Matitlanemilikan itech tlen kichikaua totlaneltokil

1, 2. ¿Tleka melak titlamantikej noso tisejnekamej ken yolkamej?

TLALTIKPAKCHANEJKEJ melak tisejnekamej noso titlamantikej itech yolkamej. Xnemili, tejuamej ueli titlajtouaj, titlajkuilouaj, tikpouaj se amoxtli niman tikasikamatij tlenon techijliaj oksekimej. Tiuelij tikchiuaj teoyotl niman tikuikatlaliliaj Jehová. Ixtlamatkej xuelij kuajli kasikamatij kenon totsontekon ueli kichiua nochi yejuin tlemach.

² Jehová xsan otexchijchiuj matiuelikan titlajtoskej, noijki otexchijchiuj ika itlaj tlen kichiua matitlamantijkej noso tisejnekamej itech yolkamej (Salmo 139:​14; Apocalipsis [Revelación] 4:​11). Pampa yotexchijchiuj ken “itlachialis”, yejua techkauilia tejuamej matiktlapejpenikan tlen tikchiuaskej (Génesis 1:​27). Kuakon tejuamej uelis tiktlapejpeniskej tla tijkuiskej totlajtol ika tikueyichiuaskej niman tiktekichiuiliskej Jehová.

3. ¿Tlenon yotechmakak Jehová niman ijkon kuajli matiktlapejpenikan tlen tikchiuaskej?

³ Jehová yotechmakak Biblia niman ijkon matikmatikan kenon tikueyichiuaskej niman tiktekichiuiliskej. Ipan yejuin tonajli uelis nopouas nochi Biblia noso san seki, ipantsin 2,800 tlajtoltin. Ijkuak tikpouaj Biblia niman itech titlanemiliaj, tomachtiaj titlanemiliskej ken Jehová (Salmo 40:5; 92:5; 139:​17). Tla titlanemiliaj ken yejua, uelis kuajli tiktlapejpeniskej tlen tikchiuaskej niman tikpiyaskej nemilistli tlen xkeman tlamis (xpoua 2 Timoteo 3:​14-​17).

4. a) ¿Tlenon kijtosneki titlanemilis? b) ¿Tlenon tiknankiliskej ipan yejuin tlamachtijli?

⁴ Titlanemilis kijtosneki ijkuak san itech se tlemach melak kuajli titlanemilis (Salmo 77:​12; Proverbios 24:​1, 2). Melak noneki matikxelokan tiempo niman ijkon matitlanemilikan itech tlen tomachtiaj itech Jehová niman Jesús (Juan 17:3). Ipan yejuin tlamachtijli tiknankiliskej yejuin tlajtoltilistin: ¿Kenon uelis xouijtika matitlanemilikan? ¿Itech tlenon uelis titlanemiliskej? ¿Tlenon uelis techpaleuis nochipa titlanemiliskej niman tikuelitaskej tikchiuaskej?

TLENON UELIS TECHPALEUIS MATITLANEMILIKAN

5, 6. ¿Tlenon techpaleuis matikilnamikikan tlen tikpouaj niman kuajli matikasikamatikan?

⁵ Tlaltikpakchanejkej tiuelij tikchiuaj seki tlemach maski xipan titlanemiliaj, ken timijyotis, tinejnemis noso tikistinemis ipan bicicleta. San ika ¿noijki topan nochiua ijkuak tiamapouaj? Kanaj uelis titlaamapouaskej niman noijki titlanemilijtoskej ipan okse tlemach. ¿Tlenon uelis tikchiuaskej maka ijkon mapano? Noneki tiknemiliskej itech tlenon kijtosneki tlen tikpoujtokej. Niman ijkuak titlamij se párrafo noso miyek párrafos matotlajtoltikan: “¿Tlenon nechmachtia tlen yonikpouj? ¿Yemelak kuajli nikasikamati?”.

⁶ Ixtlamatkej yokitakej ika melak xouijtika tikilnamikij ijkuak kakisti tlen tikpouaj. Jehová kimatstika yejuin pampa yejua otexchijchiuj. Ika yejon, okijli Josué makipoua amoxtli tlen kipiya tlanauatiltin “xchikauak” makakisti, kijtosneki ken tla sa ichtaka nonojnotstoskia (xpoua Josué 1:8).a Ijkuak ijkon tikpouaskej Biblia, techpaleuis san ipan matitlanemilikan niman matikilnamikikan tlen tikpouaj.

