yakaj kichiuas tlen xkuajli niman xkitas. Kuakon, achto kinonotsaskej se tokniuj, tlayekankej noneki kichiuaskej seki tlemach tlen kipaleuis tokniuj makinkaki.

¹¹ Matikitakan se neskayotl. Achto tiktokaskej se xinachtli ipan tlajli tlen melak chikauak noso tepitstik, kachtopa noneki titlalxoponiskej para tikyemaniliskej tlajli niman uelis noskaltis tlen tiktokaskej. Sakin tiktokaskej niman tikatekiskej. Noijki ijkon, se tlayekanketl noneki kichiuas seki tlemach achto kinonotsas se tokniuj akin xokitlajtlanili. Yejon tokniuj uelis nimantsin kiselis tlen kijliskej tla tlayekanketl kixmatij ken yakaj akin melak tetlasojtla niman kualtsin tenotsa. Ijkuak tlayekanketl kitas ika kuajli yes iuan tlajtos tokniuj, uelis kijlis ika kineki itlaj kijli pampa melak kitlasojtla.

¹² Ijkuak nonojnotstokej, tlayekanketl uelis “kiyemanilis tlajli”, uelis ijkin kichiuas tla kijlia ika tinochimej topopolouaj niman kemantika noneki matechijlikan tlen xkuajli tikchiujtokej (Rom. 3:23). Tlayekanketl kitekitiltis Biblia niman ijkon san kualtsin kimelajkaijlis tlen xkuajli kichiujtika. Niman tla yejon tokniuj yokasikamat ika xkuajli tlen kichiujtika, tlayekanketl “kitokas xinachtli”, kijtosneki, kijlis tlenon uelis kichiuas niman ijkon nopatlas. Tla yotlankej tlajtouaj, tlayekanketl “katekis xinachtli”, kijtosneki, kijlis tokniuj tlen kuajli kichiua niman iuan kichiuas teoyotl (Sant. 5:15).

13. ¿Tlenon uelis kichiuaskej tlayekankej para kimatiskej tla itlaj kuajli okiteasikamachiltijkej?

¹³ Kemantika se tlayekanketl uelis kijtos itlaj tlen tokniuj okse tlamantik kasikamatis. ¿Tlenon uelis kichiuaskej tlayekankej para maka itlaj xkuajli teasikamachiltiskej? Tlayekankej uelis kitlatlajtoltiskej tokniuj niman ijkon kitaskej tla kema okasikamat tlen okijlijkej niman tla okasikamat tlenon noneki kichiuas (Ecl. 12:11).

MATIKITAKAN KEMANON NIMAN KENON TIKTEIJLISKEJ TLEN TEPALEUIS

14. ¿Tleka xnoneki tiknonotsaskej yakaj ijkuak tikualantokej?

¹⁴ Pampa tinochimej titlajtlakolejkej kemantika uelis tikchiuaskej noso tikijtoskej itlaj tlen kinkualanis oksekimej (Col. 3:13). Biblia kijtoua ika kemantika uelis imiuan tokualaniskej oksekimej (Efes. 4:26). San ika, xnoneki tiknonotsaskej yakaj ijkuak tikualantoskej. ¿Tleka? “Pampa ijkuak sen tlakatl kualani, yejua xkichiua on tlen Dios kuelita” (Sant. 1:20). Tla tiknonotsaj yakaj ijkuak tikualantokej, uelis kichiuas más maueyiya tlauejli. Yejuin xkijtosneki tla xkeman nonekis tikijliskej yakaj akin otechyolkoko ken tomachiliaj. San ika, más kuajli tla titlajtouaj ijkuak xok tikualantokej. Matikitakan kenijki uelis tikchiuaskej ken Elihú, akin kuajli okinonots Job.

15. ¿Tlenon tiuelij itech tlen okichiuj Elihú? (Noijki xkita tlaixkopinajli).

¹⁵ Elihú kikaktoya miyek tonaltin kenijki Job kijtojtoya tlen xokuelitak itech tlen okijlikej iamigos. Maski Elihú kikneliaya Job, yejua melak okikualani ijkuak Job okijto miyek tlen xmelauak itech Jehová. Maski ijkon, otlamachix hasta ijkuak yeueliskia tlajtos. Yejua san kualtsin niman ika tetlakaitalistli okinonots Job (Job 32:2; 33:​1-7). Tlen okichiuj Elihú, techititia ika ijkuak yakaj tiknonotsaskej melak noneki matikitakan kemanon niman kenon tikchiuaskej, kijtosnekij matitlajtokan ika tetlakaitalistli niman ika tlasojtlalistli (Ecl. 3:​1, 7).

MATIKTEIJLIKAN TLEN TEPALEUIS NIMAN MATIKSELIKAN IJKUAK TECHNONOTSASKEJ

16. ¿Tlenon tiuelij itech Salmo 32:8?

¹⁶ Texto kampa onokixti yejuin tlamachtijli techititia ika ijkuak Jehová technonotsa noijki techitstika (xpoua Salmo 32:8). Yejuin kijtosneki ika ijkuak yejua technonotsa, techitstok niman ijkon techpaleuis matikchiuakan tlen otechijli. ¡Melak kuajli ken kichiua! Ijkuak yakaj tiknonotsaskej, matikchiuakan ken Jehová, matikitstokan ken uelis tikpaleuiskej para makichiua tlen otikijlijkej.

17. ¿Tlenon uelis tikijtoskej intech tlayekankej akin kitekitiltiaj Biblia para kijliskej yakaj tlen noneki kiyektlalis? (Isaías 32:​1, 2).

¹⁷ Aman, melak noneki matikteijlikan tlen tepaleuij niman matikselikan ijkuak technonotsaskej (2 Tim. 3:1). Tlayekankej akin kitekitiltiaj Biblia ijkuak kijliaj yakaj kampa noneki noyektlalis yeskiaj ken atl “yejuan ika natekiya kampa tlaluakkan” (xpoua Isaías 32:​1, 2). Melak tiktlasojkamatij tikinpiyaskej toamigos akin kimatij tlen tiknekij tijkakiskej, san ika, noijki noyolchikauaj techijliskej tlen noneki tijkakiskej. Tlen techijliaj yeskia “ken sen manzana de oro yejuan kitemakaj ipan sen kajxitl de plata” (Prov. 25:11). Matokojtilitokan matikteijlikan tlen tepaleuis niman matikselikan ijkuak technonotsaskej.