7. ¿Kanon niman kemanon noneki titlanemiliskej? (Xkita tlaixkopinajli kampa peua tlen tomachtijtokej.)

⁷ Kema, kemantika ouijtika tikitaj titlanemiliskej ijkuak tomachtiaj. Kanaj tisiaujtokej noso itlaj kastitok kampa tinemij. Ika yejon, noneki titlanemiliskej kampa maka itlaj makakisti tlen matechpajsolo. Se neskayotl, David tlanemiliaya ika yeuajli (Salmo 63:6). Jesús kitejtemouaya kichiuas teoyotl kampa xakaj makipajsolo (Lucas 6:​12).

ITECH TLENON NONEKI TITLANEMILISKEJ

8. a) ¿Itech tlenon uelis titlanemilis? b) ¿Kenon nomachilia Jehová ijkuak tikinnojnotsaj oksekimej?

⁸ Xsan uelis tiknemiliskej tlen kijtoua Biblia, noijki uelis titlanemiliskej ipan okseki tlemach. Se neskayotl, ijkuak tikitaskej itech tlen toTajtsin yokichijchiuj, matotlajtoltikan: “¿Tlenon nechmachtia itech Jehová?”. Kuakon, tikmachiliskej ika tiknekij tikchiuiliskej teoyotl niman tiktlasojkamachiliskej. Niman tla tinemij iuan oksekimej uelis tikimijliskej kenon tomachiliaj (Salmo 104:​24; Hechos 14:​17). Jehová techita niman melak paki ijkuak itech titlanemiliaj, tikchiuiliaj teoyotl niman tikinnojnotsaj oksekimej itech yejua. Biblia kijtoua: “Se amoxtli tlen tetlalnamiktia onoijkuilo ixpan inpampa akin kimojkaitayaj Jehová niman akin tlanemiliayaj itech itoka” (Malaquías 3:​16).

9. a) ¿Tlenon okijli Pablo Timoteo? b) ¿Itech tlenon uelis titlanemiliskej ijkuak toyektlaliaj tontemachtiskej itech Biblia niman tontenojnotsaskej?

⁹ Pablo okijli Timoteo matlanemili itech kenon kitayaj tlen kijtouaya, tlen kichiuaya niman itech ken temachtiaya (xpoua 1 Timoteo 4:​12-​16). Tejuamej noijki noneki titlanemiliskej itech yejuin. Se neskayotl, ijkuak toyektlaliaj kenon titemachtiskej itech Biblia, noneki matitlanemilikan. Uelis titlanemiliskej itech se tlajtoltilistli noso se neskayotl tlen makipaleui akin tikmachtiaj kuajli iuan manouika toTajtsin. Titlanemiliskej itech yejon techpaleuis machikaui totlaneltokil niman matitemachtikan ika yolchikaualistli. Noijki noneki titlanemiliskej ijkuak tiaskej tontenojnotsaskej (xpoua Esdras 7:​10).b Uelis tikpouaskej se capítulo itech Hechos noso titlanemiliskej itech tlen tiktepouiliskej noso itech amatlajkuiloltin tlen tiktemakaskej. Yejuin techpaleuis matitenojnotsakan ika yolchikaualistli (2 Timoteo 1:6). Noijki, kuajli yes tla titlanemiliaj itech tlen kinpoloua tlaltikpakchanejkej kampa titenojnotsaj niman tlen uelis tikimijliskej niman ijkon makinekikan makiselikan tlen tikimijliskej. Tla ijkon tikchiuaj, kuajli tiktekitiltiskej Biblia ijkuak titenojnotsaskej (1 Corintios 2:4).

10. ¿Itech tlenon noijki uelis ipan titlanemiliskej?

¹⁰ ¿Itech tlenon noijki uelis titlanemiliskej? Tla tikijkuilouaj tlen tijkakij ipan tlanechikoltin niman uejueyimej tlanechikoltin, matikxelokan tiempo ipan titlanemiliskej. Niman matotlajtoltikan: “¿Tlenon oniuel itech Biblia niman itech ikalpan toTajtsin?”. Noijki uelis titlanemiliskej tlen tikpouaj ipan Amatl Tekakistilijketl niman ¡Despertad! Niman itech amatlajkuiloltin tlen kisaj ipan uejueyimej tlanechikoltin. Noso ijkuak tikpouaj ipan Anuario itech se tokniuj, matitlanemilikan itech tlen ipan onochiuj niman ijkon maajsi ipan toyojlo. Ijkuak tikpouaj amatlajkuiloltin, kuajli yes tla tikneskayotiaj noso tikijkuilouaj tlen tiknekij tikilnamikiskej. Yejuin uelis tiktekitiltiskej ijkuak tikpanoltiskej se tlamachtijli, ijkuak tikontlajpalouaj se tokniuj noso akin tikmachtijtokej itech Biblia. Ijkuak titlanemiliskej, matiuejkauikan kech nonekis pampa tiknekij maajsi ipan toyojlo tlen tomachtiaj niman tiktlasojkamachiliskej Jehová ipan teoyotl.

MATITLANEMILIKAN MOJMOSTLA TLEN TIKPOUAJ IPAN BIBLIA

11. a) ¿Itech tlenon melak ueyi kijtosneki matitlanemilikan? b) ¿Tleka melak ueyi kijtosneki titlanemiliskej itech Biblia? (Xkita nota.)

¹¹ Maski melak miyek onka tlen uelis ipan titlanemiliskej, melak ueyi kijtosneki titlanemiliskej ipan Biblia. San ika ¿tla yejko tonajli ijkuak xok techkauiliskej tikpiyaskej Biblia?c Uelis techkuiliskej Biblia, san ika, xakaj uelis kichiuas maka matiknemilikan tlen yotiktsontekontlalijkej, ken se tlaxelojli pitentsin ipan Biblia noso tlakuikaltin (Hechos 16:​25). Jehová techpaleuis ika iespíritu santo matikilnamikikan tlen yotomachtijkej niman matimelajkanemikan (Juan 14:​26).

12. Tla tiknekij tikpouaskej Biblia mojmostla, ¿tlenon noneki tikchiuaskej?

¹² ¿Tlenon uelis tikchiuaskej niman ijkon uelis tikpouaskej Biblia mojmostla? Matikitakan tlenon uelis tikchiuaskej. Seki tonaltin ipan semana uelis tikpouaskej niman titlanemiliskej itech tlen nopoua ipan Biblia itech Kampa Tomachtiaj iTekiyo toTajtsin. Seki tonaltin uelis tikpouaskej itech Mateo, Marcos, Lucas noso Juan niman titlanemiliskej itech tlen okichiuj Jesús niman itech tlen otemachti (Romanos 10:​17; Hebreos 12:2; 1 Pedro 2:​21). Niman tla tiknekij matechpaleui tlen tikpouaskej, uelis tiktekitiltiskej sekimej toamatlajkuiloluan tlen kijtouaj kenon onochiujtia tlen Jesús okichiuj ipan inemilis (Juan 14:6).

TLEKA MELAK NONEKI MATITLANEMILIKAN

13, 14. a) ¿Tleka noneki nochipa matitlanemilikan itech Jehová niman Jesús? b) ¿Tlenon kichiuas matitlanemilikan itech Jehová niman Jesús?

¹³ Titlanemiliskej itech Jehová niman Jesús uelis techpaleuis matoskaltikan itech totlaneltokil niman machikaui (Hebreos 5:​14; 6:1). Tla xtiuejkauij titlanemiliaj itech Jehová, ika yolik uelis tijkauaskej iuan touikaskej niman hasta uelis tiktlalkauiskej (Hebreos 2:1; 3:​12). Jesús okijto ika akin xika inyojlo kiseliaj tlen kipouaj ipan Biblia, “sa komatstokej ken ijki nopanoltiskej niman sanoyej kinekij notomintiskej niman pakiskej ipan innemilis”. Niman yejuin kichiuas makitlalkauikan Jehová (Lucas 8:​14, 15).

¹⁴ Ika yejon noneki nochipa melak matitlanemilikan ipan Biblia niman mojmostla kuajli matikixmatikan Jehová. Yejon kichiuas matiknekikan tikixkopinaskej ikualneskayouan niman tlen kichiua (2 Corintios 3:​18). Uelis tomachtijtiaskej itech toTajtsin niman nochipa tikchiuaskej ken yejua. ¡Se ueyi tlateochiualistli! (Eclesiastés 3:​11.)

15, 16. a) ¿Kenon techpaleuiya titlanemiliskej itech Jehová niman Jesús? b) ¿Tleka kemantika ouijtika tikitaskej kemanon titlanemiliskej? c) ¿Tleka melak kuajli tla tochikauaj titlanemiliaj?

¹⁵ Titlanemiliskej itech Jehová niman Jesús noijki techpaleuis matiktekichiuilikan Jehová ika pakilistli. Niman yejuin pakilistli kinyolchikauas tokniuan niman akin tikinnojnotsaj. Niman, ijkuak titlanemiliaj itech tlen Jehová okichiuj ijkuak okuajtitlan Jesús mamiki topampa, tikitaj kenon melak ueyi kijtosneki timouikas iuan toTajtsin (Romanos 3:​24; Santiago 4:8). Tokniuj Mark, chanej Sudáfrica, tsauktoya pampa oyolmelaujkanen itech Jehová. Yejua kijtoua ika melak kualtsin tla titlanemiliaj. Ijkuak yejua tlanemilia, kimati seki itech Jehová tlen xkimatiya. Noijki, ijkuak noyolkokoua noso notekipachoua, kipoua Biblia niman sakin itech tlanemilia, niman yejon kiyolseuiya.

¹⁶ Kemantika ouijtika tiknextiskej kemanon titlanemiliskej itech Biblia. ¿Tleka? Pampa ipan yejuin tlaltikpaktli tentika ika miyek tlen uelis techtsakuilis. Se tokniuj akin chanti África itoka Patrick, kijtoua ika kipiya miyek tlemach tlen kichiuas mojmostla. Kemantika onka tlen melak kitekipachoua. ¿Kuakon tlenon kichiua? Kachtopa, kijlia Jehová tlen kajmana ipan se teoyotl, ijkon ika iyojlo nomachilia niman sakin kuajli tlanemilia. Kema, yejuin kijtosneki ika kixeloua tiempo, san ika, melak nisiuj nomachilia itech Jehová. Niman yejuin kichiua maka ouijtika makimachili kasikamatis iTlajtol toTajtsin (Salmo 94:​19). Ken tikitaj, melak tepaleui tikpouas Biblia niman titlanemilis mojmostla itech. Kuakon, tla tochikauaj tikchiuaj yejon, kuajli tonkisaskej (Hechos 17:​11).

KEMANON UELIS TITLANEMILISKEJ

17. ¿Kemanon titlanemilia tejua itech Biblia?

¹⁷ Sekimej kipouaj Biblia, tlanemiliaj itech niman kichiuaj teoyotl ika kualkan. Niman sekimej kichiuaj ika tlajko tonajli ijkuak noseuiyaj. Niman sekimej kipouaj achijtsin ika kualkan niman ika yeuajli (Josué 1:8). Maski san kemanon matikchiuakan, noneki tikxeloskej tiempo ijkuak tikpouaskej Biblia niman titlanemiliskej itech (Efesios 5:​15, 16).

18. ¿Tlenon kijtoua Jehová kinmakas nochimej akin tlanemiliaj itech Biblia niman kiyejyekouaj kichiuaskej tlen nomachtiaj?

¹⁸ Jehová kijtoua ika kinteochiuas akin tlanemiliaj itech Biblia niman nochikauaj kitlakamatiskej tlen nomachtiaj (xpoua Salmo 1:​1-3).d Jesús okijto ika akin kikakij niman kitlakamatij iTlajtol toTajtsin melak pakij (Lucas 11:​28). San ika, melak ueyi kijtosneki tla mojmostla titlanemiliaj itech Biblia, pampa uelis tinemiskej ken Jehová kuelita niman ijkon tikueyichiuaskej. Niman toTajtsin techteochiuas ika pakilistli aman niman nemilistli tlen xkeman tlamis ipan yenkuik tlaltikpaktli (Santiago 1:​25; Apocalipsis 1:3).